Шъолъырхэм яхэхъоныгъ

Шъолъырхэм хэхъоныгъэ ягъэшIыгъэнымкIэ Урысыем и Правительственнэ комиссие ипрезидиум (иштаб) изэхэсыгъоу видеоконференцие шIыкIэм тетэу кIуагъэм, УФ-м ивице-премьерэу Марат Хуснуллиным тхьамэтагъор зыщызэрихьагъэм Адыгеим и ЛIышъхьэу КъумпIыл Мурат хэлэжьагъ.

Лъэпкъ проектэу «ЩыIэныгъэм пае инфраструктурэр», къэралыгъо программэу «ПсэолъэшIыныр» зыфиIохэрэр зэрагъэцакIэхэрэм, 2026-рэ илъэсым иапэрэ квартал псэолъэшIынымкIэ, шъо­лъырхэм япсэупIэ-коммунальнэ хъызмэт яIофхэм язытет мы зэхэсыгъом ща­тегущыIагъэх. А IофыгъохэмкIэ УФ-м ишъолъырхэм япащэхэмрэ къулыкъухэм яIэшъхьэтетхэмрэ зэфэхьысыжьхэр къашIыгъэх.Лъэпкъ проектэу «ЩыIэныгъэм пае инфраструктурэм» къыдыхэлъытэгъэ федеральнэ проектэу «Iэрыфэгъу къэлэ щыIакIэм игъэпсын» зыфиIорэм диштэу мыгъэ общественнэ чIыпIэ 18, щагуи 3 Адыгеим щызэтырагъэпсыхьанэу, ахэм апае сомэ миллиони 151,5-рэ къыха­гъэкIынэу рахъухьэ. Джащ фэдэу 2026-рэ илъэсым къэлэ цIыкIухэм я Урысые зэнэкъокъу щатекIогъэ проектищ щы­Iэныгъэм щыпхыращыщт: Мыекъуапэ и «Мэздахэ» (ящэнэрэ чэзыу); Инэм Зэкъошныгъэм ипчэгу, Яблоновскэм Зэкъошныгъэм ипарк ащызэтырагъэ­псыхьащтых.Мы проектым диштэу 2026-рэ илъэсым ыкIэм нэс общественнэ чIыпIищ зэтырагъэпсыхьащт. Ахэр Успение Пресвятой Богородицы зыфиIорэ чылысэу Мыекъуапэ дэтым къыпэIулъ скверыр, БжыхьэкъоякIэм культурэм и Унэу дэтым къыпэблэгъэ кIэлэцIыкIу джэгупIэр, Яблоновскэм икIэлэцIыкIу-спорт джэгупIэр. ГъэрекIо мы псэуалъэу зэтырагъэпсыхьащтхэр онлайн-мэкъэтыным икIэуххэм атетэу а псэупIэхэм адэсхэр ары къыхэзыхыгъэхэр.2027-рэ илъэсым зэтырагъэпсыхьащт псэуалъэхэм якъыхэхынкIэ мэкъэтыныр рагъэжьэгъах. ЗэнэкъокъумкIэ шапхъэу щыIэхэм зэхъокIыныгъэхэр афэхъугъэх, ащ хэлэжьэрэ проектхэм къахэхъуагъ. Джы мэкъэтыныр нэбгырэ мин 20-м ехъу зыдэс псэупIэхэм, джащ фэдэу псэупIэ шъхьаIэхэм ащыкIощт. ПстэумкIи республикэм имуниципальнэ образовании 9-мэ ячIыпIэхэр ары зыхэ­дэщтхэр. Зэтырагъэпсыхьащт общест­веннэ чIыпIэхэм якъыхэхынкIэ Урысые онлайн-мэкъэтыныр 2026-рэ лъэсым мэлылъфэгъум и 21-м къыщегъэжьагъэу мэкъуогъум и 12-м нэс кIощт.ЗэхэкъутэнкIэ щынагъоу щыт унэхэм цIыфхэр къачIэщыжьыгъэнхэм тегъэ­псыхьэгъэ программэм игъэцэкIэн лъэ­кIуатэ. 2026 — 2028-рэ илъэсхэм псэу­пIэ-коммунальнэ хъызмэтым зэхъокIыныгъэхэр фэшIыгъэнхэмкIэ IэпыIэгъу къафэхъурэ Фондым сомэ миллион 206,2-рэ Адыгеим къыфыхигъэкIынэу мэгугъэх. Республикэм ибюджет къы­хэкIыщт мылъкури зэрэхэтэу зэхэонкIэ щынагъоу щыт псэупIэ квадрат метрэ мини 2,65-рэ фэдизмэ ачIэсхэр нэмыкI чIыпIэхэм агъэкощынхэ, мы илъэ­сым квадрат метрэ 871,8-мэ ачIэсхэм нэмыкI псэупIэхэр къафагъотын алъэкIыщт.«Унэгъо ныбжьыкI» зыфиIорэ программэм диштэу 2025-рэ илъэсым унэгъуи 102-мэ псэукIэ амалэу яIэхэм къахэхъуагъ. Мыгъэ унэгъо 89-мэ псэукIэ амалэу яIэхэр нахьышIу афашIынэу рахъухьэ, ащ пае сомэ миллион 269-рэ къыхагъэкIыщт.Лъэпкъ проектэу «ЩыIэныгъэм пае инфраструктурэр» зыфиIорэм диштэу 2026 — 2027-рэ илъэсхэм Теуцожь районымкIэ къуаджэу Гъобэкъуае амбу­латорие, Джэджэ районымкIэ къутырхэу Усть-Сахрай ыкIи Прогрессым, Тэхъутэмыкъое районымкIэ БжыхьэкъоякIэм, Кощхьэблэ районымкIэ къутырэу Игнатьевскэм фельдшер-мамыку IэзапIэхэр ащагъэпсыщтых; Мыекъопэ къэлэ клиникэ сымэджэщым ихирургическэ корпус ашIыщт. Тэхъутэмыкъое районымкIэ АдыгеякIэм нэбгырэ 280-мэ ателъытэгъэ кIэлэцIыкIу IыгъыпIэ къыдэтэджэщт. ЗыгъэпсэфыпIэу «Лэгъона­къэм» иинженер инфраструктурэ изэтегъэпсыхьан лъагъэкIуатэ.Республикэ гъогухэр шапхъэм диштэу гъэпсыгъэнхэм пае 2026-рэ илъэсым сомэ миллиарди 8,1-рэ къыхагъэкIыгъ. Ащ щыщэу сомэ миллиарди 4,9-р ­лъэпкъ проектэу «ЩыIэныгъэм пае инфраструктурэр» зыфиIорэм пэIуагъэхьащт.2025-рэ илъэсым Адыгеим псэупIэ квадрат метрэ мин 600,9-рэ щатIупщыгъ, зы нэбгырэм телъытагъэу псэупIэ квадрат метрэ 1,2-рэ атыгъ. Мыгъэ джыри псэупIэ квадрат метрэ мин600-м къыщымыкIэу атIупщынэу ра­хъухьэ.Коммунальнэ инфраструктурэр джырэ уахътэм диштэу зэрэзэтырагъэпсы­хьащт программэм къыдыхэлъытагъэу 2026-рэ илъэсым псэолъи 7 ашIы, ахэм ащыщэу 6-р мыгъэ атыгъах: Тэхъутэмыкъуае ипсырыкIуапIэрэ Инэм ипсы­IыгъыпIэрэ ашIыгъэх, къалэу МыекъуапэкIэ Крыловым иурамрэ Ветеранхэм яурамрэ яканализациехэм ащыщхэр агъэкIэжьыгъэх, Инэм къэлэ псэупIэм хэхьэрэ къутырэу Суповскэм ипсыIы­гъыпIэ агъэкIэжьыгъ, Улапэ щыгъэпсыгъэ псырыкIуапIэхэм ащыщхэр агъэцэ­кIэжьыгъэх, Красногвардейскэм псы­рыкIуапIэхэр щагъэпсыгъэх. Мы псэуа­лъэхэм апае сомэ миллиони 180-м ехъу къатIупщыгъ.«Лъэпкъ проектхэм, къэралыгъо программэхэм, «Единэ Россием» инароднэ программэ адиштэу хэгъэгум ипащэхэм яIэпыIэгъу ишIуа­гъэкIэ лъэныкъо пстэухэмкIи Iофыгъохэр ащызэшIохыгъэнхэм пае Адыгеим ищыкIэгъэ амалхэр къыIэкIэхьагъэх. Мы аужырэ илъэсхэм зыкIи фэдэ къыхэмы­кIыгъэу социальнэ мэхьанэ зиIэ псэуалъэхэр, гъогухэр, инженер инфраструктурэм ипсэуалъэхэрбэу ашIыгъэх ыкIи агъэцэкIэжьыгъэх. Министерствэхэм, къулы­къухэм, чIыпIэхэм япащэхэм пшъэ­рылъ афэсшIыгъ федеральнэ мылъкур зыщыгъэфедэгъэ проектхэр зэрагъэцакIэхэрэм ашъхьэкIэ гъунэ лъафынэу, бюджет мылъкур фэсакъыхэзэ, шIуагъэ къытэу къызфагъэфедэнэу. Республикэм щы­псэухэрэм тиIофшIэн кIэухэу фэ­хъухэрэр, къалэхэм ямызакъоу, рай­он гупчэхэми, псэупIэ цIыкIухэми ятеплъэ нахьышIум ылъэныкъокIэ зызэрэзэрахъокIырэр алъэгъунфае», — къыIуагъ АР-м и ЛIы­шъхьэу КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.