къэлэ администрациер
Урысые муниципальнэ зэIукIэу «Хэгъэгу цIыкIур — Урысыем ыкIуачI» зыфиIоу Москва щыкIуагъэм зыгъэпсэфыпIэ чIыпIэхэм язэтегъэпсыхьанкIэ Мыекъуапэ шIэныгъэу IэкIэлъыр къыщагъэлъэгъуагъ.
Мэзылъэ зыгъэпсэфыпIэу «Мэздахэ» аужырэ шапхъэхэм адиштэрэ зыгъэпсэфыпIэ чIыналъэу зэрагъэпсыгъэр шъолъырым икъэлэ шъхьаIэ ипащэу Геннадий Митрофановым щысэу къафихьыгъ. Къэралыгъом имэзхэм ахахьэщтыгъэ чIыналъэр муниципальнэ зэрашIыжьыгъэр, ащ изэтегъэпсыхьан зэрэрахъухьагъэр, зыгъэпсэфыпIэм ишIынкIэ IофшIэнхэр зэрагощыгъэхэр ыкIи а проектыр Iэрыфэгъу къэлэ щыIакIэр гъэпсыгъэнымкIэ Урысые зэнэкъокъум текIоныгъэ къызэрэщыдихыгъэр ащ къыIотагъ.Шъолъыр къулыкъухэм ыкIи АР-м и ЛIышъхьэу КъумпIыл Мурат иIэпыIэгъу яхьатыркIэ проектыр агъэцэкIэн зэралъэкIыгъэр Геннадий Митрофановым къыхигъэщыгъ. Джащ фэдэу цIыфхэм яшIоигъоныгъэхэр къыдыхалъытэхэзэ чIыналъэхэр зэрэзэтырагъэпсыхьэхэрэр, ащ ишIуагъэкIэ защыбгъэпсэфыныр гуIэтыпIэ зэрэхъурэр къыIуагъ.— Непэ «Мэздахэ» анахь зэтегъэпсыхьэгъэ мэзылъэ зыгъэпсэфыпIэу Адыгеим иI. 2025-рэ илъэсым нэбгырэ мин 200 ащ щызэблэкIыгъ. Джырэ шапхъэхэм адиштэрэ арт-псэуалъэхэр щагъэуцугъэх, зекIо кIуапI, инфраструктурэм изэтегъэпсыхьан чIыналъэм щэкIо, псэолъакIэхэр щашIых, ахъщэ хэзылъхьэ зышIоигъохэр къекIуалIэх, — къыIуагъ къалэм ипащэ.Мыекъопэ къэлэ администрацием къызэритырэмкIэ, зекIонымкIэ амалэу щыIэхэм яхэгъэхъон лъагъэкIотэщт. Шъугу къэдгъэкIыжьын, «Мэздахэ» изэтегъэпсыхьанкIэ IофшIэнхэм яя 3-рэ Iахь мы илъэсым аублэщт. ПстэумкIи сомэ миллиони 120-рэ ащ пэIухьащт, федеральнэ гупчэм къытIупщыщт сомэ миллиони 107-р дыхэтэу.Анцокъо Ирин.