«Единэ Россием» ишъолъыр къутам
Дунэе патриотическэ акциеу «ТекIоныгъэм иIорытх» зыфиIорэр Адыгеим щыкIуагъ.
Республикэм ипчэгу 79-мэ а зы уахътэм ар ащырагъэкIокIыгъ. АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель Iорытхыр зэратхыщтым пстэурищигъэгъозагъэх, упчIэхэм джэуапхэр къаритыжьыгъ. Советскэ Союзым имаршалэу Георгий Жуковыр къызыхъугъэр илъэси 130-рэ зэрэхъурэм ыкIи ТекIоныгъэм и Мафэ Iофтхьабзэр афэгъэхьыгъ.Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу, тарихъ шIэжьымкIэ федеральнэ партийнэ проектым шъолъырымкIэ иIофзехьакIоу Цэй Эдуард Iофтхьабзэм хэлажьэхэрэм шIуфэс гущыIэхэмкIэ зафигъэзагъ.— «Единэ Россием» зэхищэрэ Iофтхьабзэр жъоныгъуакIэм и 9-м ихэгъэунэфыкIын изы Iахьэу бэшIагъэу хъугъэ. «Единэ Россием» ишъолъыр къутамэ народнэ программэм диштэу Хэгъэгу зэошхом фэгъэхьыгъэ Iофтхьабзэхэр апэрэ илъэсэп зызэхищэхэрэр. ТекIоныгъэм иIорытх хабзэ хъугъэу зэхэтэщэ, тятэжъ пIашъэхэм лIыгъэу зэрахьагъэр лIэужыкIэхэм ятэгъашIэ, — къыIуагъ Цэй Эдуард.Адыгеим имуниципальнэ гъэIорышIапIэхэм зэкIэми Iорытхыр ащыкIуагъ: гъэсэныгъэм иучреждениехэм, дзэ частьхэм, хэгъэгу кIоцI IофхэмкIэ, ошIэ-дэмышIэ IофхэмкIэ министерствэхэм яшъолъыр къулыкъухэм, Росгвардием, общественнэ IэпыIэгъумкIэ партием иштаб. Iорытхыр зыщатхыгъэ чIыпIэхэмкIэ АР-м и Лъэпкъ музей шъолъыр пчэгу шъхьаIэу хъугъэ. ЗэкIэмкIи Iофтхьабзэм нэбгырэ 4500-рэ хэлэжьагъ.«ЛIыхъужъым фэкIорэ письмэр» зыфиIорэ Iофтхьабзэр Iорытхым хэтэу рагъэкIокIы. Джащ фэдэу, Адыгэ къэралыгъо университетым ишIэныгъэ тхылъеджапIэ апэрэ Iорытхыр щыкIуагъ. Ащ нэбгыришъэ хэлэжьагъ.— Мы Iофтхьабзэм имэхьани, ащ хэлажьэхэрэм япчъагъи, зыщатхырэ чIыпIэхэми ахэхъо. ШIоигъоныгъэ зиIэхэр Iорытхым хэлэжьэнхэ алъэкIыщт. Урысыем ыкIи ащ игъунапкъэхэм аблэкIэу тарихъ шъыпкъэр ащябгъэшIэныр непэрэ мафэм анахь ищыкIэгъэ Iофыгъомэ ащыщ, — къыIуагъ «Единэ Россием» ишъолъыр гъэцэкIэкIо комитет ипащэу АфэшIэгъо Рэмэзан.Iорытхыр къызэрадэхъугъэр мэкъуогъу мазэм зэфахьысыжьыщт. Дэгъоу зытхыгъэхэм щытхъу тхылъхэр, шIухьафтынхэр аратыщтых.Бэрэчэт Дарин.Урысые политическэ партиеу «Единэ Россием» и Адыгэ шъолъыр къутамэ игъэцэкIэкIо комитет ипащэ игуадз.