Лъэпкъ проектэу «ЩыIэныгъэм пае инфраструктурэр» зыфиIорэм телъытагъэу 2026 — 2027-рэ илъэсхэм социальнэ псэолъэ заулэ ашIыщт.
Джащ фэдэу коммунальнэ инфраструктурэр гъэкIэжьыгъэнымкIэ программэм къызэрэдилъытэрэм тетэу 2026-рэ илъэсым псэолъи 7-мэ яшIын кIощт, ахэм ащыщэу 6-р мы илъэсым аухыщт. Ахэр: къуаджэу Тэхъутэмыкъуае щашIырэ псырыкIуапIэр, псэупIэу Инэм къыдэтэджэщт псыубытыпIэр, къалэу Мыекъуапэ иурамхэу Ветерановымрэ Крыловымрэ адэжькIэ гъэзэгъэ псызэхэкIыпIэр агъэкIэжьыщт, Инэм къэлэ псэупIэм хэхьэрэ къутырэу Суповскэм ипсырыкIуапIэрэ къуаджэу Улапэ ипсырыкIуапIэрэ зэтырагъэпсыхьащтых, селоу Красногвардейскэм псызэхэкIыпIэ щашIыщт (2027-рэ илъэсым аухыщт). Сомэ миллиони 180-м ехъу а псэуалъэхэм апэIухьащт.Социальнэ псэуалъэхэм алъэныкъокIэ — Теуцожь районымкIэ къуаджэу Гъобэкъуае — врач амбулаторие, Джэджэ районымкIэ къутырхэу Усть-Сахрайрэ Прогрессымрэ, Тэхъутэмыкъое районымкIэ къуаджэу БжыхьэкъоякIэм, Кощхьэблэ районымкIэ къутырэу Игнатьевскэм фельдшер-мамыку IэзапIэхэр къадэтэджэщтых, Мыекъопэ къэлэ сымэджэщым — хирургическэ корпус, Тэхъутэмыкъое районымкIэ къуаджэу АдыгеякIэм кIэлэцIыкIу IыгъыпIэу нэбгырэ 280-рэ зычIэфэщтыр ащагъэпсыщтых. ЗыгъэпсэфыпIэу «Лэгъонакъэ» инженер инфраструктурэмкIэ изэтегъэпсыхьан лъэкIуатэ.«Хэгъэгум ипащэхэм анаIэ къызэрэттырагъэтырэм ишIуагъэкIэ лъэпкъ проектхэм, къэралыгъо программэхэм ыкIи «Единэ Россием» инароднэ программэ къадыхэлъытагъэу сыд фэдэрэ лъэныкъомкIи къэуцурэ Iофыгъохэр зэшIохыгъэнхэмкIэ Адыгеим амал дэгъухэр иIэ хъугъэ. Мы аужырэ илъэсхэм республикэм, фэдэ зыпарэкIи къыхэмыкIыгъэу, социальнэ мэхьанэ зиIэ псэолъабэ щашIыгъ: гъогухэр, инженер инфраструктурэм къыхиубытэрэ ыкIи нэмыкI псэуалъэхэр. Министерствэхэм, къулыкъухэм яIэшъхьэтетхэм, муниципалитетхэм япащэхэм пшъэрылъ афэсэшIы федеральнэ мылъкумкIэ ыкIи тэ тимылъкукIэ зэдэдгъэпсыхэрэм япхыгъэ IофшIэнхэр игъом гъэцэкIэгъэнхэм ыкIи ахъщэр кIэугъоегъэным анаIэ икъоу тырагъэтынэу, бюджет мылъкур тэрэзэу гъэфедэгъэнэу. Республикэм исхэм тиIофшIэн кIэухэу фэхъурэр алъэгъун фае. Къалэхэмрэ район гупчэхэмрэ ямызакъоу, псэупIэ цIыкIухэм адэсхэми а зэхъокIыныгъэшIухэр зэхашIэн фае», — къыIуагъ республикэм ипащэ.