тэхъутэмыкъое район администрациер
Адыгэ культурэм ифестиваль блэкIыгъэ тхьаумафэм Тэхъутэмыкъое районым щыкIуагъ.
Илъэсым иIофтхьэбзэ дахэхэм ащыщэу ар хъугъэ ыкIи районым, республикэм ащыпсэухэрэм ямызакъоу, тикультурэ зышIогъэшIэгъон хьакIэхэр ащ къеугъоих. Нэбгырэ мин пчъагъэ щызэIокIэ, тиIэпэIасэхэм яIофшIагъэхэр, тиорэдыIохэр, тикъэшъуакIохэр, тикультурэ зыIэтырэ пстэури хагъэлажьэ.Тэхъутэмыкъое районым ипащэу, партиеу «Единэ Россием» ичIыпIэ къутамэ исекретарэу Шъэо Аскэр къызэрэугъоигъэхэм шIуфэс гущыIэхэмкIэ закъыфигъэзагъ ыкIи къыхигъэщыгъ Президентэу Владимир Путиным мы илъэсыр Урысыем щыпсэухэрэ лъэпкъхэм языкIыныгъэ и Илъэсэу зэригъэнэфагъэм мыщ фэдэ Iофтхьабзэхэм мэхьэнэ хэушъхьафыкIыгъэ яIэ зэрэхъурэр — ахэм тикъэралыгъо икультурэ зэфэшъхьафхэм уасэу яIэм ыкIи хабзэхэм якъызэтегъэнэн имэхьанэ къыкIагъэтхъы.
— Сицыхьэ телъ мы фестивалым гукъэкIыжь дахэхэр къызэрэшъуфигъэнэщтым! — къыкIигъэтхъыгъ Шъэо Аскэр.Ары, фестивалыр гум къинэжьынэу гъэпсыгъагъэ — ащ тикультурэ идэхагъэ шъо зэмылIэужыгъохэмкIэ щышIэтыгъ. Лъэпкъ шъуашэр непэрэ мафэхэм зэрахэзэгъагъэр, ащ итеплъагъэр, лъэпкъ шхыныгъохэр, лъэпкъ гъэдэхалъэхэр, хьап-щыпхэр, адыгэ орэдыр, укъызэкIэзыгъэнэрэ мэкъамэхэр, къашъохэр мы зэпстэуми уамыгъэгушхон плъэкIыщтыгъэп.Iофтхьабзэр зыщыкIогъэ гупчэм иIофышIэхэм къызэрэхагъэщырэмкIэ, тикультурэ уасэ фэзышIырэ, ар зэзыгъашIэ зышIоигъо нэбгырэ мин 30-м нахьыбэ мэфэ реным кIогъэ фестивалым еплъынхэу къекIолIагъэх, культурэр къэзыгъэлъэгъуагъэр нэбгырэ 500 фэдиз.