«Тхьауегъэпсэу, сищыIэныгъэ къызэтебгъэнагъ»

ЩыIэныгъэр зэпхыгъэ IэпыIэ­гъур елбэтэу языгъэгъотырэ ­къулыкъум иIофышIэхэм ямэфэкI непэ хагъэунэфыкIы.

Медицинэ IэпыIэгъу псынкIэм и ­Адыгэ республикэ станцие истаршэ фельдшерэу Людмила Головченкэм а пшъэрылъым пшъэдэкIыжьышхо фыриIэу илъэс 30-м ехъугъ зигъэцакIэрэр. Ащ Iухьанэу зэрэ­хъугъэр, исэнэхьат гухахъоу хигъуатэрэр «Адыгэ макъэм» къыфиIотагъ.Телефоныр зэпымыоу къытео, зы дэкIыгъом ыуж нэмыкIыр къыкIэлъыкIо — джары яIофшIэгъу чэщ-зымафэхэр мыщ зэрэщыкIохэрэр. ЗымышIэрэм ар псынкIэу къышIошIыщт, ау зиIофшIэн шIу зылъэгъоу, гукIэгъуныгъэ зыхэлъыр ары мыщ Iоф щызышIэн зылъэкIыщтыр.Людмила Головченкэм Мыекъопэ медицинэ училищыр къызеухым, къутырэу Грознэм ифельдшер-мамыку IэзапIэ IофшIэныр щыригъажьи, илъэси 6-рэ Iутыгъ. Нэужым яунагъокIэ Мыекъуапэ зыкъагъэзэжьынэу хъугъэ ыкIи бэшIагъэу зыфэегъэ IофшIапIэм Iухьанэу къэкIуагъ.— IэпыIэгъу псынкIэм истанцие сы­Iухьаным илъэс псаурэ сежагъ, чIыпIэ щыIагъэп. Джащ фэдизэу «ушъэгъагъэ» а лъэхъаным. Сыкъызхэфагъэхэр зы бын унэгъошхом фэдэу зэгурыIохэу, зэдеIэжьхэу зэхэтыгъэх. Зыгорэ агу ри­мыхьэу IукIыжьыхэу зыкIи къыхэкIыгъэп, пенсием кIохэмэ е нэмыкI чIыпIэ кощыжьынхэ хъумэ арыгъэ. Джащ фэдизэу ясэнэхьат фэщагъэхэу, IофшIэнэу агъэцакIэрэм пшъэдэкIыжьэу пылъыр къагурыIоу щытыгъ. ГухэкI нахь мышIэми, джы ащ фэдэп, къэкIорэ ныбжьыкIэхэр охътэ гъэнэфагъэ щырахынэу ары зыфаехэр, нахь лэжьэпкIабэ къыз­щагъэхъэщт чIыпIэхэм загъэзэжьы, — къеIуатэ Людмилэ.Зигъусэнэу хъугъэ врачхэу Владимир Власовымрэ Тамара Овчаренкэмрэ шIу­кIэ ыгу къэкIыжьых. IэпэIэсэныгъэшхо зыIэкIэлъ врачхэм лъэгъо тэрэз зэрэтыращагъэр, анахьэу ынаIэ зытыригъэтыщтэу рагъэшIагъэхэм непэ къыз­нэсыгъэми арэгъуазэ.— ДэкIыгъо бригадэм ифельдшерэу езгъэжьэгъагъ. Нэужым кардиобригадэм сыхэтыгъ, «фельдшер N 1 ыкIи N 2» зы­фаIохэрэм фэдэуи Iоф сшIагъэ. Слъэ­гуанджэ фыкъоныгъэ фэхъуи, илъэси 10 хъугъэу линием сыкъытекIыжьыгъ. Диспетчерэу илъэс 13-рэ Iоф сшIагъэ, джы оперативнэ-диспетчер къулыкъум истаршэ фельдшер IэнатIэр илъэси 7 хъугъэу сэгъэцакIэ. Сызфэгъэзагъэр IофышIэхэм яграфик елъытыгъэу сменэм тезгъэхьанхэр ары. Ащ пае къэмынэу цIыфхэр сфимыгъэкъухэ зыхъукIэ е шэмбэт-тхьаумафэхэм дэкIыгъо бригадэм сыхэхьэ, джащ фэдэу диспетчер IэнатIэри дэсэхьы. Къыхэсхыгъэ сэнэхьатыр сфэкъинэу, сырыкIэгъожьэу зы мафи къыхэкIыгъэп, — хигъэунэфыкIыгъ Людмилэ Борис ыпхъум.Сымаджэхэм япсауныгъи, ящыIэныгъи къарыкIощтыр бэкIэ зэлъытыгъэр игъом ыкIи псынкIэу апэрэ медицинэ IэпыIэгъур зэрарагъэгъотырэр ары. ИIоф­шIэн­кIэ анахь шъхьаIэу ащ къыхигъэщыгъэр IэпыIэгъу зищыкIагъэу къытеохэрэр зы­щыпсэухэрэр, ацIэ, алъэкъуацIэхэр тэрэзэу птхынхэр ары. Уахътэм бэ елъытыгъэр. Арышъ, къафытеохэрэр анахьэу зыгъэгумэкIыхэрэм кIэупчIэх, цIыфым илажьэ елъытыгъэу агъэкIощтым дегупшысэх. ГущыIэм пае, гъогум хъугъэ-шIагъэ къыщыхъугъэу къазыфытеохэкIэ, цIэм, лъэкъуацIэм кIэупчIэхэрэп, чIыпIэу зыщыхъугъэр тэрэзэу зэрагъэу­нэфыщтым пылъых.— Илъэс пчъагъэхэм къытфытеохэрэр къызэрэддэгущыIэхэрэ макъэмкIэ ящыкIэгъэ IэпыIэгъур елбэтэу щытын фаемэ нахьыбэрэмкIэ къэтэшIэ. Ахэр ыпэ итэ­гъэшъых, уз гъэтIылъыгъэ зиIэхэри щыд­гъэзыехэрэп. Чэщ-зымафэм гъогогъу 450-м ехъурэ зыкъытфагъазэ, — къы­Iуагъ диспетчерым.Людмилэ Борис ыпхъум иIофшIэн гухахъо хигъуатэу къызыхигъэщырэр зи­щыIэныгъэ къагъэнэжьын алъэкIы­гъэхэр уахътэ тешIэжьыгъэу къакIохэу «тхьауе­гъэпсэу, оры мыхъугъэмэ, псаоу сыкъа­нэщтыгъэп, сищыIэныгъэ къызэтебгъэнагъ» къызыраIокIэ ары.Медицинэ IэпыIэгъу псынкIэ языгъэгъотырэ пстэуми гъэхъагъэхэр ашIыхэзэ ыпэкIэ лъыкIотэнхэу, япшъэрылъхэр дэгъоу зэрагъэцакIэрэм фэшI ямэфэкI мафэ ехъулIэу «тхьашъуегъэпсэу» гъэзетым ыцIэкIэ ятэIо.Iэшъынэ Сусан.