Красногвардейскэ районым и КЦСОН
Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлэжьэнэу къыхахыгъэ апэрэ купэу нэбгырэ 18 хъурэм яеджэн иящэнэрэ едзыгъо республикэм щылъэкIуатэ.
Ар шъолъыр ыкIи муниципальнэ гъэIорышIэным фэгъэхьыгъ. Еджэным азыфагу къыдэфэрэ стажировкэхэм къадыхэлъытагъэу ветеранхэм къыхахыгъэ сэнэхьатым елъытыгъэу IофшIапIэхэм ащыIэхэу яIэпэIэсэныгъи хагъэхъуагъ.Программэу «Адыгеим и ЛIыхъужъхэр» зыфиIорэм хэлажьэхэрэм ащыщ Евгений Праздниковыр. Ар Мыекъопэ районым лъэпкъ культурэмкIэ къоджэ Гупчэм ипащэ игуадз. Ащ ыпэкIэ ар инженернэ-сапернэ батальоным ипащэ игуадзэу къулыкъур ыхьыгъ, игъэхъагъэхэм афэшI я II-рэ шъуашэ зиIэ бгъэхалъхьэу «За заслуги перед Отечеством» зыфиIорэр къыфагъэшъошагъ.Евгений Праздниковым АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч игъэсэкIо шъхьаIэу иIэпэIэсэныгъэ хигъэхъуагъ. Джащ фэдэу Мыекъопэ районым иадминистрацие ипащэу Михаил Марьиным ынаIэ къытырегъэты.Анахь шъхьаIэу анаIэ зытырагъэтыгъэр гъэцэкIэкIо хэбзэ къулыкъухэм яIофшIэн ыкIи япшъэрылъхэр зэрагъэшIэнхэр ары. АщкIэ ягъэсакIохэм мэхьанэшхо яI.ТигущыIэгъу иIэпэIэсэныгъэ хегъэхъофэ социальнэ фэIо-фашIэхэр зыгъэцэкIэрэ Зэхэубытэгъэ гупчэхэр, IофшIэнымкIэ ыкIи социальнэ ухъумэнымкIэ гупчэхэр, унэ-интернатхэр, зизакъоу псэурэ нэжъ-Iужъхэм яунэхэр къыкIухьагъэх. А зэпстэуми адакIоу къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ зэхищэрэ лIыхъужъныгъэм иурокхэм, зэIукIэгъухэм ар чанэу ахэлажьэ, лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм къыдыхэлъытэгъэ «Зарница 2.0-м» хэтыгъ.— Сызхэлэжьэрэ программэм иапэрэ едзыгъоми, ятIонэрэми япхыгъэ стажировкэхэм шIэныгъэ дэгъу ащызэзгъэгъотыгъ. Социальнэ псэуалъэу республикэм итхэр, зэкI пIоми хъунэу, къэскIухьагъэх, цIыфхэр зэрэпсэухэрэр, Iоф зэрашIэрэр, зызэрагъэпсэфырэр сшъхьэкIэ зэзгъэлъэгъугъ. Аужырэ уахътэр нахьыбэу Мыекъопэ районым щысхьыгъ, ащ ит къоджэ псэупIэхэм япащэхэм икIыгъэ илъэсым ашIэгъэ IофшIэныр зыщызэфахьысыжьыгъэ зэхэсыгъохэм сачIэсыгъ. ЦIыфхэм ягумэкIыгъохэу пащэхэм къафагъазэхэрэм, ахэр зэрэзэшIуахыхэрэм сядэIугъ. ГъэцэкIэкIо хэбзэ къулыкъухэм яIофшIэн зызэрэщызгъэгъозагъэм дакIоу, ныбжьыкIэхэм ядзэ— патриотическэ пIуныгъэ зэпызгъэугъэп, ар лъэшэу сыгу рихьырэ лъэныкъохэм ащыщ, — хигъэунэфыкIыгъ Евгений Праздниковым.Шъугу къэдгъэкIыжьын, УФ-м и Президентэу Владимир Путиныр зикIэщэкIо федеральнэ программэу «ЛIыхъужъхэм яуахът» зыфиIоу гъэрекIо щегъэжьагъэу агъэцакIэрэм имэхьанэ зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъырхэри ащ фэдэ проектым игъэцэкIэн фежьэнхэу. Ащ къыдыхэлъытагъэу, АР-м и ЛIышъхьэу КъумпIыл Мурат иунашъокIэ шъолъыр программэу «Адыгеим и ЛIыхъужъхэр» зыфиIорэр пхыращы.— Зидзэ пшъэрылъхэр щытхъу хэлъэу зыгъэцэкIагъэхэм ыкIи джыри зыгъэцакIэхэрэм тапэкIи Адыгеими, Урысыеми яхэхъоныгъэ яшIуагъэ зэрэхалъхьащтым сицыхьэ телъ, — къыIуагъ АР-м и ЛIышъхьэу КъумпIыл Мурат.