Гум имыкIыжьын лыузэу къэнагъ

Чернобыль атомнэ электростанцием къыщыхъугъэ тхьамыкIагъом идэгъэзэжьын хэлэжьагъэхэм ясаугъэтэу Мыекъуапэ дэтым зэхахьэ щыкIуагъ.

Ащ хэлэжьагъэх АР-м иминистрэхэм я Кабинет хэтхэр, къэралыгъо хабзэм икъулыкъухэм, общественнэ организациехэм ялIыкIохэр, депутатхэр, тхьамыкIагъохэм ядэгъэзыжьын хэлэжьагъэхэр, ахэм яIахьылхэр, ныбжьыкIэхэр, кIэлэеджакIохэр.1986-рэ илъэсым Чернобыль атомнэ электростанцием ия 4-рэ блок иреактор къызэом, радиацием зиушъомбгъоу ригъэжьагъ, псэупIэ 263-мэ тхьамыкIагъор къашъхьарыуцуагъ, нэбгырэ миллиони 3 фэдизмэ япсауныгъэ зэщигъэ­къуагъ. Зэрэдунаеу фэдэ къыщымы­хъугъэ ядернэ тхьамыкIагъом икIэуххэм ядэгъэ­зыжьын цIыфыбэ хэлэжьагъ, ау анахьэу ыкIуачIэ зэхэлъэу пэуцужьыгъэ­хэм Советскэ Дзэр ащыщ.

АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт ипсалъэ къызэрэщыхи­гъэщыгъэмкIэ, лIыхъужъ-дэгъэзэжьа­кIохэм Адыгеим икIыгъэ нэбгырэ 800 фэдиз ахэтыгъ. Амылъэгъурэ пыим пэуцужьыгъэхэм ащыщыбэ непэ къытхэтыжьхэп.— Адыгеим и ЛIышъхьэу КъумпIыл Мурат ыцIэкIи, сэ сшъхьэ­кIи радиацием идэгъэзыжьын хэлэжьагъэхэу щымыIэжьхэм шъхьащэ афэтэшIы, псаоу къэнагъэхэми лъытэныгъэ зэрафэтшIырэр ятэIо. Ахэм лIыгъэу зэрахьагъэр тщыгъупшэщтэп. Мы купым хахьэхэрэм социальнэ ыкIи медицинэ IэпыIэгъу ягъэгъотыгъэным сыдигъуи къэралыгъом ынаIэ тырегъэты, — хигъэунэфыкIыгъ Долэ Долэт.Сэкъатныгъэ зиIэхэм я Адыгэ республикэ организациеу «Союзэу «Чернобыль» зыфиIорэм ипащэу Едыдж Юрэ къэзэрэугъоигъэхэм закъыфигъэзагъ.— Илъэс 40 тешIэжьыгъ нахь мышIэми, дэгъэзажьакIохэм лIыгъэу зэрахьа­гъэр тщыгъупшэрэп. Непэ псаоу къэнэгъэ нэбгырэ 300-м ехъумэ ягумэкIыгъохэр хэбзэ къулы­къухэм зэхахы, зэрифэшъуашэу анаIэ къатет, къэралыгъо тынхэр къафагъэшъошагъэх. АР-м и ЛIышъхьэу КъумпIыл Мурат ишIуагъэкIэ юбилейнэ бгъэхалъхьэхэр дгъэхьазырынхэ тлъэкIыгъ, игъорыгъозэ ахэр джы афэтэгощых, — къыIуагъ ащ.Зэхахьэм икIэух зидунай зыхъожьыгъэхэм яшIэжь агъэлъапIэзэ къэзэрэугъоигъэхэр зы такъикърэ афэшъыгъуагъэх, саугъэтым къэгъагъэхэр кIэралъхьагъэх.Iэшъынэ Сусан.