АР-м и Къэралыгъо автоинспекцие
Урысыем хэгъэгу кIоцI IофхэмкIэ и Министерствэ и Къэралыгъо автоинспекцие мыгъэ илъэс 90-рэ зэрэхъурэм ипэгъокIэу зэнэкъокъоу «ЗисэнэхьаткIэ анахь дэгъур» зыфиIорэр ригъэкIокIыгъ.АР-м и Къэралыгъо автоинспекцие игъогу-патруль къулыкъу иIофышIэхэр ащ хэлэжьагъэх. Нэбгыри 8-мэ физическэ, хэушъхьафыкIыгъэ ыкIи медицинэ, щэрыон ухьазырыныгъэу яIэр къагъэлъэгъон алъэкIыгъ. Ащ дакIоу, гъогурыкIоным ишапхъэхэр зэрашIэхэрэмкIэ, «регулировщик» шIэныгъэу аIэкIэлъхэмкIэ, патруль автомобилыр зэрэзэрафэщтымкIэ заушэтыгъ.Зэнэкъокъум изэфэхьысыжьхэм къызэрагъэлъэгъуагъэмкIэ, гъогу-патруль къулыкъум иротэу N1-м имладшэ лейтенантэу Владислав Потаповым текIоныгъэр къыдихыгъ. ЯтIонэрэ чIыпIэр фагъэшъошагъ гъогу-патруль къулыкъум иротэу N3-м иинспекторэу Дзыбэ Рэджэб. Ящэнэрэ хъугъэ гъогу-патруль къулыкъум иротэу N2-м иинспекторэу, полицием истаршэ лейтенантэу Хъут Рамир.Зэнэкъокъум текIоныгъэ къыщыдэзыхыгъэхэм щытхъу тхылъхэр, кубокхэр ыкIи бгъэхалъхьэхэр аратыгъэх. АР-м и Къэралыгъо автоинспекцие ипэщэ IэнатIэ зыгъэцэкIэрэ Тхьаркъохъо Юсыф къулыкъушIэхэм япшъэрылъхэр щытхъу хэлъэу зэрэзэшIуахыхэрэм, зэнэкъокъум кIэух дэгъухэр къызэрэщагъэлъэгъуагъэм фэшI рэзэныгъэ гущыIэхэр афигъэхьыгъэх. Джащ фэдэу полицием иполковник зэрэхигъэунэфыкIыгъэмкIэ, гъогу щынэгъончъагъэр гъэпытэгъэныр, транспорт хъугъэ-шIагъэхэр дэгъэзыжьыгъэнхэр сыдигъокIи пшъэрылъ шъхьаIэхэу автоинспекцием иIагъэхэр къэнэжьых.— Тызхэт лъэхъаным транспорт пчъагъэм лъэшэу зэрэхахъорэм епхыгъэу, гъогу полицейскэхэм яIофшIэнкIэ пшъэдэкIыжьэу ахьырэр зэхапшIэу нахьыбэ хъугъэ. Непэ къэралыгъо автоинспекторыр ишIэныгъэхэмкIэ лъэгапIэхэм адиштэн, физическэ ухьазырыныгъэ лъэш иIэн, ипсихологическэ зытет пытэн фае, — къыIуагъ Тхьаркъохъо Юсыф.