Теннис цIыкIумкIэ пшъашъэхэм азыфагу зэIухыгъэ республикэ зэнэкъокъу Адыгэкъалэ щызэхащагъ. Гъэсэныгъэм ыкIи спортым гъэхъэгъэшIухэр ащызышIыгъэ Жэнэ Аслъан ишIухьафтынхэр зэрылъ турнирым спортсменкэ 31-рэ хэлэжьагъ. Ахэр Мыекъуапэ, Адыгэкъалэ, Тэхъутэмыкъое ыкIи Теуцожь районхэм ялIыкIох.
АнахьыкIэхэм якуп (2015-рэ илъэсым къэхъугъэхэр ыкIи нахьыкIэхэр) нэбгырэ 11 хэтыгъ. Мыекъуапэ къэзыгъэлъэгъогъэ Бзаго Даринэ текIоныгъэ къыдихыгъ. ПсэупIэу Яблоновскэм щыщ Алиса Керченскаям ятIонэрэ чIыпIэр фагъэшъошагъ, ящэнэрэр зэдагощыгъ Адыгэкъалэ илIыкIоу Козинэ Самирэрэ къуаджэу Пэнэхэс щыпсэурэ Суанда Абадзе — рэ.Гурыт купым (2011 — 2014-рэ илъэсхэм къэхъугъэхэр) нэбгырэ 14-м зыщаушэтыгъ. Республикэм икъэлэ шъхьаIэ щыщ София Рычковам пэрытныгъэр ыубытыгъ, Блэгъожъ Динарэ (къуаджэу Нэшъукъуай) тыжьын медаль къыхьыгъ, ящэнэрэ чIыпIэр зэдагощыгъ КIыкI Оксанэрэ (Нэшъукъуай) Хьагъур Джамиллэрэ (Пэнэхэс).
Анахьыжъхэм якуп (2026-рэ илъэсымкIэ Адыгеим ихэшыпыкIыгъэ команд) хэтыгъэхэм ешIэкIэ дахэ къагъэлъэгъуагъ. ЧIыпIэ спортсменкэу СтIашъу Дэнэф текIоныгъэр къыдихыгъ. Мыекъуапэ щыщ Арина Петровскаям тыжьын медаль къыфагъэшъошагъ, ящэнэрэ чIыпIэр зэдагощыгъ Елизавета Львовамрэ (Яблоновскэр) Блэгъожъ Данэрэ (Нэшъукъуай).ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм дипломхэр, медальхэр ыкIи кубокхэр афагъэшъошагъэх. ХэушъхьафыкIыгъэ шIухьафтынхэмкIэ къыхагъэщыгъэх чемпионкэхэм ятренерхэр: Ешыгоо Мухътар, Бзаго Рустам ыкIи Армен Мкртчян. Джащ фэдэу турнирым иешIэкIо анахь дэгъоу къыхахыгъэх Бзаго Даринэ, СтIашъу Дэнэф, Блэгъожъ Дианэ, Елизавета Львовар ыкIи Джанхъот Мадинэ. Спортсменкэхэм къафэгушIуагъэх Iофтхьабзэм ихьэкIэ лъапIэхэмрэ изэхэщакIохэмрэ. Ахэм ащыщых Жэнэ Аслъанрэ Европэм ичемпионкэу, СССР-м спортымкIэ имастерэу Соня Аветисянрэ.