Теннис цIыкIумкIэ сэнаущыгъэ зыхэлъ спортсмен ныбжьыкIэхэр республикэм икъэлэ шъхьаIэ щызэрэугъоигъэх.
Мэлылъфэгъум и 20-м къыщегъэжьагъэу жъоныгъуакIэм и 3-м нэс спорт комплексэу «Ошъутенэм» зэнэкъокъухэм языфэгъэхьазырын фытегъэпсыхьэгъэ Iофтхьабзэ щыкIощт. Ащ хэла-жьэх Адыгеим ыкIи Дагъыстан яныбжьыкIэ командэхэр, теннисистхэм аныбжь илъэс 18-м ехъурэп.Мы спорт лъэпкъымкIэ Адыгеим испортсмен анахь дэгъу 20-мэ ыкIи Дагъыстан илIыкIо 25-мэ мафэ къэс пчэдыжьым сыхьатыр 10-м ыкIи мафэм сыхьатыр 4-м загъэсэщт, яIэпэIэсэныгъэ хагъэхъощт. Анахьэу анаIэ зытырагъэтыщтыр техническэ ыкIи тактическэ ухьазырыныгъэр ары. Джащ фэдэу теннис цIыкIумкIэ гъэхъэгъэшIухэр зышIырэ Краснодар краим испортсменхэр IэпэIэсэныгъэу аIэкIэлъымкIэ къадэгощэщтых.Урысыем теннис цIыкIумкIэ и Федерацие Iофтхьабзэм кIэщакIо фэхъугъ. РеспубликитIум ялIыкIохэм текIоныгъакIэхэм зафагъэхьазыры, яIэпэIэсэныгъэ хагъэхъощт.