Жъышъхьэ мафэ хъунхэу

Зыныбжь хэкIотагъэхэр Мыекъуапэ икъэлэ парк дэжь урамэу Краснооктябрьскэм зыщызэрэугъоихэрэр илъэсипшI заулэ хъугъэ. Чъыг чIэгъхэм ачIэт тетIысхьапIэхэм атесынхэр, жьаум чIэсхэу зэдэгущыIэнхэр, къэбархэр къызэфаIотэнхэр, гъэзетхэм яджэнхэр, жьы къабзэм хэсынхэр пенсием щыIэхэм хабзэ афэхъугъ. Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат къызэ­ри­IуагъэмкIэ, чъыIэми, фабэми зыныбжь хэкIотагъэхэр зыщызэIукIэщтхэ, зыщызэдэгущыIэщтхэ чIыпIэр къыхахынэу пшъэрылъ афишIыгъ ыкIи ар мы мафэхэм къызэIуахыгъ.

«Единэ Россием» иобщест­веннэ приемнэу щытыгъэм ащ фэдэ чIыпIэ ахэм ащыфагъэнэфагъ. Ар шъолъыр заулэу зэтыраутыгъ. Рэхьатэу яуахътэ пенсионерхэм щагъэкIонэу е Iофтхьэбзэ зэфэшъхьафхэмрэ мастер-классхэмрэ ахэлэжьэнхэу ар зэтырагъэпсыхьагъ. Ащ­кIэ зыныбжь хэкIотагъэхэм IэпыIэгъу къафэхъущтых цIыф­хэм ясоциальнэ фэIо-фашIэхэр зыгъэцэкIэрэ Гупчэм иIофышIэ­хэр. Ащ фэдэ чIыпIэр бэмышIэу мэфэкI шIыкIэм тетэу къызэIуа­хыгъ. Зыныбжь хэкIотагъэхэри а мэфэкIым чанэу хэлэжьагъэх. Къалэм икIэлэцIыкIу творческэ купхэм ахэтхэри къафэгушIонхэу ащ къэкIогъагъэх.

«ЛIэуж зэфэшъхьафхэр джарэущтэу агу зэфихыгъэу ренэу зэIукIэзэ ашIынэу, ныбжьыкIэхэми, зы­ныбжь икъугъэхэми ар къа­шъхьэпэнэу сэгугъэ. Ащ фэдэ чIыпIэм фэе пстэури къе­кIолIэшъущт», — къыIуагъ республикэм ипащэ.

Лъэпкъ проектэу «Унагъом» къыдыхэлъытэгъэ программэу «ГъэшIэ кIыхьэ чан» зыфиIорэм, «Единэ Россием» ипартийнэ проектхэм адиштэу мыщ фэдэ чIыпIэхэр Адыгеим зыщызэхащэхэрэр илъэс заулэ хъугъэ. Джыдэдэм республикэм ащ ­фэдэ чIыпIэ 35-рэ щызэтыра­гъэпсыхьагъ. Муниципалитет пстэуми ахэр ащызэхащагъэх.«Анахь шъхьаIэр зы­ныбжь хэкIотагъэхэми мыщ фэдэ гукъэкIым къызэрэдырагъэштагъэр ары. Мыгъэ ащ фэдэ чIыпIэхэм Iофтхьэбзи 110-рэ ащызэхащагъ, зыныбжь хэкIо­тэгъэ нэбгырэ 600-м ехъу ахэм ахэлэжьагъ. ТапэкIи ащ фэдэ шIыкIэм зедгъэушъомбгъущт, зыныбжь хэ­кIотагъэхэр зыщызэIукIэн, зыщызэдэгущыIэн, яуахътэ зыщагъэкIон, ныбджэгъу­кIэхэр къызыщагъотын алъэкIыщт Iэрыфэгъу чIыпIэхэр зэтедгъэпсыхьащтых. Ащ фэдэ проектхэр жъышъхьэ мафэ Адыгеим щагъотынымкIэ Iофы­шхоу зэшIотхырэм изы Iа­хьэу щытых», — къыIуагъ КъумпIыл Мурат.