ЦIыфхэм IофшIапIэ ягъэгъотыгъэнымкIэ Урысые ермэлыкъым ишъолъыр едзыгъоу «Работа России. Время возможностей» зыфиIорэр бэмышIэу Адыгеим щыкIуагъ.
РеспубликэмкIэ площадки 10-мэ Iоф ашIагъ, IофшIэн язытырэ организацие 70-мэ IофшIэпIэ чIыпIэ мини 2,5-рэ къагъэлъэгъуагъ.Адыгэ Республикэм цIыфхэм IофшIапIэ ягъэгъотыгъэнымкIэ и ГъэIорышIапIэ къызэрэщаIуагъэмкIэ,IофшIэн лъыхъоу ермэлыкъым нэбгырэ мини 2-м ехъу къекIолIагъ.Ахэм ащыщэу нэбгырэ 400-мэ IофшIэпIэ зэфэшъхьафхэр игъо афалъэгъугъ.Джащ фэдэу сэкъатныгъэ зиIэхэм IофшIэпIэ чIыпIэу афытегъэпсыхьагъэхэр ыкIи IэпыIэгъоу щыIэхэр къафаIотагъэх. ХэушъхьафыкIыгъэ дзэ операцием хэлажьэхэрэм ыкIи яунагъохэм арысхэм еджэным ыкIи IофшIэным афэгъэхьыгъэ фэгъэкIотэнэу яIэхэм ащагъэгъозагъэх. Зыгъэпсэфыгъо лъэхъаным кIэлэеджакIохэм ыкIи студентхэм Iоф ашIэн амал зэряIэр къафаIотагъ.— IофышIэхэм якъыхэхынкIэ гупчэхэм ащылажьэхэрэр къэзэрэугъоигъэхэм гущыIэгъу афэхъугъэх, IофшIапIэм Iухьанэу фаехэм ятхылъхэр зэрагъэхьазырыщтхэр, нахь анаIэ къатырадзэным пае ахэр зэрагъэпсыщтхэр къафаIотагъ, сайтэу «Работа России» зыфиIорэм зэрэхэхьащтхэр ыкIи ар зэрэбгъэфедэщтыр арагъэшIагъ, джащ фэдэу сэнэхьат зэфэшъхьафхэмкIэ яшIэныгъэхэм ахагъэхъон зэралъэкIыщтым щагъэгъозагъэх, — къыщаIуагъ цIыфхэм IофшIапIэ ягъэгъотыгъэнымкIэ Адыгэ республикэ гупчэм.Ащ нэмыкIэу, шъолъыр проектэу «Управление рынком труда» зыфиIорэр Гупчэм щызэшIуахы. Ащ къыдыхэлъытагъэу мы илъэсым сомэ миллиони 154-рэ къафатIупщыщт. АщкIэ цIыфхэм IофшIапIэ ягъэгъотыгъэнымкIэ гупчэхэм гъэцэкIэжьынхэр арашIылIэщтых, ищыкIэгъэ Iэмэ-псымэхэр ачIагъэуцощтых, зэфэдэхэу агъэпсыщтых.