Яхэгъэгу фэшъыпкъэхэу пIугъэнхэр

КъулыкъушIэным фэгъэхьыгъэ Урысые проектэу «О уилIыхъужъ» зыфиIорэм хахьэу АР-м лъэпкъ Iоф­хэмкIэ, IэкIыб къэралхэм ащыпсэурэ зэлъэпкъэгъухэм ады­ряIэ зэпхыныгъэхэмкIэ ыкIи къэбар жъугъэм иамалхэмкIэ и Комитетрэ АР-м терроризмэм пэуцужьыгъэнымкIэ ико­миссие и Аппаратрэ икIэщакIохэу организациехэм ыкIи ветеранхэм яассоциациеу «Группы «Вымпел» зыфиIорэм хэтхэм аIукIагъэх республикэм иапшъэрэ еджапIэхэм, иколледжхэм ястудентхэр, Юнармием хэтхэр.

Дунаим ихэушъхьафыкIыгъэ подразделение пхъашэхэм ыкIи шъхьэкIафэ зыфашIыхэрэм ащыщэу «Вымпелым» иапэрэ вице-президентэу, запасым щыIэ полковникэу, щынэгъончъэнымкIэ федеральнэ къулыкъум ихэушъхьафыкIыгъэ Гупчэ иветеранэу Владимир Силантьевым ныбжьыкIэхэм зэдэгущыIэгъу гъэшIэгъон адыриIагъ.В. Силантьевыр ЛIыхъужъныгъэм иорден икавалер, УФ-м шIэныгъэмкIэ ыкIи апшъэрэ гъэсэныгъэмкIэ и Ми­нистерствэ экстремизмэр къэмыгъэхъу­гъэнымкIэ ыкIи ныбжьыкIэхэм Iоф адэ­шIэгъэнымкIэ и Координационнэ Совет иIофышIэ куп хэт. 2004-рэ илъэсым Темыр Осетием ит къалэу Беслан дэт еджапIэм террористхэр къызытебанэхэм, гъэры ашIыгъэхэр шъхьафит шIы­жьыгъэнхэм фэгъэхьыгъэ хэушъхьафыкIыгъэ операцием хэлэжьагъ.Илъэс 37-м ехъурэ Владимир Силантьевыр къулыкъушIагъ, ащ щыщэу илъэс 17-м ошъогу-десантыдзэм ыкIи илъэс 20-м «Вымпелым» къулыкъур ащихьыгъ. Мы уахътэм Московскэ кIэлэегъэджэ къэралыгъо университетым Iоф щешIэ, ащ нэмыкIэу тарихъ-патриотическэ пIуныгъэм пылъ.

Сургут къыщегъэжьагъэу Геническэ нэсэу, тикъэралыгъо ичIыпIэ 25-мэ ащыIагъ, къыткIэхъухьэхэрэм, кIэлэеджа­кIохэм, студентхэм заIуегъакIэ, зэдэгущыIэгъухэр адешIы. Урысые Федерациер гумэкIыгъо лъэхъан зыщыхэтым лъэпкъ щынэгъончъагъэр гъэпытэгъэным тегущыIэгъэныр анахь шъхьаIэу зэрэщытыр къыхегъэщы. Щынагъо къэзытырэ лъэныкъохэм ащыщэу терроризмэм ныбжьыкIэхэр щыухъумэгъэнхэм фэIорышIэрэ Iофтхьабзэхэм язэхэщэн мэхьанэшхо яIэу къыIуагъ. Ащ зэрилъы­тэрэмкIэ, къэбарыр пхъашэу щытми, ныбжьыкIэхэм шъыпкъэр япIон, ашIэн фае. Тарихъ хъугъэ-шIэгъэ тхьамыкIагъоу тикъэралыгъо къыщыхъугъэхэм лIыблэнагъэрэ лIыхъужъныгъэрэ къыз­хэфагъэхэр ящысэтехыпIэу ныбжьыкIэхэр пIугъэнхэ фаеу елъытэ.Дин ыкIи лъэпкъ зэгурымыIоныгъэхэм япхыгъэ зекIуакIэхэм ныбжьыкIэхэр ахэщагъэ мыхъунхэм фэIорышIэрэ Iоф­тхьабзэхэм ар къатегущыIагъ. Къэбар нэпцIхэр аIэкIагъахьэхэзэ цIыфхэм пси­хологическэу зэратеIункIэхэрэм пэуцу­жьыгъэн, шъыпкъагъэр зылъэпсэ къэбар­хэр алъыгъэIэсыгъэнхэмкIэ амал тедзэ­хэр зехьэгъэнхэ зэрэфаер къыхигъэ­щыгъ.— ЗэщыхъокIо кIуачIэхэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэщагъэ мыхъунхэм мэхьанэшхо яI. Тарихъым, Хэгъэгу зэошхом афэгъэхьыгъэ къэбар нэпцIэу IэкIыб къэралхэм агъэIухэрэр ныбжьыкIэхэм ашIошъ мыхъуным пае шъыпкъэр ашIэн, патриотэу къэтэджынхэ, тинахьыжъхэм лIыхъужъныгъэу зэрахьагъэр икъоу алъыгъэIэсыгъэн фае. Урысыем лъэпкъ зэгурымыIоныгъэ илъы­ным пае террористхэм афэлъэ­кIырэр ашIэ, телефоныр, дунэе хъытыур къызфагъэфедэхэзэ агъэIорышIэщт, агъэфедэщт цIыфхэр, анахьэу ныбжьыкIэхэр къагъотых. Ащ фэдэхэм къыткIэхъухьэрэ лIэужхэр ащыухъумэгъэнхэм, гумэкIыгъохэр дэгъэзыжьыгъэнхэм апае тызэкъотэу ащ тыпэшIуекIон фае, — къыIуагъ В. Силантьевым.Ассоциациеу «Вымпелым» къытегущы­Iэзэ Владимир къыIуагъ я XX-рэ ыкIи XXI-рэ лIэшIэгъухэм тикъэралыгъо терроризмэм щыпэуцужьыгъэнхэмкIэ мы подразделением пхъашэу Iоф зэришIагъэр ыкIи зэришIэрэр. Мафэ къэс щынэгъончъэнымкIэ федеральнэ къулыкъум иIофышIэхэм апсэ емыблэжьэу къулыкъур ахьы.— Рэхьатэу шъущыIэнэу, гупсэфэу шъуеджэным пае хэушъхьафыкIыгъэ подразделением икъулыкъушIэхэм ­алъэкI къагъанэрэп. ЗэкIэми шъошIэ террористхэм жъалымагъэу зэрахьэрэр зыфэдэр. Ахэр хэти шъхьасыхэрэп, арышъ, зэкIэми тызэкъотэу ахэм тапэуцужьын фае, — къыIуагъ ветераным.Къулыкъур зыщихьыгъэ илъэс зэкIэлъыкIохэм Владимир хэушъхьафыкIыгъэ операцие пчъагъэмэ ахэлэжьагъ. Ахэм ащыщэу 2004-рэ илъэсым Темыр Осетием ит къалэу Беслан дэт гурыт еджа­пIэу N 1-м къыщыхъугъэ тхьамыкIагъом къыщыуцугъ. Щысэхэр къыхьыхэзэ ащ къыIотагъэхэм унэпс къамыгъакIоу уядэ­Iушъурэп. КъызтегущыIэгъэ хъугъэ-шIагъэ пэпчъ сурэтхэмкIэ ыкIи ведеомкIэ къы­гъэшъыпкъэжьыгъэх. Гъэры ашIыгъэхэм якъэгъэнэжьын епхыгъэ Iофтхьабзэм хэушъхьафыкIыгъэ подразделениехэу «Вымпелым» ыкIи «Альфам» якъулы­къушIэхэм, ахэм ягъусэу цIыф къызэрыкIохэми лIыгъэшхо зэрахьагъ. ХэкIодагъэхэр агу къагъэкIыжьыгъэх, зы такъи­къэ афэшъыгъуагъэх.— Хэта шъоркIэ лIыхъужъ шъыпкъэ­хэр, шъуегупшыс? Шъухэт шъо ыкIи сыда шъо шъуфэшIэщтыр? Беслан дэт еджапIэм террористхэр къызытебанэхэм гъэ­ры ашIыгъэ кIэлэцIыкIухэр, ны-тыхэр шъхьафит шIыжьыгъэнхэм фэбэнэгъэ лIыхъужъхэр шъуилэгъугъэх ыкIи нахьыкIагъэх. Ахэм апсэ емыблэжьхэу лIыблэ­нэгъэшхо зэрахьагъ. Ахэм афэдэ цIыф­хэр зыми щыщынэхэрэп, лIыхъужъых ыкIи яхэгъэгу фэшъыпкъэх. Мыщ фэдэ зекIуакIэ шъо къызхэжъугъэфэным шъу­фэхьазыра? — мыщ фэдэ упчIэхэмкIэ ветераным кIэлэцIыкIухэм зафигъэзагъ.Нэужым ассоциациеу «Группы «Вымпел» зыфиIорэм илIыкIо куп «Единэ Россием» ишъолъыр штабэу Мыекъуапэ дэтым рагъэблэгъагъ. Адыгэ Къэралыгъо Совет — Хасэм и Тхьаматэ игуадзэу Цэй Эдуард ветеранхэр IукIагъэх. Джащ фэдэу зэхэсыгъом къырагъэблэгъагъэх патриотическэ ыкIи ныбжьыкIэ организациехэм ялIыкIохэр, хэушъхьафыкIыгъэ дзэ операцием иветеранхэр.— Мыщ фэдэ зэIукIэхэм мэхьанэшхо яI. НыбжьыкIэхэм ямызакъоу, ахэм янэ-­ятэхэр, кIэлэегъаджэхэр, организациехэм япащэхэу ныбжьыкIэхэм Iоф адэзышIэхэрэр мыщ фэдэ Iофтхьабзэхэм къахэгъэлэжьэгъэнхэ зэрэфаер. Зэо зэфэшъхьафхэм яветеранхэр — зихэгъэгу шIу зылъэгъурэ цIыфых. АныбжьыкIэ къулыкъушIэныр агъэтIылъыгъ нахь мышIэми, ахэр общественнэ щыIакIэм чанэу къыхэлажьэх, къыткIэхъухьэрэ лIэужхэм яхэгъэгу шIу алъэгъоу пIугъэн­хэмкIэ яшIогъэшхо къагъакIо, — къы­Iуагъ Цэй Эдуард.Зигъо Iофыгъоу мыр зэрэщытыр, зэщыхъокIо кIуачIэу къыкъокIыхэрэм ныбжьыкIэхэр зэрагъэплъэхъухэрэр, дунэе хъытыур къызфагъэфедэзэ къэбар нэпцIыхэр ашIошъ зэрагъэхъухэрэр, ащ къыхэкIыкIэ террористическэ ыкIи экстремизмэ нэшанэ зиIэ мыхъо-мышIа­гъэхэм ахэщагъэхэ зэрэхъурэр АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэмат къыIуагъ.Зэхэсыгъом хэлэжьагъэхэм зэдырагъаштэу къаIуагъ зэо зэфэшъхьафхэм яветеранхэм тапэкIи зэраIукIэщтхэр.КIАРЭ Фатим.