М. Гордышов
ТекIоныгъэм и Мафэ ихэгъэунэфыкIын зыщыкIощт лъэхъаным терроризмэм ылъэныкъокIэ щынагъо къэмыхъуным, лъэныкъо зэфэшъхьафхэм къахиубытэрэ псэуалъэхэр ухъумэгъэнхэм яIофыгъохэр ары АР-м терроризмэм пэшIуекIогъэнымкIэ и Комиссие изэхэсыгъо зыщатегущыIагъэхэр. Адыгеим и ЛIышъхьэу КъумпIыл Мурат Iофтхьабзэр зэрищагъ.
Зэхэсыгъом иIофшIэн хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Къэралыгъо Советым – Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, хэбзэухъумэкIо къулыкъухэм япащэхэр, АР-м иминистрэхэм я Кабинет хэтхэр, муниципалитетхэм япащэхэр.АР-м хэгъэгу кIоцI IофхэмкIэ и Министерствэ цIыфхэм ярэхьатныгъэ къэухъумэгъэнымкIэ иполицие ипащэ игуадзэу Андрей Федосеевым, Росгвардием АР-мкIэ и ГъэIорышIапIэ ипащэу Дмитрий Зима, къалэу Мыекъуапэ имэрэу Геннадий Митрофановым къаIуагъэхэм ядэIугъэх.
КъызэрэхагъэщыгъэмкIэ, Хэгъэгу зэошхом ТекIоныгъэр къызщыдахыгъэм ия 81-рэ илъэс фэгъэхьыгъэ мэфэкI Iофтхьабзэхэм языфэгъэхьазырынрэ язэхэщэнрэ зыщыкIощтхэм хэгъэгу кIоцI IофхэмкIэ Министерствэм ипащэхэм чэщи, мафи дежурствэр ахьыщт, следствие-оперативнэ купхэмрэ полицием инарядхэмрэ япшъэрылъхэр джыри нахь агъэлъэшыщтых. Мы Iофым епхыгъэу язэгъусэныгъэ нахь агъэпытэщт АР-м хэгъэгу кIоцI IофхэмкIэ и Министерствэ, Урысыем щынэгъончъэнымкIэ и Федеральнэ къулыкъу и ГъэIорышапIэу Адыгэ Республикэм щыIэм, Урысыем ошIэ-дэмышIэ IофхэмкIэ и Министерствэ и Къэралыгъо гъэIорышIапIэ икъутамэу АР-м щыIэм, Росгвардием Адыгэ РеспубликэмкIэ и ГъэIорышIапIэ ыкIи нэмыкIхэм. МэфэкI Iофтхьэбзэ шъхьаIэхэр къалэу Мыекъуапэ жъоныгъуакIэм и 8-м къыщегъэжьагъэу и 9-м нэс щыкIощтых. Ахэр: республикэ филармониер, Гупчэ мемориалэу «Фэхыгъэхэм яшIэжь фэгъэхьыгъ», Лениным ыцIэкIэ щыт Гупчэр, урамэу Краснооктябрьскэр, къэлэ паркыр, ТекIоныгъэм и Бульвар. ЦIыфхэр жъугъэу зыщызэIукIэщтхэм ядэхьапIэхэм уплъэкIун Iофхэм япхыгъэу чIыпIэхэр ащызэхащэщтых.«Общественнэ транспортым зэпыу имыIэу, щынэгъончъэу иIофшIэн зэхэщэгъэн фае. Анахьэу анаIэ зытырагъэтын фаехэм ащыщых шъон пытэхэр ямыгъэщэгъэнхэр, мэфэкI Iофтхьабзэхэр зыщыкIорэ чIыпIэхэм зэрызекIохэрэ мобильнэ амалхэр ащамыгъэфедэнхэр. ЦIыфхэм якъэухъумэн фэгъэзэгъэ къулыкъухэм унэе къэрэгъулэ предприятиехэм, народнэ дружинэхэм ыкIи ныбжьыкIэхэр зыхэхьэрэ купхэм шIуагъэ хэлъэу язэдэлэжьэныгъэ зэхащэн фае», — къыIуагъ КъумпIыл Мурат.Терроризмэм пэшIуекIогъэнымкIэ Комиссием дэжь щызэхэщэгъэ IофышIэ купхэм зэшIуахыщтхэм афэгъэхьыгъэу къэгущыIагъэх АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр. А терроризмэм пэшIуекIогъэнымкIэ Комиссием ипащэу ЛIые Азэмат инфраструктурэ ыкIи стратегическэ псэуалъэхэр цIыф зэрымыс пкъыгъохэу быбыхэрэм ащыухъумэгъэнхэм ылъэныкъокIэ Iофхэм язытет зыфэдэм къытегущыIагъ.Гъэсэныгъэм къыхиубытэрэ организацие пстэуми щынэгъончъэнымкIэ, макъэ къэзыгъэIурэ пкъыгъохэмкIэ япаспортхэм язытет IофшIэным тегъэпсыхьагъэу щыт. Ау Мыекъуапэрэ Шэуджэн районымрэ яучреждение заулэмэ щыкIагъэхэр а лъэныкъомкIэ афалъэгъугъэх, ахэр дэгъэзыжьыгъэ зэрэхъущтхэмкIхэ тхылъ гъэнэфагъэхэри афызэхагъэуцуагъэх.АР-м псэолъэшIынымкIэ и Министерствэ иIофышIэ куп зэхищэгъэ уплъэкIуным фэхъугъэ кIэуххэм атегъэпсыхьагъэу Мыекъуапэ иавтовокзалрэ имэшIокугъогу вокзалрэ терроризмэм щыухъумэгъэнхэмкIэ Iофтхьэбзэ тедзэхэр зэрахьан зэрэфаем епхыгъэ тхылъхэр къафагъэхьыгъэх.Республикэм и ЛIышъхьэ Комиссием иунашъохэр гъэцэкIагъэ хъунхэм пае уплъэкIун тедзэхэр зэхэщэгъэнхэ фаеу зэрэхъущтым анаIэ тыраригъэдзагъ.Зэхэсыгъом икIэуххэр зэфихьысыжьхэзэ республикэм и ЛIышъхьэ агу къыгъэкIыжьыгъ хэбзэухъумэкIо, гъэцэкIэкIо хэбзэ къулыкъухэмрэ обществэм икуп гъэнэфагъэхэу мы Iофым ыгъэгумэкIыхэрэмрэ зэгъусэхэу цIыфхэм ящынэгъончъагъэкIэ ищыкIэгъэ IофшIэныр агъэцэкIэн зэрэфаер. КъумпIыл Мурат къызэрэхигъэщыгъэмкIэ, хэушъхьафыкIыгъэ дзэ операцием илъэхъан лъэныкъо зэфэшъхьафхэмкIэ щынагъохэр къыкъокIынхэ зэрилъэкIыщтым къыпкъырыкIыхэзэ, цIыфхэр жъугъэу зыхэлэжьэхэрэ Iофтхьабзэхэр зыщызэхащэрэ чIыпIэхэм нахь ащысакъынхэ фае.АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.