А. Балабась
АР-м и Къэралыгъо быракъ фэгъэхьыгъэ мэфэкI зэхахьэхэр республикэм ирайонхэм ащыкIуагъэх. Мыекъуапэ мэфэкIыр Пушкиным и Унэ щыхагъэунэфыкIыгъ.
Ащ хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый, республикэ Адыгэ Хасэм итхьаматэ игуадзэу Хъот Юныс, Дунэе адыгэ ассоциацием илIыкIохэр, общественнэ IофышIэхэр, къэлэдэсхэр ыкIи хьакIэхэр.
АР-м и ЛIышъхьэу КъумпIыл Мурат ыцIэкIэ мэфэкIымкIэ къэзэрэугъоигъэхэм къафэгушIуагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.— Тибыракъ лъэпкъ зэхашIэм итамыгъэ къодыеп, лIыгъэм, шъхьэлъытэжьым, лъэпкъ зэфэшъхьафэу щыпсэухэрэм языкIыныгъэрэ язэгурыIоныгъэрэ къегъэлъагъо. АР-м и Къэралыгъо быракъ и Мафэ гъэхъэгъакIэхэм, лъэпкъыбэмэ язэныбджэгъуныгъэ игъэпытэн, дин зэфэшъхьафхэр зылэжьыхэрэм азыфагу зэгурыIоныгъэ илъыным ыкIи Урысыем ыкIуачIэ пытэным ренэу шъутырерэгъэгушIухь, — къыIуагъ ащ.Адыгеим итворческэ купхэм мэфэкIыр лъагъэкIотагъ.Анцокъо И.