Ищытхъу цIыфхэм аIо

Сэнэхьат зэфэшъхьафхэм арылэжьэрэ цIыфхэм зэрафэ­разэхэр къизыIотыкIырэ тхыгъабэ тигъэзет къыфагъэхьы. Ахэм ащыщ зыныбжь хэкIотэгъэ ЩэшIэ Саныет Амзанэ ыпхъум къытхыгъэр. Мыекъуапэ дэт IэзапIэу урамэу Первомайскэм тетым иIофышIэхэм гуфэбэныгъэ зыхэлъ гущыIэхэр ащ афегъазэх.

«БэмышIэу гъэцэкIэжьынхэр зэрашIылIэгъэ IэзапIэм тигуапэу текIуалIэ. Ар нахь дахэ, кIэракIэ хъугъэ, къабзэ, гохьы, ау анахьэу гур къыдэзыщаерэр цIыфэу ащ Iоф щызышIэхэрэр ары. Ащ ипащэу Къэлэкъутэкъо Еленэ Александр ыпхъум «тхьа­уегъэпсэушхо» есIомэ сшIоигъу.2010-рэ илъэсым къыщегъэжьагъэу мы IэзапIэм сэкIо, Мэлэхъо Рузанэ Алый ыпхъур сиврач. Iушы, ыгу етыгъэу Iоф ешIэ. Бэрэ къыхэкIы Iэзэгъу уц закъом ишIуагъэ къэмыкIоу уколхэр, капельницэхэр къысфыритхыкIыхэу. Мыщ дэжьым шъхьафэу сыкъыщыуцу сшIоигъу. Мафэрэ сымаджэхэм зыщяIэзэхэрэ кабинетым сыкIоу бэрэ къыхэкIы. Ащ Iоф щызышIэрэ Зезэрэхьэ Светланэ Хьамедэ ыпхъум иIоф­шIэн хэшIыкIышхо фыриIэу ипшъэрылъхэр дэгъу дэдэу егъэцакIэх. Илъэс 20-м ехъугъ мыщ зычIэтыр, бзылъфыгъэм иIоф­шIэн псынкIэп, мафэм сымаджэу нэбгырэ 20 — 25-мэ капельницэ ахегъэуцо, укол ешIых. Ау бзылъфыгъэм иIофшIэн шIу зэрилъэгъурэр къыхэщэу, гукIэгъуныгъэ хэлъэу, нэгушIоу сымаджэхэм апэгъокIы. ТэрыкIэ, нэжъ-IужъхэмкIэ, ащ мэхьанэшхо иI. Типсауныгъэ зэрэзэтыригъэуцожьырэм, тищыIэныгъэ гъогу нахь кIыхьэ зэришIырэм имызакъоу, тыгу къыдещае, ­гущыIэ дахэхэр къытеIох.Свет­ланэ иIофшIэн хэшIыкIы­шхо зэрэфыриIэр гъуащэрэп, ­къытхилъхьэрэ уцхэр дэгъоу ешIэх, ахэр къытэкIумэ зере­гъашIэ. КъеуалIэхэрэр зэкIэ изэфэд. Сымаджэм илъынтфэ бэрэ лъыхъоу щытэп, псынкIэу къегъоты. Светланэ лъэшэу тыфэраз. Анахь гъэшIэгъоныр, исымаджэхэр шIэхэу алъэкъуацIэкIэ къешIэжьых, афэчэфэу къырегъэблагъэх.Нэжъ-Iужъ хъугъэ сымаджэхэм гуфэбэныгъэм мэхьанэшхо етэты. Мы IэзапIэм сызыкIорэр илъэс 15 хъущтышъ, нэгушIоу къызэрэспэгъокIырэмкIэ «тхьа­уегъэпсэу» есIомэ сшIоигъу, лъэшэу шIу сэлъэгъу. СыфэлъаIо ыцIэ фэдэу ищыIэныгъэ гъогу нэфынэу, пэрыохъу зи къыфэмыхъоу, игухэлъхэр къыдэхъоу бэрэ лэжьэнэу, ибын унэгъо дахэ датхъэу щыIэнэу», — ­къытхыгъ ЩэшIэ Саныет ­Амзанэ ыпхъум.Письмэр тиIэубытыпIэу цIыфхэм зищытхъу аIорэ бзылъфыгъэм зыIудгъэ­кIагъ. Мафэрэ сымаджэхэм зыщяIэзэхэрэ кабинетым цIыфхэр бэу Iусыгъэх, чIэт пIэкIорхэм зэкIэми сымаджэхэр ары­лъыгъэх. Капельницэхэр нэгъэупIэпIэгъум къыкIоцI ахилъхьэмэ, япсауныгъэ изытет зэригъашIэзэ, Светланэ зырызэу акIэрыхьагъ. Щхы мэкIэ дахэр ыIупэ Iулъэу, шъабэу, рэхьатэу мэIабэ, Iэдэб хэлъэу мэзекIо. Ицыхьэ зытелъыжьэу, гуфит-шъхьафитэу, анэсыми умышIэу мастэр ахелъхьэ. Сымаджэхэм ыгу зэ­рафэузырэр, зэрафэгумэкIырэр къы­хэщы. Уцыр пкъышъолым хэхьэфэ пчъа­гъэрэ акIэрэхьэ.Гъэзетым тыкъызэрикIыгъэр зашIэм, Светланэ лъэшэу зэрэфэразэхэр исымаджэхэм зэкIэми къытаIуагъ. ГукIэ­гъуныгъэ, цIыфыгъэ хэлъэу нэбгырэ пэпчъ зэрэдэзекIорэр, иIофшIэн дэгъу дэдэу зэригъэцакIэрэр къаIуагъ.Светланэ пчэдыжьым сыхьатыр 8-м къыщыублагъэу ылъакъо тет, шхэгъу уахътэ имыIэу сымаджэхэр щызэблэкIых, ныбжьыкIэхэри, нахьыжъхэри, хъулъфыгъэхэри, бзылъфыгъэхэри къе­кIуалIэх, Ахэтых ахэм узым зыгу ыгъэ­кIодыгъэхэри, ахэм агу къыдещае, гущыIэ дахэхэр ареIо.— ЦIыфым иуз хэзгъэжъукIы сшIоигъу, врачхэм къатхыгъэмкIэ сяIазэ. ТиIэзапIэ цIыф кIуапIэу щыт, анахьыбэу къытэуа­лIэхэрэр ныбжь зиIэхэр ары. Илъэс зэкIэлъыкIохэм ахэр ­къыспэблагъэ хъугъэх, бэмэ ацIэ-лъэкъуацIэхэр, узэу яIэхэр сэшIэх. Илъэсым къыкIоцI къызымыкIохэкIэ яIэзэрэ врачхэм сяупчIы япсауныгъэ изытет зыфэдэмкIэ, сафэгумэкIы. Ме­дицинэм уищыIэныгъэ гъогу зеппхыкIэ, ыпэрапшIэу цIыфыгъэ, гукIэгъуныгъэ пхэлъын фае. Сэ сшъхьэкIэ къысэуалIэхэрэм сяIазэ зыхъукIэ, сянэ е сятэ сапашъхьэ исэу къысшIошIы. Ахэм сыгу зэрафэузырэм фэд къысфакIохэрэми сызэрафэгумэкIырэр, — еIо Светланэ.Зезэрэхьэ Светланэ къуаджэу Къэбыхьаблэ Бислъангъур Хьамедэрэ Сарэрэ яунагъо къихъухьагъ. ИцIыкIугъом къыщегъэжьагъэу ищыIэныгъэ медицинэм рипхынэу фэягъ. АщкIэ щысэтехыпIэ фэхъугъ ышыпхъу нахьы­жъэу Бэджэнэ Марыет. Ащ медицинэ институтыр къыухыгъэу мы IэзапIэм илъэс пчъагъэрэ врач шъхьаIэм игуа­дзэу Iоф щишIагъ.Светланэ Мыекъопэ медицинэ училищыр 1991-рэ илъэсым къызеухым ыуж илъэс пчъагъэрэ Хьакурынэхьаблэ дэт сымэджэщым щылэжьагъ. ЯунагъокIэ Мыекъуапэ къызэкIожьхэм, мы Iэза-пIэм Iухьагъ, ищытхъу аригъаIозэ илъэс пчъагъэ хъугъэу Iоф ешIэ.Светланэ унэгъо дахэ иI. Ишъхьэ­гъусэу Азэматрэ ежьыррэ пшъэшъитIу зэдапIу. Ипшъэшъэ нахьыжъ Унэ Фы­жьым Iоф щешIэ, пшъэшъэ нахьыкIэр янэ фэдэу медицинэм зыфигъэзагъ. Мыекъопэ къэралыгъо технологическэ университетым щеджэ, ащ дакIоу IэпыIэгъу псынкIэм чанэу Iоф щешIэ.ДЕЛЭКЪО Анет.