«Амалхэм ягъунапкъэхэм зядгъэушъомбгъузэ» зыфиIорэ цIэр зиIэ я III-рэ Кавказ инвестиционнэ форумыр 2026-рэ илъэсым мэлылъфэгъум и 28-м къыщегъэжьагъэу и 30-м нэс къэгъэлъэгъопIэ гупчэу «Минводы ЭКСПО» щыкIощт. Ащ изэхэщакIор Росконгрессым и Фондэу УФ-м и Правительствэ, УФ-м экономикэ хэхъоныгъэмкIэ и Министерствэ ыкIи Ставрополь краим и Правительствэ IэпыIэгъу зыфэхъухэрэр ары.
УФ-м и Правительствэ и Тхьаматэ игуадзэу Александр Новак къызэрэхигъэщыгъэмкIэ, шъолъырхэм яамалхэр лъэныкъо зэфэшъхьафхэмкIэ къызэIухыгъэнхэмкIэ къэкIопIэ гъэнэфагъэу яIэхэр Кавказ инвестиционнэ форумым къыщагъэлъэгъощтых.Адыгеир ренэу а форумым хэлажьэ. Республикэм илIыкIо куп пэщэныгъэ дызезыхьэрэр шъолъырым иIэшъхьэтетэу КъумпIыл Мурат. Программэ игъэкIотыгъэ зэхагъэуцуагъ: зэдэгущыIэгъухэр, зэзэгъыныгъэхэм акIэтхэгъэныр, пленарнэ зэхэсыгъом, яеплъыкIэхэр къызщыраIотыкIыщтхэ чIыпIэхэм ащыIэнхэр. Экономикэм ылъэныкъокIэ амалэу иIэхэр къыгъэлъэгъонхэм пае Адыгеим республикэм истендэу экспозицие гъэнэфагъэ зигъусэр къыгъэхьазырыгъ. IофшIэным епхыгъэ зэIукIэгъухэр щызэдыряIэнхэмкIэ, республикэм ипромышленнэ, имэкъумэщ ыкIи зекIон лъэныкъомкIэ форумыр окIофэ ар къызфагъэфедэщт. Ахэм инвесторхэм апае игъо алъэгъухэрэр къыщаIощтых, республикэм ихэхъоныгъэкIэ гугъэпIэ инхэр къэзытырэ лъэныкъохэм ыкIи бизнесым IэпыIэгъу етыгъэнымкIэ агъэфедэрэ Iофтхьабзэхэм ащагъэгъозэщтых.ЗекIоным ылъэныкъокIэ инвестиционнэ проектхэм язытет пшъэрылъыбэ зэшIозыхырэ зекIон-рекреационнэ паркэу «ДжэгокIо гъэхъунэр» зыцIэу республикэм щагъэпсырэм имакет къыщагъэлъэгъощт. Ащ нэмыкIэу индустриальнэ паркэу «Инэм» зыфиIорэмкIэ къыдэгъэкIыжьыным иамалхэм ыкIи резидентхэм, промышленнэ стартапым нэIуасэ щафашIыщтых. Стендым къыдэгъэкIыжьыным ылъэныкъокIэ чIыпIэу ыубытырэм форумым хэлажьэхэрэм Адыгеим къыщыдагъэкIырэ продукцием нэIуасэ зыщыфашIышъущт.ХэушъхьафыкIыгъэу анаIэ зытырагъэтыщтыр форумым ипрограммэу IофшIэным ыкIи ащ илъэныкъо зэфэшъхьафхэм къыдалъытэрэ Iофыгъохэр ары. Ахэм ахэхьэх блок гъэнэфагъэхэу инвестициехэм ыкIи финансхэм, промышленнэ, мэкъумэщ комплексхэм, дунэе зэдэлэжьэныгъэм, IофышIэхэм алъэныкъокIэ Iофхэм язытет, зекIоным, хьэкIэпэгъокIыным, цифровизацием ыкIи технологическэ лъэныкъом, сатыум, предпринимательствэм, транспорт, энергетикэ инфраструктурэм, псауныгъэм икъэухъумэн ыкIи культурэм япхыгъэхэр.Адыгеим и ЛIышъхьэ къыхигъэщыгъ зэдэлэжьэныгъэ зыдыряIэщт лъэныкъохэм IофшIэкIэшIоу аIэкIэлъ хъугъэм зыщыгъэгъозэгъэнымкIи, Темыр Кавказым ыкIи зэрэ Урысыеу бизнесым зызэращиушъомбгъурэм елъытыгъэу республикэр а Iофтхьабзэм зэрэхэлажьэрэм мэхьанэшхо зэриIэр.«Мы аужырэ лъэхъаным инвестициехэр хэпшIыкIэу нахьыбэ тшIынхэ тлъэкIыгъ: илъэсищым къыкIоцI сомэ миллиард 211-м ахэр ехъугъэх. Илъэсэу икIыгъэм инвестициехэмкIэ Лъэпкъ рейтингым хэгъэгум ишъолъырхэм азыфагу Адыгеим я 16-рэ чIыпIэр щиубытыгъ. Республикэм зыпкъитыныгъэ хэлъэу хэхъоныгъэ ышIынымкIэ амалэу щыIэхэр зэкIэ гъэфедэгъэнхэ зэрэфаер къыдгурэIо. Кавказ инвестиционнэ форумым ащ фэдэ амалхэр къытетых ыкIи шIуагъэу къыхьырэр нафэ къытфэхъугъ. БлэкIыгъэ форумхэм ащызэдэтшIыгъэгъэ зэзэгъыныгъэхэр щыIэныгъэм щытэгъэцакIэх. Ары пакIошъ, проект заулэ зэшIотхыгъах. Джыри тиинвестициехэр нахьыбэ зэрэтшIыщтхэм телъытагъэу тиIофшIэн кIэухышIухэр фэхъунхэу тэгугъэ. Тэ типшъэрылъыр зэхъокIыныгъэшIухэмкIэ апэ титыныр ары», —къыIуагъ КъумпIыл Мурат.Мыщ дэжьым къыхэгъэщыгъэн фае: 2025-рэ илъэсым республикэм иэкономикэ сомэ миллиард 80,4-рэ инвестициеу хэтлъхьагъ е, нэмыкIэу къэпIон хъумэ, 2024-рэ илъэсым елъытыгъэмэ, проценти 104,9-рэ фэдиз. Ащ амал къытыгъ илъэсэу икIыгъэм икIэуххэмкIэ Къыблэ федеральнэ шъолъырым апшъэрэ чIыпIищыр щызыIыгъ шъолъырхэм Адыгеир ахэхьанымкIэ. НепэкIэ сомэ миллиарди 101-рэ хъурэ инвестициехэу проект 20-мэ ателъытагъэхэм Iоф адашIэ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.