АР-м и Къэралыгъо автоинспекцие
Адыгеим кIэлэцIыкIу гъогу-транспорт фыкъоныгъэхэр къыщымыгъэхъугъэнхэмкIэ зэхэубытэгъэ Iофтхьабзэу рагъэкIокIыщтхэм къадыхэлъытагъэу республикэ зэнэкъокъоу «Безопасное колесо-2026» зыфиIорэр Мыекъуапэ щыкIуагъ. Мыгъэ Урысыем хэгъэгу кIоцI IофхэмкIэ и Министерствэ и Къэралыгъо автоинспекцие илъэс 90-рэ зэрэхъурэм Iофтхьабзэр фэгъэхьыгъагъ.
МэфэкI шIыкIэм тетэу инспектор ныбжьыкIэхэм къафэгушIуагъэх АР-м гъэсэныгъэмрэ шIэныгъэмрэкIэ и Министерствэ иотдел ипащэу Афэунэ Рэмэзан, ныбжьыкIэ общественнэ-къэралыгъо организациеу «Апэрэхэм я Движение» ипащэу Ованес Шекерьянц, АР-м и Къэралыгъо автоинспекцие ипэщэ IэнатIэ зыгъэцэкIэрэ Тхьаркъохъо Юсыф.ШIуфэс гущыIэхэмкIэ зэнэкъокъур къызэIуихыгъ полицием иполковникэу Тхьаркъохъо Юсыф. ГъогурыкIонымкIэ шIэныгъэу, IэпэIэсэныгъэу ныбжьыкIэхэм арагъэгъотыгъэр тапэкIи къызэрашъхьапэщтыр ащ къыхигъэщыгъ, зэрифэшъуашэу непэ командэхэм зыкъагъэлъэгъонэу афэлъэIуагъ.Илъэси 10 — 12 зыныбжь кIэлэеджэкIо 40 Iофтхьабзэм зэрипхыгъэх, ахэр — зэнэкъокъум имуниципальнэ едзыгъохэм текIоныгъэ къащыдэзыхыгъэх. Нэбгырэ плIырыплIэу командэхэр зэхэтхэу «Инспектор ныбжьыкIэ анахь дэгъу» зыфиIорэ цIэм фэбэнагъэх.Нэбгырэ пэпчъ чэзыу-чэзыоу гъогурыкIоным ишапхъэхэм хэшIыкIэу афыряIэр, пэрыохъухэр къаухьэхэзэ кушъхьэфачъэр дэгъоу зэрафэн зэралъэкIырэр, зы творческэ номер къагъэлъэгъуагъэх. Ащ дакIоу гъогу хъугъэ-шIагъэхэм ахэфагъэхэм апэрэ медицинэ IэпыIэгъур зэрарагъэгъотыщт шIыкIэм зэрэфэкъулайхэр нэрылъэгъу къашIыгъ.А цIэм зэкIэ командэхэр зэрафэлъэкIэу фэбэнагъэх. Ау ар зыфагъэшъошагъэр къалэу Мыекъуапэ икоманд, Мыекъопэ районым ятIонэрэ чIыпIэр къыдихыгъ, Красногвардейскэ районым къикIыгъэхэр ящэнэрэ хъугъэх. Хэлэжьэгъэ пстэуми щытхъу тхылъхэр ыкIи шIухьафтынхэр аратыгъэх.Урысые зэнэкъокъоу «Безопасное колесо-2026» зыфиIорэм икIэухэу къалэу Анапэ щыкIощтым Адыгеир къыщигъэлъэгъощт шъолъыр едзыгъом текIоныгъэ къыщыдэзыхыгъэ отрядым.