Профсоюз организациер
Чернобыль атомнэ электростанцием къыщыхъугъэ тхьамыкIагъом ыкIи терроризмэм пэшIуекIогъэным, ныбжьыкIэхэр ащ щыухъумэгъэнхэм афэгъэхьыгъэ сыхьатхэр Мыекъуапэ игъэсэныгъэ учреждениехэм ащыкIуагъэх. Ащ кIэщакIо фэхъугъэх дзэкъулыкъушIэхэм я Урысые профсоюз организацие и Адыгэ шъолъыр къутамэ итхьаматэу подполковникэу Анатолий Назаровыр ыкIи тарихълэжь-пограничникэу Игорь Кубановыр.Мыекъопэ политехническэ техникумым, В.С. Максимовым ыцIэ зыхьырэ спорт еджапIэм, гурыт еджапIэу N28-м активистхэр ащыIагъэх.Iофтхьабзэм къыдыхэлъытагъэу Чернобыль атомнэ электростанцием къыщыхъугъэ тхьамыкIагъом идэгъэзыжьын лIыхъужъныгъэ хэлъэу хэлэжьагъэхэм афэгъэхьыгъэ къэбархэр ныбжьыкIэхэм къафаIотагъэх.— Чернобыль атомнэ электростанциер къызэом къыздихьыгъэ тхьамыкIагъом идэгъэзыжьын чанэу хэлэжьагъэхэм яшIэжь тщыгъупшэщтэп. А лъэхъаным мы Iофыгъохэм апэуцужьын кIочIэ хьазыр къэралыгъом зэримыIагъэм къыхэкIэу запасым щыIэ офицерхэмрэ сержантхэмрэ ары апэу къызэджэгъагъэхэр. Ядернэ реакторыр къызэом къыхэкIыгъэ радиациер ящыIэныгъэкIи, япсауныгъэкIи зэрэщынагъор ашIэзэ ыпэкIэ лъыкIотагъэх, зэрафэлъэкIэу къафагъэуцугъэ пшъэрылъхэр зэшIуахыгъэх. Сыда пIомэ радиацием зызиушъомбгъукIэ, цIыфхэм нахь гумэкIыгъуабэ къызэрафихьыщтыр дэгъоу къагурыIощтыгъ, — хигъэунэфыкIыгъ Анатолий Назаровым.Интернет амалхэр къызфагъэфедэхэзэ ныбжьыкIэхэр терроризмэм зэрэхащэрэ шIыкIэхэм, ахэм зызэращаухъумэщтым, ащ къыхэкIын ылъэкIыщт тхьамыкIагъохэм Игорь Кубановыр къатегущыIагъ. ХэушъхьафыкIыгъэ дзэ операцием, мы уахътэм фронтым изытет, Адыгеим илIыхъужъхэм якъэбархэр къафаIотагъэх.ЩымыIэжь лIыхъужъхэм такъикърэ афэшъыгъуагъэх.Нэужым егъэджэн-методическэ фильмитIу къафагъэлъэгъуагъ. Iофтхьабзэм нэбгыри 140-рэ къызэлъиубытыгъ.