Терроризмэм пэшIуекIогъэныр

Адыгэ Республикэм иоперативнэ штаб ипащэу, Урысыем щынэгъончъэнымкIэ и Феде­ральнэ къулыкъу и ГъэIорышIапIэу Адыгэ Республикэм щыIэм иIэшъхьэтетэу Михаил Кемеровым тхьамэтагъор щызэрихьэзэ, 2026-рэ илъэсым мэлылъфэгъум и 28-м щыIэ­гъэ зэIукIэр зыфэгъэхьыгъагъэр гъэсэныгъэм ылъэныкъокIэ ыкIи ныбжьыкIэхэм азы­фагу терроризмэм пэшIуекIорэ Iофтхьабзэу ащызэрахьэхэрэм шIуагъэу къатырэм зы­къе­гъэIэтыгъэныр ыкIи къэбарлъыгъэIэс амалхэмкIэ а IофшIэныр нахь гъэлъэшыгъэныр ары.

Iофтхьабзэм хэлэжьагъэх Адыгэ Рес­публикэмкIэ терроризмэм пэшIуекIорэ комиссием и Тхьаматэу, Адыгэ Респуб­ликэм и ЛIышъхьэу КъумпIыл Мурат, терроризмэм пэшIуекIогъэнымкIэ Лъэпкъ комитетым иофициальнэ лIыкIоу Андрей Пржездомскэр, терроризмэм пэшIуекIорэ комиссием иаппарат игъэIорышIапIэ ипащэ игуадзэу Виталий Малышевыр, оперативнэ штабым хэтхэр ыкIи шъолъы­рым а лъэныкъомкIэ щызэхэщэгъэ комиссием иIофшIэн хэлажьэхэрэр, къэралыгъо хабзэм илIыкIохэм ащыщхэр, пресс-къулыкъум иIофышIэхэр.ЗэIукIэр къызэIуихызэ Михаил Кемеровым къыIуагъ джырэ лъэхъаным дунэе Iофхэм язытет къызэрэзэIыхьагъэм, терроризмэм къыпкъырыкIырэ щынагъом Урысые Федерациер зэреутэлIагъэм япхыгъэ гумэкIыгъоу къэуцухэрэр зэрэIофыгъошхохэр. Ащ упэуцужьыным пае правовой базэр гъэпытэгъэн, хэбзэухъу­мэкIо къулыкъухэм, къэралыгъо хабзэм икъулыкъухэм яIофшIэнкIэ нахь зэдегъэ­штэныгъэ ахэлъын фае.Мы илъэсым изакъоу республикэм террористическэ нэшанэ зиIэ бзэджэшIагъэхэмкIэ уголовнэ Iофи 8 къыщызэIуахыгъ. А лъэныкъомкIэ агъэмысэхэу нэбгыри 6 къаубытыгъ. Террористическэ ыкIи экстремист нэшанэ зиIэ бзэджэшIагъэхэм гъунэ афэшIыгъэным пае цIыфхэм зэхэфын, гурыгъэIон IофшIэнхэр нахь игъэкIотыгъэу адызехьэгъэн фае, анахьэу етIани зыныбжь имыкъугъэхэм зэрахьэрэ бзэджэшIагъэхэм правовой лъэныкъомкIэ афэхъун ылъэкIыщт кIэуххэр икъоу агурыгъэIогъэн фае.Адыгэ Республикэм и ЛIышъхьэ къызэрэхигъэщыгъэмкIэ, геополитикэ лъэныкъомкIэ Iофхэр етIани нахь къызыхьылъагъэхэр хэушъхьафыкIыгъэ дзэ операцием илъэхъан. КъохьапIэм Урысыем пэшIуекIорэ «гибриднэ» заоу къы­ригъэжьагъэм щынэгъончъэным илъэныкъо шъхьаIэхэр къызэлъиубытыгъэх. Адыгеир – цIыф лъэпкъыбэмэ ялIыкIохэр зыщыпсэухэрэ шъолъыр, ижъыкIэ къыщегъэжьагъэу мамырныгъэрэ зэгурыIоныгъэрэ азыфагу илъэу лъэпкъ зэфэшъхьафхэм къахэкIыгъэхэр ыкIи дин зэмылIэужыгъохэр зылэжьыхэрэр ащ щэпсэух. Арышъ, лъэпкъ зэгурыIоныгъэр, мамырныгъэр щыIэным тэркIэ мэхьанэшхо иI. Пыим гухэлъ шъхьаIэу къыздыри­хьакIырэр ащ фэдэ зыкIыныгъэр ыкIоцIыкIэ зэщигъэкъоныр ары. АщкIэ информационнэ амал зэфэшъхьафхэр егъэфедэх, анахьэу етIани а лъэныкъом­кIэ ныбжьыкIэхэр ары анахьэу ынаIэ зытыридзэрэр. Ащ пае тэркIэ ныбжьыкIэ­хэм якъэухъумэнрэ тэрэзэу ахэр гъэгъо­зэгъэнхэмрэ пшъэрылъ шъхьаIэх.Терроризмэм пэшIуекIорэ комиссием иофициальнэ лIыкIоу Андрей Пржездомскэм ынаIэ зытыридзагъэр пыим Урысы­ем иныбжьыкIэхэр терроризмэм епхыгъэ бзэджэшIагъэхэр зэрахьанхэм зэрэфигъэхьазырыщтхэмкIэ амал зэфэшъхьаф­хэм зэряусэрэр. АхъщэкIэ е пропагандэм ишIуагъэкIэ террористическэ бзэджэ­шIагъэ зезыхьащт цIыфхэр къахахых. Ащ кIэлэцIыкIухэр ыкIи Iэтахъохэр хащэх, со­циальнэ хъытыухэр, мессенджерхэр, компьютер джэгукIэхэмкIэ чатхэр къызфагъэфедэх. Ащ пае тэри Iэтахъохэмрэ ныбжьыкIэхэмрэ бзэджэшIагъэхэм аха­мы­щэнхэм пае нахь лъэшэу Iофтхьэбзэ зэфэшъхьафхэр игъэкIотыгъэу зетхьанхэ фае.Терроризмэм пэшIуекIорэ комиссием иаппарат игъэIорышIапIэ ипащэ игуадзэу Виталий Малышевым анахьэу къекIолIагъэхэм анаIэ зытыраригъэдзагъэр Урысые Федерацием и Президент къыгъэуцугъэ пшъэрылъхэр ары. Ахэр зыфэгъэ­хьыгъэхэр терроризмэм къыздихьын ылъэкIыщт щынагъохэм ателъытагъэу 2024 – 2028-рэ илъэсхэм Урысые Феде­рацием терроризмэм пэшIуекIорэ Iофыгъохэу зэшIуахыщтхэм я Зэхэубытэгъэ план къыдилъытэрэ Iофтхьабзэхэр зехьэгъэнхэр ары, анахьэу етIани ныбжьыкIэхэм икъоу Iоф адэшIэгъэныр.Къэралыгъо къулыкъухэмрэ терроризмэм пэшIуекIорэ комиссиемрэ ялIыкIохэм зэхэсыгъом Iофтхьэбзэ зэфэшъхьафхэр щырахъухьагъэх террористическэ ыкIи экстремистскэ идеологиеу зызыушъомбгъурэм пэуцужьыгъэнымкIэ. Терроризмэм пэшIуекIорэ комиссием иаппарт илIыкIохэр Адыгэ Республикэм къызэкIохэм, Iофтхьэбзэ тедзэ заулэ зэрахьагъ. Республикэм пэщэныгъэ дызе­хьэгъэнымкIэ и Гупчэ иIофышIэхэм зэIукIэгъу адыряIагъ, информационнэ лъэныкъомкIэ Iофтхьабзэу зэрахьэхэрэр зэхэфыгъэнхэмкIэ ыкIи ныбжьыкIэхэм радикализациер къахэмыхьанымкIэ Андрей Пржездомскэр зыныбжь имыкъугъэхэу террористическэ нэшанэ зиIэ бзэджэшIагъэхэр зезыхьагъэхэу зиIоф аIонэу щытхэм гущыIэгъу афэхъугъ.ЫпшъэкIэ зигугъу къэтшIыгъэ Iофтхьабзэхэр зыфытегъэпсыхьагъэхэр терроризмэм щыухъумэгъэнхэмкIэ Iофыгъо тедзэхэр гъэнэфэгъэнхэр ыкIи зехьэгъэн­хэр, джырэ лъэхъаным цIыфхэм къэбар тэрэзыр аIэкIэгъэхьэгъэным анаIэ икъоу тырагъэтыныр ары.Урысыем щынэгъончъэнымкIэ и Федеральнэ къулыкъу и ГъэIорышIапIэуАдыгэ Республикэм щыIэм ипресс-къулыкъу