Гъогу щынэгъончъэныр

Гъогухэр щынэгъончъэнхэмкIэ АР-м и Комиссие зэхэсыгъоу иIагъэм 2026-рэ илъэсым иапэрэ квартал респуб­ликэм игъогухэм тхьамыкIэгъо пчъагъэу къатехъухьагъэм, гъогурыкIонымкIэ шапхъэ­хэр къыдэлъытэгъэнхэ зэ­рэфаем, кIэлэцIыкIухэм гъогухэм къатехъухьэрэ тхьамыкIагъохэм шъобж ахамыхынымкIэ шIэгъэн фаехэм щатегущыIагъэх. Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Iофтхьабзэр зэрищагъ АР-м иминистрэхэм я Кабинет и Тхьаматэу КIэрэщэ Анзаур.

АР-м хэгъэгу кIоцI IофхэмкIэ и Министерствэ Къэралыгъо автоинспекциемкIэ и ГъэIорышIапIэ ипащэ ипшъэрылъхэр пIалъэкIэ зыгъэцэкIэрэ Тхьаркъохъо Юсыф гъогурыкIонымкIэ шапхъэхэр къы­зэ­рэдалъытэрэм фэгъэхьыгъэ зэфэхьысыжь зэхэсыгъом къыщишIыгъ. Къэралыгъо автоинспекцием къызэритыгъэмкIэ, 2026-рэ илъэсым иапэрэ квартал респуб­ликэм игъогухэм тхьамыкIэгъо 71-рэ къатехъухьагъ, нэбгырэ 14 ахэм ахэкIодагъ, нэбгырэ 75-мэ шъобжхэр атещагъэ хъугъэ. ТхьамыкIагъохэм 11-кIэ къакIи­чыгъ, нэбгырэ 28-кIэ ауIагъэхэр нахь макIэ хъугъэх. Тэхъутэмыкъое, Теуцожь, Кощ­хьэблэ, Мыекъопэ районхэм ягъогухэм къатехъухьэгъэ тхьамыкIагъохэм ахэкIодагъэхэм ахэхъуагъ.Къулыкъу зэфэшъхьафхэр игъусэхэу гъогухэм Iофхэр зыпкъ ащигъэуцожьыгъэнхэмкIэ Iофтхьэбзэ гъэнэфагъэхэр полицием зэрехьэх. Шъолъыр проектхэр пхырызыщырэ проект офисым федеральнэ, шъолъыр, муниципальнэ, чIыпIэ мэ­хьанэ зиIэ гъогухэм ящынэгъончъагъэ зыкъегъэIэтыгъэным тегъэпсыхьэгъэ Iоф­тхьэбзэ тедзэхэу ащызэрахьащтхэмкIэ гъогу картэ къыхихыгъ ыкIи ыухэсыгъ. Тхылъ зымыIыгъэу транспортыр зыгъэIорышIэхэрэм якъыхэгъэщын нахь агъэлъэ­шыгъ. 2026-рэ илъэсым иапэрэ квартал тхылъ зымыIыгъэу транспорт зыгъэIорышIэщтыгъэхэм фэди 1,5-кIэ ахэхъуагъ. Ащ фэдэ нэбгырэ 323-мэ гъогурыкIонымкIэ шапхъэхэр аукъуагъэх. Ешъуагъэхэу рулым ятIонэрэу кIэрысхэу нэбгырэ 26-рэ къыхагъэщыгъ.ГъэIорышIапIэм ипащэ ипшъэрылъхэр зыгъэцакIэрэм къызэриIуагъэмкIэ, кIэлэ­цIыкIухэр зыхэфэгъэ тхьамыкIэгъуи 9 гъогухэм къатехъухьагъ. Ахэм зы сабый ахэкIодагъ, 10-мэ шъобжхэр атещагъэ хъугъэ.КIэрэщэ Анзаур АР-м гъэсэныгъэмрэ шIэныгъэмрэкIэ и Министерствэ, муниципалитетхэм япащэхэм пшъэрылъ афи­шIыгъ зыныбжь имыкъугъэхэмрэ ны-ты­хэм­рэ пэшIорыгъэшъ Iофтхьабзэу адызэ­рахьэхэрэр нахь агъэлъэшынэу, автоеджа­пIэхэм зэращагъасэхэрэр ауплъэкIунэу.Мыекъуапэ изыгъэпсэфыпIэ чIыпIэхэм электросамокатхэр ащамыгъэфедэнхэу пшъэрылъ афашIыгъ.АР-м гъэсэныгъэмрэ шIэныгъэмрэкIэ иминистрэу Евгений Лебедевыр гъогу­хэм атехъухьэрэ хъугъэ-шIагъэхэм кIэлэцIыкIухэр ахэмыфэнхэмкIэ пэшIорыгъэшъ Iофтхьабзэу зэрахьэхэрэм къатегущы­Iагъ.2026-рэ илъэсым иапэрэ квартал гъогу­хэм тхьамыкIагъоу къатехъухьэрэм къыкIегъэчыгъэным тегъэпсыхьагъэу кIэлэегъэджэ 446-рэ IэпэIэсэныгъэм зыщыхагъэхъорэ Адыгэ республикэ инсти­тутым щырагъэджагъэх. Гъогухэм атехъу­хьэрэ тхьамыкIагъохэм кIэлэцIыкIухэр ахэмыфэнхэмкIэ шъолъыр Гупчэу «Щынэгъончъагъэм илабораторие» зыфиIорэм Iоф ешIэ. ГъогурыкIонымкIэ инспектор ныбжьыкIэхэм ядвижение республикэм щыщ кIэлэцIыкIу мини 2-м ехъу хэлажьэ.ГъогурыкIонымкIэ шапхъэхэр зэра­укъуа­гъэхэр стационар комплекс 209-мэ, мобильнэ комплексэу «Тайфун» зыфи­Iорэм фэди 2-мэ, транспортыр зэращэчырэ автоматическэ пункти 8-мэ къагъэлъэгъуагъ. Лъэпкъ проектэу «ЩыIэны­гъэм пае инфраструктурэр» зыфиIорэм диштэу 2025-рэ илъэсым камерэ 32-рэ агъэ­уцугъ, Красногвардейскэ, Кощхьэблэ районхэм транспортыр зэращэчырэ автоматическэ пункти 2 ащагъэпсыгъ.2025-рэ илъэсым камерэхэмрэ нэ­мыкI видеохэмрэ къагъэлъэгъуагъэхэм атетэу сомэ миллиарди 2,148-рэ зытефэрэ хэукъоныгъэхэр зэрашIыгъэхэм афэгъэ­хьыгъэу унэшъо миллиони 2,5-м ехъу аштагъ. Транспортыр зэращэчырэ автоматическэ пунктхэм зэрагъэунэфыгъэм тетэу сомэ миллион 203-рэ зытефэрэ административнэ хэбзэукъоныгъэхэр зэрашIыгъэхэм фэгъэхьыгъэу унэшъо 467-рэ ашIыгъ.2026-рэ илъэсым республикэм иавтомобиль гъогухэм тхьамыкIагъоу атехъухьэ­хэрэр къэзыгъэлъэгъощт комплекс 31-рэ джыри агъэуцунэу, гъогу картэу Адыгэ Республикэм иминистрэхэм я Кабинет ыухэсыгъэм диштэу комплекси 7-р тхьамы­кIагъохэр къызыщыхъункIэ анахь щынэ­гъопIэ чIыпIэхэм ахьынхэу рахъухьэ.Зэхэсыгъом икIэух автомобиль транспорткIэ цIыфхэр зэращэхэ зыхъукIэ, гъогурыкIонымкIэ шапхъэхэр къыдэлъы­тэгъэнхэм фэгъэхьыгъэу Къэралыгъо автонадзорым АР-мкIэ ичIыпIэ отдел ипащэу Чэтыжъ Азэмат къыIуагъэм едэIугъэх.2025-рэ илъэсым Ространснадзорым Къыблэ федеральнэ шъолъырымкIэ ичIыпIэ гъэIорышIапIэ иIофышIэхэм цIыфхэр зэрэзэращэхэрэм иуплъэкIункIэ Iофтхьэбзэ 36-рэ Адыгеим щызэхащагъ. Автобуси 139-рэ зауплъэкIум, 101-мэ хэукъоныгъэхэр ашIыгъэу, 190-мэ — траспортымкIэ хэбзэгъэуцугъэр аукъуагъэу къы­хагъэщыгъ.2026-рэ илъэсым иапэрэ квартал чIыпIэ отделым иинспекторхэм пассажир транспортым иуплъэкIункIэ Iофтхьэбзи 8 зэхащагъ. Хэбзэгъэуцугъэу щыIэр автобус 29-мэ яводительмэ аукъуагъэу къыхагъэщыгъ.