Гавердовскэ гурыт еджапIэр
Радиацием епхыгъэ тхьамыкIагъоу къэхъухэрэм якIэуххэм ядэгъэзыжьын хэлэжьагъэхэм ямафэ ипэгъокIэу Гавердовскэ къоджэ тхылъеджапIэм иIофышIэхэм шIэжьым исыхьат гъэсэныгъэм игупчэу N18-м иапшъэрэ классхэм арысхэм афызэхащагъ.
ТхьамыкIэгъошхор къызыхъугъэр илъэс 40 зэрэхъурэм фэгъэхьыгъэ Iофтхьабзэм зэреджагъэхэр «Как это было».ТхылъеджапIэм иIофышIэу Наталья Алексеевам тарихъым хэмыкIокIэжьын лъэужэу къыхэнэгъэ мафэм икъэбар кIэкIэу къафиIотагъ.— Электростанцием ия 4-рэ реактор къызэом, радиацие зыхэлъ вещество тонн пчъагъэ километрэ мин заулэкIэ пэIудзыгъэ чIыпIэхэм алъыIэсыгъ, нэбгырэ миллионыбэ радиацием ишъолъыр хэфагъ. Тыкъэзыуцухьэрэ дунаим, экономикэм зэрарышхо ащ къафихьыгъ, нэбгырабэм ящыIэныгъэ зэрихъокIыгъ, къэралыгъом итарихъ хэмыкIокIэжьын лъэужэу къыхэнагъ, — къыIуагъ Наталья Алексеевам.ЗэIукIэгъум къырагъэблэгъагъ АР-м иветеран-пограничникхэм яобществэ итхьаматэу, тхьамыкIагъом идэгъэзыжьын хэлэжьагъэу Игорь Кубановыр. Ащ ищыIэныгъэ гъогу, Чернобыль кIонэу зэрэхъугъэм, радиацием зызэрэщаухъумэрэ пкъыгъохэр зыфэдэхэм къэзэрэугъоигъэхэр ащигъэгъозагъэх.ЗэIукIэгъум кIэлэеджакIохэм яупчIэхэм И. Кубановым игуапэу джэуапхэр къаритыжьыгъ.Чернобыль тхьамыкIагъом фэгъэхьыгъэ видеофильмэ кIэкI Iофтхьабзэм хэлэжьагъэхэр еплъынхэ амал яIагъ. ХэкIодэгъэ дэгъэзэжьакIохэм яшIэжь агъэлъапIэу такъикърэ афэшъыгъуагъэх.Къэгъэлъэгъонэу «Чернобыль идзэкIолIхэр» зыфиIоу тхылъеджапIэм иIофышIэу М. Иргизцевам къыгъэхьазырыгъэм ягуапэу еплъыгъэх.НэкIубгъор зыгъэхьазырыгъэр Iэшъынэ Сусан.