ансамблэм ихъарзынэщ
Мэлылъфэгъум и 17-м къалэу Казань я XIII-рэ зэнэкъокъу-фестивалэу «Этномириада» зыфиIорэр щызэхащагъ.
Ар лъэпкъ зэфэшъхьафхэм яхудожественнэ творчествэ, якультурэ къызщагъэлъэгъорэ Iофтхьабз. Мыгъэ Урысыем икъэлэ зэфэшъхьафхэм къарыкIыгъэ цIыф лъэпкъыбэ ащ хэлэжьагъ.«Этномириадэр» илъэс къэс Казань щызэхащэ. Лъэпкъ культурэхэм якъэухъумэн, лIэшIэгъухэм ахащыхэзэ ахэм хахъо арагъэшIэу ахэлъынхэр ары пшъэрылъ шъхьаIэу Iофтхьабзэм иIэр. КультурэмкIэ Казанскэ къэралыгъо институтыр ары ащ кIэщакIо фэхъугъэр.Мыгъэ «Этномириада-2026-рэ» зыфиIорэм Адыгэ къэралыгъо университетым икъэшъокIо ансамблэу «Нартыр» хэлэжьагъ ыкIи илауреат хъугъэ, апэрэ шъуашэ зиIэ диплом къыфагъэшъошагъ.Ансамблэм ипащэу Шагудж Казбек зэнэкъокъум пылъ хабзэхэм тащигъэгъозагъ.
— Фестивалыр уцугъуитIоу кIуагъэ. ШIоигъоныгъэ зиIэхэу лъэIу тхылъ зытыгъэхэр зэкIэ хэлэжьэнхэ амал яIагъ. Апэрэр пэIудзыгъэ шIыкIэм тетэу кIуагъэ, видеотехыгъэхэмкIэ анахь дэгъухэр агъэнэфагъэх. Ахэр нэужым ятIонэрэм хэлэжьагъэх. Анахь дэгъухэм ащыщ тыхъуи, тыхэлэжьэнэу тинасып къыхьыгъ. Зэнэкъокъур лъэныкъуитфэу зэхэтыгъ. «Фольклорнэ лъэпкъ къашъу» зыфиIорэр ары тэ тызхэлэжьагъэр. Зэнэкъокъум шапхъэу пылъыгъэмэ ащыщыгъ къэгъэлъэгъоныр такъикъиплIым нахь мыбэнэу, джащ фэдэу фольклорнэ материалыр шъыпкъэныгъэ хэлъэу къашъом къыщытыгъэныр, шъуашэм идэхагъи, къэшъуакIохэм ясэнаущыгъи уасэ афашIыгъ. Шапхъэхэр зэкIэ тикъэгъэлъэгъон къыщыдэтлъытагъэх ыкIи осэ ин къытфашIыгъ. Къыхэзгъэщы сшIоигъу мы илъэсыр лъэпкъхэм языкIыныгъэ и Илъэсэу Урысыем зэрэщагъэнэфагъэм Iофтхьабзэр зэрэрапхыгъэр. Искусствэм, культурэм цIыфхэр, лъэпкъхэр зэфещэх, зэрепхых, — къыIуагъ Казбек.Ансамблэм хэтхэм къашъомкIэ сэнаущыгъэ ин ахэлъ. НыбжьыкIэхэм аIэ зэкIэдзагъэу зэнэкъокъум зыфагъэхьазырыгъ. Ахэм ащыщых Мыекъопэ къэралыгъо гуманитар-техническэ колледжым щеджэхэрэ Шэуджэн Руслъанрэ Нэгъой Маратрэ, агу рихьэу ансамблэм кIалэхэр къыщэшъох.— Лъэшэу тыгумэкIыгъ, тиамал къызэрихьэу къашъор къэтшIыгъ. НэмыкIхэм къагъэлъэгъуагъэхэри тыгу рихьыхэу тяплъыгъ. Купыбэ зэрэхэлэжьагъэм ыкIи ахэм къэшъо дахэхэр къызэрашIыгъэм къыхэкIыкIэ зэнэкъокъум кIэухэу фэхъущтыр тымышIэу тежагъ. Тиреспубликэ, тиеджапIэ, тиансамблэ дахэкIэ къахэщынэу лъэшэу тыфэягъ ыкIи ар къыддэхъугъ. Хахъо тиIэу къызэрэдгъэзэжьыгъэм тырэгушхо, — къыIуагъ Шэуджэн Руслъан.Джащ фэдэ гушIуагъом зэлъиIыгъ Нэгъой Марати:— Зэнэкъокъур лъэшэу сыгу рихьыгъ. Мыщ фэдэ Iофтхьабзэм апэрэу сыхэлажьэ. Тикультурэ идэхагъэ къэзыгъэлъэгъорэ къашъоу къэтшIыгъэр зэкIэми агу рихьыгъ. НэмыкI къэралыгъохэм къарыкIыгъэхэм ялъэпкъ къашъохэми тшIогъэшIэгъонэу тяплъыгъ. Хэлэжьагъэр бэдэд, зэкIэми дэгъоу зыкъагъэлъэгъуагъ, лъэпкъ пстэури дахэ, зэрыгушхон хэти иI. ГъэхъэгъэшIухэр тиIэу, нэIосакIэхэр къэтшIыгъэхэу къэдгъэзэжьыгъ. ЫпэкIи мыщ фэдэ Iофтхьабзэхэм тахэлэжьэнэу тыфай.
Делэкъо Анет.