Мыекъопэ индустриальнэ техникумым сэнэхьат зэгъэгъотыгъэнымкIэ и Гупчэ проектэу «Апэрэ сэнэхьат» зыфиIорэр щыIэныгъэм щыпхыращы. Ащ къыдыхэлъытагъэу илъэс 14 зыныбжьхэм къащегъэжьагъэу шIоигъоныгъэ зиIэхэр ыпкIэ хэмылъэу рагъаджэх.
ЩыIэныгъэм нахь щагъэфедэрэ сэнэхьатхэр зэрагъэгъотынхэ амал яI. Хабзэ зэрэхъугъэу, егъэджэнхэр гъэмафэм зэхащэщтых. ДжырэкIэ шIоигъоныгъэ зиIэхэр аугъоих. КIэлэеджакIохэм еджэныр заухыкIэ, сэнэхьат зэрэзэрагъэгъотыгъэр къэзыушыхьатырэ тхылъхэр аратыжьыщтых.АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, проектыр 2023-рэ илъэсым къыщегъэжьагъэу щыIэныгъэм щыпхыращы. А уахътэм республикэм икIэлэеджэкIо 397-рэ ащ хэлэжьагъ. ГъэрекIо гъэмафэм нэбгыри 151-мэ сэнэхьат зэфэшъхьафхэр зэрагъэгъотыгъ.