Анцокъо И.
IофшIэныр щынэгъончъэным и Дунэе мафэ ехъулIэу конференцие Мыекъуапэ щыкIуагъ.
Ащ хэлэжьагъэх IофшIэнымрэ социальнэ хэхъоныгъэмрэкIэ лэжьапIэхэм япащэхэр, IофшIэныр щынэгъончъэным фэгъэзагъэхэр, профсоюзхэм ыкIи Социальнэ фондым ялIыкIохэр. Республикэм ирайонхэм къарыкIыгъэ нэбгыришъэм ехъу ащ зэфищагъ. Iофтхьабзэр зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч. Ащ конференциер къызэIуихыгъ ыкIи къэзэрэугъоигъэхэм мэфэкIымкIэ къафэгушIуагъ. Шъолъыр министрэм къызэриIуагъэмкIэ, IофшIэныр щынэгъончъэным и Дунэе мафэ аужырэ илъэсипшIым республикэм щыхагъэунэфыкIы ыкIи мэхьанэшхо иIэу елъытэ.— Непэрэ лэжьапIэхэм, ыпэрапшIэу, пшъэрылъ шъхьаIэу яIэр IофышIэхэм япсауныгъэ икъэухъумэн, ахэм ящыIэныгъэ ищынэгъончъагъэ изэхэщэн. Мы лъэныкъомкIэ Iофэу ашIэрэр, гумэкIыгъоу яIэхэр зэхэтфынхэу, екIолIакIэхэмкIэ тызэдэгощэнэу гъэ къэс мыщ фэдэ конференцие зэхэтэщэ. Тэ тызфаер лэжьапIэм шъобж тещагъэ щыхъухэрэр тимыIэхэнхэу ары. Шъыпкъэ, республикэмкIэ ащ фэдэ хъугъэ-шIагъэхэм япчъагъэ нахь макIэ мэхъу, ау къэмыгъэхъухэным джыри тыкъыфэкIуагъэп, — къыIуагъ министрэм.
Мы Iофым фэгъэхьыгъэ пчъагъэхэр къыIуагъэх Пшызэ шъолъыр ыкIи Адыгеим IофшIэнымкIэ я Къэралыгъо инспекцие ипащэ ишъолъыр гуадзэу республикэм щыIэ Сергей Абрамцовым. Ащ къызэрэхигъэщыгъэмкIэ, 2025-рэ илъэсым уплъэкIун 25-рэ зэхащагъ. Ахэм язэфэхьысыжьхэм ялъытыгъэу предписание 50 фэдизыр атхыгъ, лэжьэпIи 130-мэ пшъэдэкIыжь арагъэхьыгъ. Ыпэрэ илъэсхэм якъэгъэлъэгъонхэм ягъэпшагъэмэ, ар бэкIэ нахь макI. Джащ фэдэу тхьамыкIагъо къэмыгъэхъугъэным фэIорышIэрэ Iофтхьэбзэ 397-рэ гъэрекIо зэхащагъ, «гузэжъогъу телефоным» къытеуагъэхэм япчъагъи хэтэу гъогогъу 2000-рэ консультациехэр яIагъэх. 2025 — 2026-рэ илъэсхэм IофшIэнымкIэ яфитыныгъэхэр аукъуагъэхэу нэбгырэ 1174-мэ закъыфагъэзагъ. Процент 23-м IофшIэнымрэ зыгъэпсэфынымрэкIэ шапхъэхэр агъэцакIэхэрэп, процент 66-м гъэбылъыгъэу Iоф арагъашIэ. 2025-рэ илъэсым ошIэ-дэмышIэ тхьамыкIэгъо 13-у лэжьапIэмэ къащыхъугъэхэр IофшIэнымкIэ инспекцием зэхифыгъэх.— Пчъагъэм щыщэу 5-р IофшIэным епхыгъэх (нэбгыритIумэ ядунай ахъожьыгъ). Ушъхьагъу шъхьаIэу афэхъурэр автомобиль зэутэкIыныгъэхэр, IофшIэным изэхэщэн шапхъэхэм зэрадимыштэрэр, бысымыр IофшIэным игъэцэкIэн икъоу зэрэлъымыплъэрэр. Шъхьафэу тыздэлэжьэрэ лъэныкъохэм ащыщ, пшъэдэкIыжь атетымылъхьаным фэшI, IофшIэнымкIэ инспекторым гумэкIыгъохэр дигъэзыжьынхэр, — къыIуагъ Сергей Абрамцовым.ПстэумкIи Iофыгъуихымэ зэIукIэм щатегущыIагъэх. IофшIэныр щынэгъочъэным ылъэныкъокIэ щыIэ зэхъокIыныгъэхэр, джырэ шапхъэмэ адиштэрэ екIолIакIэхэр ыкIи нэмыкIхэр зэхафыгъэх.Джащ фэдэу, конференцием къыдыхэлъытагъэу чIыпIэм къэгъэлъэгъон щызэхащагъ. IофышIэхэм якъэухъумэн фытегъэпсыхьэгъэ пкъыгъохэр къыдэзыгъэкIыхэрэм, ащкIэ егъэджэнхэр резыгъэкIокIхэрэм яамалхэр къыщагъэлъэгъуагъэх. ЗэIукIэм къеблэгъагъэхэм ахэм защагъэгъозагъ.Анцокъо Ирин.