М. Гордышов
Адыгэ Республикэм и ЛIышъхьэу КъумпIыл Мурат зыныбжь хэкIотагъэхэм язэIукIапIэу бэмышIэу Мыекъуапэ икъэлэ парк дэжь къыщызэIуахыгъэм щыIагъ. Хабзэ зэрэхъугъэу, зыныбжь хэкIотагъэхэр мы чIыпIэм щызэIокIэх, зыщагъэпсэфы.
ЧIыопсым изытет емылъытыгъэу зыщыфэехэ уахътэм зэIукIэнхэм пае АР-м и ЛIышъхьэ пшъэрылъ зэрафишIыгъэм тетэу ахэр зыщызэдэгущыIэнхэ, къэбархэр къызщызэфаIотэн, зызщагъэпсэфын алъэкIыщт чIыпIэр къэлэ гупчэм щызэтырагъэпсыхьагъ. Партиеу «Единэ Россием» иобщественнэ приемнэ зычIэтыгъэ унэр ары ащ фэдэ гупчэр къызщызэIуахыгъэр.Республикэм ипащэ зыныбжь хэкIотагъэхэм зызщагъэпсэфын алъэкIыщт гупчэм амалэу иIэхэм защигъэгъозагъ. Зызщагъэпсэфыщт, зыщызэдэгущыIэщтхэ, цIыфыбэ зыхэлэжьэрэ Iофтхьабзэхэр зыщызэхащэщт чIыпIэхэр унэм щагъэнэфагъэх. ЦIыфхэм ясоциальнэ фэIо-фашIэхэр зыгъэцэкIэрэ Гупчэм иIофышIэхэр нэжъ-Iужъхэм мыщ IэпыIэгъу щафэхъущтых.
АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч къызэриIуагъэмкIэ, нэжъ-Iужъхэм я Гупчэ цIыфыбэ къеуалIэ. Къэлэ гупчэм имызакъоу, нэмыкI микрорайонхэм адэсхэри ягуапэу зэIукIапIэм къыщызэрэугъоих. Мыщ сыдигъуи зыныбжь хэкIотагъэхэр щыолъэгъух. КъумпIыл Мурат къызэкIо мафэм бэу нахьыжъхэр зэIукIапIэм чIэтыгъэх.Республикэм и ЛIышъхьэ гупчэм къекIолIагъэхэм адэгущыIагъ, яшIошIхэр зэригъэшIагъ. Нахьыжъхэм ащыщхэм гупчэм амалэу иIэхэм осэшхо къыратыгъ, зыныбжь хэкIотагъэхэм бэгъашIэ хъунхэмкIэ ащ фэдэ чIыпIэхэм мэхьанэшхо зэряIэр къыхагъэщыгъ.Республикэм ипащэ мы чIыпIэм зыщэIэ нэуж зыныбжь хэкIотагъэхэм языгъэпсэфыгъо уахътэ рэхьатэу агъэкIонымкIэ ищыкIэгъэ амалхэр зэрахьанхэу пшъэрылъ афигъэуцугъ. Ащ зэрэхигъэунэфыкIыгъэмкIэ, апэрэ чэзыоу мыщ фэдэ гупчэр зыфытегъэпсыхьэгъэн фаер зыныбжь хэкIотагъэхэм мыщ дэгъоу зыщагъэпсэфын ыкIи шъхьадж иеплъыкIэ щызэрагъэшIэнэу ары.
«ЗэдэгущыIэнхэу, къэбархэр къызэфаIотэнэу, зэгъусэхэу языгъэпсэфыгъо уахътэ зэдагъэкIонэу тинахьыжъхэм амал ягъэгъотыгъэн фае. Зыщыфэбэ лъэхъаным ахэр зыщызэIукIэхэрэ ыкIи яуахътэ зыщагъэкIорэ паркхэмрэ скверхэмрэ афэдэу мы чIыпIэр хъун фае», — къыIуагъ Адыгеим и ЛIышъхьэ.Пенсионерхэм атегъэпсыхьэгъэ гупчэр зэрэзэхащагъэр лъэпкъ проектэу «Унагъом» къыдыхэлъытэгъэ программэу «ГъэшIэ кIыхьэ чан» зыфиIорэм, «Единэ Россием» ипартийнэ программэхэм язы Iахьэу щыт. Адыгеим имуниципальнэ образованиехэм ащ фэдэ гупчэ 35-рэ къащызэIуахыгъ. Ахэр зыфытегъэпсыхьагъэхэр зыныбжь хэкIотагъэхэм щыIэкIэ Iэрыфэгъу афызэхэщэгъэныр, социальнэ зэпхыныгъэхэр гъэпытэгъэнхэр, тинахьыжъхэм ящыIэкIэ-псэукIэ зыкъегъэIэтыгъэныр ары.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.