МКъТУ
Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм иящэнэрэ едзыгъоу «Шъолъыр ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэр республикэм щылъэкIуатэ. Проектым хэлэжьэрэ ветеранхэр Адыгэ Республикэм шъолъыр гъэIорышIэнымкIэ и Гупчэ щыIагъэх, ащ зыкъыфэзыгъэзэрэ цIыфхэм ялъэIухэр зэрэзэхафыхэрэм зыщагъэгъозагъ.
Шъугу къэдгъэкIыжьын, программэм иящэнэрэ едзыгъо къыдыхэлъытагъэу шъолъыр ыкIи муниципальнэ гъэIорышIэным имызакъоу, чIыпIэхэм яхэхъоныгъэ зэрэзэхэтыр, ныбжьыкIэ политикэр, къолъхьэ тын-Iыхыным пэшIуекIогъэным ишапхъэхэр, инвестиционнэ политикэр, тинепэрэ щыIакIэ цифрэ амалхэм къэралыгъо гъэIорышIакIохэм яIофшIакIэ зэрэзэблихъурэр, къызэрафигъэпсынкIэрэр ветеранхэм арагъэшIэщт.Iофтхьабзэр къызэIуихыгъ Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хагъэхъонымкIэ ишъолъыр Гупчэ ипащэу Пафэ Фатимэ.Программэм хэлажьэхэрэм апашъхьэ къыщыгущыIагъэх АР-м цифрэ хэхъоныгъэмкIэ ыкIи зэпхыныгъэмкIэ иминистрэ игуадзэу Михаил Семенцовыр ыкIи шъолъыр гъэIорышIэнымкIэ Гупчэм ипащэу Къоджэшъэо Казбек. Цифрэ трансформацием, амалыкIэу «шъолъыр Iуш» зыфиIорэм изэхэтыкIэ, социальнэ хъытыухэр зэрагъэIорышIэщтхэр къафаIотагъ.Михаил Семенцовым цIыфхэм ящыIэныгъэ изытет нахьышIу хъунымкIэ амалыкIэу «шъолъыр Iушыр» зэрагъэфедэщтым анаIэ тыраригъэдзагъ.— Къэралыгъо къулыкъухэмкIэ мэхьанэ зиIэр цIыфхэм лъэIоу зыкъызэрафагъазэхэрэр ыкIи щыкIагъэу яIэхэр икъоу зэфэхьысыжь шIыгъэнхэр ары. Ащ пае цIыфхэм ялъэIухэр зыщаугъоирэ, ахэм Iоф зыщадашIэрэ платформэр (ПОС) непэ къышъотэгъэлъэгъу, — хигъэунэфыкIыгъ министрэм игуадзэ.Нэужым Къоджэшъэо Казбек къэралыгъо гъэIорышIэным исистемэ щагъэфедэрэ цифрэ амалыкIэхэр щысэхэмкIэ къыгъэшъыпкъэжьыхэзэ къаригъэлъэгъугъ. Медиазэфэхьысыжьхэм, информационнэ шъолъырым лъыплъэгъэным ыкIи социальнэ хъытыухэм ащыряIэ официальнэ нэкIубгъохэм цIыфхэм зэпхыныгъэ зэращыдыряIэщт шIыкIэхэм анаIэ тыраригъэдзагъ. Джащ фэдэу тишъолъыр икъулыкъухэм яIофшIэн цифрэ шъуашэм зэрэралъхьагъэр къафиIотагъ.Мы зэIукIэгъур проектэу «Адыгеим и ЛIыхъужъхэр» зыфиIорэм хэлажьэхэрэм агу рихьыгъ, ашIогъэшIэгъон упчIабэ къаратыгъ.IЭШЪЫНЭ Сусан.