Мы илъэсым апэрэу Адыгеим щызэхащэщт шхыныгъохэмкIэ фестивалэу «Зэкъошныгъэм иджэныкъу» зыфиIорэр. Урысыем щыпсэурэ цIыф лъэпкъхэм языкIыныгъэ и Илъэс ар фэгъэхьыгъ. Фестивалыр жъоныгъуакIэм и 30-м Адыгэкъалэ щагъэкIэжьыгъэ парк шъолъырым щыкIощт.
«Ар зэхатщэзэ тшIынэу итэхъухьэ, ежь чIыпIэр анахь Iофтхьэбзэ гъэшIэгъонхэр зыщызэхатщэхэрэ, зекIоным зегъэушъомбгъугъэным ягупчэу тшIыщт. ТапэкIэ ащ фэдэ пшъэрылъ зыфэтшIыжьыгъагъ адыгэ къуаем ифестиваль игъэкIотыгъэ илъэс къэс нахь зызэриушъомбгъурэм ыкIи хьакIэу къекIуалIэрэр нахьыбэ зэрэхъурэм такъыпкъырыкIызэ. Шхыныгъохэм япхыгъэ мэфэкIхэм анаIэ лъэшэу зэратырадзэрэр тэлъэгъу, ащ пае унашъо тшIыгъэ ренэу ащ фэдэ Iофтхьабзэхэр зыщызэхэтщэщтхэ чIыпIэ дгъэнэфэнэу – гъунэгъу районхэм ащыпсэухэрэм ыкIи Краснодар къикIыщт хьакIэхэм Iэрыфэгъу ар афэхъущт. Тигуапэу зэкIэхэри етэгъэблагъэх! Джы программэм чанэу тыдэлажьэ, ау гъэнэфагъэу къэтIон тлъэкIыщтыр мэфэкI игъэкIотыгъэу ыкIи IэшIоу ар зэрэхъущтыр ары. ЦIыф лъэпкъыбэмэ ялIыкIохэр зыщыпсэухэрэ тиреспубликэ исхэм ялъэпкъ шхыныгъохэми хьакIэхэр ахэIэн алъэкIыщт.Адыгеим имуниципалитет пстэуми, джащ фэдэу Краснодар краим, Къэрэщэе-Черкесым ыкIи Луганскэ Народнэ Республикэм ячIыпIэ гъэнэфагъэхэми Iоф ашIэщт. Анахьэу тынаIэ зытедгъэтыщтыр тишхыныгъо цIэрыIоу адыгэ къуаем ыубытыщт чIыпIэр ары. Къоджэ теплъэ зиIэ чIыпIэу зэтедгъэпсыхьащтым къуаем иIэшIугъэрэ идэгъугъэрэ ауплъэкIунэу амал щаряIэщт. КIэлэцIыкIухэм апаи программэ гъэнэфагъэ дгъэхьазырыщт, джэгукIэ зэфэшъхьафхэр, псэушъхьэ цIыкIухэм якъэгъэлъэгъонхэр зэхэтщэщтых. «Шыу Хасэм» ишIуагъэкIэ къэбэртэе шы лъэпкъ цIэрыIохэм кIэлэцIыкIухэр яшэсынхэ ыкIи шыу шъыпкъэу закъыщыхъужьын алъэкIыщт», — къыхигъэщыгъ КъумпIыл Мурат.Республикэм иартист ыкIи итворческэ куп гъэнэфагъэхэр хэлажьэхэзэ, хьакIэхэр культурнэ программэм рагъэплъыщтых. Ащ нэмыкIэу зэнэкъокъухэр, мастер-классхэр, ермэлыкъхэр зэхащэщтых. Лъэпкъ IэшIагъэхэмкIэ IэпэIасэхэм къагъэхьазырыгъэ пкъыгъохэри арагъэлъэгъущтых.«Зэхэщэн Iофхэм тэрэзэу ягупшысэнхэу пшъэрылъ афэсшIыгъ, ащ хэхьэх щынэгъончъэу фестивалыр рекIокIыныр, транспортыр Iэрыфэгъуныр, санитарием ылъэныкъокIэ ищыкIэгъэ чIыпIэхэр къыдэлъытэгъэнхэр, транспорт уцупIэхэри гъэнэфэгъэнхэр. Фестивалыр анахь лъэгэпIэ иным диштэу зэхэщэгъэным мэхьанэшхо иI, хьакIэхэмкIи гуIэтыпIэу, гъэшIэгъонэу, IэшIоу ар кIоным пае. Тэ пшъэрылъэу тиIэр хьакIэхэм дэгъоу тапэгъокIыныр, Адыгеим щыпсэурэ цIыф лъэпкъ зэфэшъхьафхэм яунэгъо зэгурыIожь ин ежьыри изы Iахьэу зэрэщытыр нэбгырэ пэпчъ зэхишIэным пае. Джыри зэ Адыгэкъалэ жъоныгъуакIэм и 30-м зэкIэхэми шъуесэгъэблагъэ а мафэр тызэгъусэу тизэкъошныгъэрэ тизыкIыныгъэрэ къыхэщэу IэшIоу дгъэкIоным пае!» — къыIуагъ Адыгеим и ЛIышъхьэ.