Обществэу «ШIэныгъ»
Урысые обществэу «ШIэныгъэм» проектэу «ШIэныгъ. ГъэсакIохэр» зыфиIорэр зэрэрагъэжьагъэм фэгъэхьыгъэу макъэ къегъэIу.
Пшъэрылъ шъхьаIэу иIэр гъэсэныгъэ организациехэм Iоф ащызышIэрэ гъэсакIохэм шIуагъэу къахьырэм уасэ фэшIыгъэныр, анахь дэгъоу зипшъэрылъ зыгъэцакIэхэрэр гъэунэфыгъэнхэр ары.— Цифрэ лъэхъаным тыщэпсэу, сыд фэдэ къэбари дунэе хъытыум ибгъотэн плъэкIыщт. Ау сыд фэдэрэ программи фэдэ хъущтэп цIыфым иIэпэIэсэныгъэ. ЦIыфыр ары гъэсакIо хъун зылъэкIыщтыр. Ар къыдэтлъытэзэ, УФ-м просвещениемкIэ и Министерствэ ыкIи Урысые кIэлэцIыкIу гупчэр тиIэпыIэгъоу проектыр щыIэныгъэм щыпхырытэщы. Ащ ишIуагъэкIэ гъэсакIохэм зыкъагъэлъэгъон, яIэпэIэсэныгъэкIэ зэхъожьынхэ ыкIи джырэ шэпхъакIэхэм япхыгъэ шIэныгъэхэр зэрагъэгъотынхэ алъэкIыщт, — къыIуагъ Урысые обществэу «ШIэныгъэм» игенеральнэ пащэу Максим Древаль.Проектэу «ШIэныгъ.ГъэсакIохэр» зыфиIорэр лъэныкъуитIоу гощыгъэщт: «Гъэсэныгъэ организацием игъэсэкIо анахь дэгъу» ыкIи «Гурыт сэнэхьат гъэсэныгъэм игъэсэкIо анахь дэгъу». Проектым гъэсэныгъэ организациехэм япащэхэр, ахэм ягуадзэхэр, кIэлэегъаджэхэр, кIэлэцIыкIу общественнэ объединениехэм Iоф адэшIэгъэнымкIэ пащэм иупчIэжьэгъухэр хэлэжьэнхэ алъэкIыщт.ШIоигъоныгъэ зиIэхэм ятхылъхэр мэкъуогъум и 30-м нэс проектым исайт рагъэхьан фае. Ар уцугъо пчъагъэу зэтеутыгъэщт. Апэрэм платформэу «ШIэныгъ. Академия» зыфиIорэм пэIудзыгъэ егъэджэн ащыфызэхащэщт. Гъэхъагъэу яIэхэр къызыщагъэлъэгъощт портфолио ашIыщт. Нэужым хъугъэ-шIэгъэ зэфэшъхьафхэм хэкIыпIэу къафагъотыщтыр къызыщагъэлъэгъощт практическэ IофшIэн къашIыщт.Iофтхьабзэм икIэух хэгъэгум игъэсэкIо анахь дэгъухэр къагъэнэфэщтых. ТекIоныгъэ къыдэзыхыгъэхэм ахъщэ шIухьафтынхэр афагъэшъошэщтых. ШIэныгъэмкIэ Гупчэу «Машук» зыфиIорэм щыкIощт гъэсэныгъэ программэм анахь дэгъоу зыкъэзыгъэлъэгъогъэ нэбгырэ 200-р хэлэжьэщтых.
Делэкъо Анет.