Урысыем и ДОСААФ и Мыекъопэ авиационнэ-спорт клуб «Пчъэ зэIухыгъэхэм ямафэ» ригъэкIокIыгъ. Юрий Гагариным иапэрэ быбыгъо илъэс 65-рэ ыкIи космическэ отраслэр илъэс 80 зэрэхъугъэхэм Iофтхьабзэр афэгъэхьыгъагъ.
Мыекъопэ къэралыгъо технологическэ университетым и Дзэ егъэджэн гупч Iофтхьабзэр зыщыкIуагъэр. Ащ къеблэгъагъэх АР-м иветеранхэм я Совет, парапланернэ клубэу «Полет» зыфиIорэм, Мыекъопэ егъэджэн авиационнэ полкым, ДОСААФ-м иавиамодельнэ клуб, Краснодар краим авиамодельнэ спортымкIэ и Федерацие ялIыкIохэр, Дзэ-ошъогу академием идзэ егъэджэн научнэ гупчэ икурсантхэр.Iофтхьабзэм ипшъэрылъыр — быбын IофымкIэ ухьазырыныгъэ ягъэгъотыгъэныр, цIыф зэрымыс быбырэ пкъыгъохэр (дронхэр) зэрагъэIорышIэщтхэр ягъэшIэгъэныр, патриотизмэм ыкIуачIэ гъэпытэгъэныр.
Пэублэм республикэм иветеранхэм я Совет итхьаматэу Къоджэ Аслъан ныбжьыкIэхэм закъыфигъэзагъ. СыдигъокIи, Хэгъэгу зэошхом илъэхъани мы уахътэми, дзэ пшъэрылъхэр зэшIохыгъэнхэмкIэ авиацием кIуачIэу иIэр къафиIотагъ.Мыекъуапэ икIэлэеджакIохэу къырагъэблэгъагъэхэм мы мафэр мэфэкI шъыпкъэ афэхъугъ. Ошъогум дэбыбэенхэр зихъопсапIэхэм нэрылъэгъу къафашIыгъэр макIэп. Дзэ частым истаршэ летчик-инструкторэу Алексей Кузнецовым ныбжьыкIэхэм ащыщ къахищи, летчик шъуашэр, шлемыр зызэрэщалъэхэрэр, кислород нэгуихъор къухьэлъатэм зэрэпашIэрэр щысэу къаригъэлъэгъугъ.ЕзыгъэжьэгъэкIэ парапланеристхэри быбыным фэхьазырыгъэх. Парапланернэ клубэу «Полетым» ипащэу Игорь Потапкиным «кабинэм» ригъэтIысхьагъэх, зэрэбгъэIорышIэщтыри къафиIотагъ. Ащ пышIэгъэ системэхэу зэрэрапхыхьэхэрэм килограмм 30 фэдиз къещэчы.Мыекъопэ авиационнэ-спорт клубым ипащэу Евгений Антошкиным къызэриIуагъэмкIэ, Iофтхьабзэр зэхащэныр къадэзгъэхъугъэр грант IэпыIэгъоу къыдахыгъэр ары.— Авиацием ылъэныкъокIэ дзэ-патриотическэ пIуныгъэ ныбжьыкIэхэм языгъэгъотырэ организациеу тыщыт. БыбынымкIэ ублэпIэ ухьазырыныгъэ зыщагъотыщт курсхэр къызэIутхыгъэх, ащ мы уахътэм ехъулIэу нэбгырэ 60 фэдиз щеджэ. Грантищ къитхыгъ, джыри яплIэнэрэр тэгъэхьазыры, къыдэтхыным тыщэгугъы. Ащ ишIуагъэкIэ тиIоф зедгъэушъомбгъущт, — хигъэунэфыкIыгъ Евгений Антошкиным.«Пчъэ зэIухыгъэхэм ямафэ» къэгъэлъэгъонэу къыщызэIуахыгъэм цIыф зэрымыс быбырэ пкъыгъохэм радиокIэ агъэIорышIэрэ авиамодельхэм, парапланхэм, парашют пкъыгъохэм яплъынхэ амал яIагъ. Быбырэ пкъыгъохэр зэрагъэIорышIэщтхэр, космическэ лъэныкъомкIэ гъэхъагъэу ашIыхэрэр дзэ-научнэ гупчэм икурсантхэм ныбжьыкIэхэм къафаIотагъ.КIэлэцIыкIухэм шIэныгъакIэхэр зэрагъотыгъэм дакIоу, джырэ технологиехэм нэIуасэ афашIыгъэх. Хэта зышIэрэр, тапэкIэ а лъэныкъуакIэм зыфэзыгъэзэщтхэр ахэм къахэкIынхэкIи хъун. ЦIыф зэрымыс авиацием идунай кIэлэцIыкIухэм лъэшэу агу зэрэрихьыгъэр къахэщыгъ.Шъугу къэдгъэкIыжьын, УФ-м зыкъэухъумэжьынымкIэ и Министерствэ цIыф зэрымыс быбырэ пкъыгъохэм (БПЛА) ядзэхэм ягъэпсын икIыгъэ илъэсым ыкIэхэм ригъэжьагъ. Джащ фэдэу быбырэ пкъыгъохэр гъэIорышIэгъэнхэмкIэ шIэныгъэхэр ныбжьыкIэхэм нахь аIэкIэлъ. Зэзэгъыныгъэ шIыкIэм тетэу къулыкъур зыхьынэу шIоигъоныгъэ зиIэхэу Мыекъуапэ щыпсэухэрэм дзэ комиссариатэу ащ дэтым зыщарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр, е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.Джащ фэдэу шъхьадж зыщыпсэурэ чIыпIэм щыIэ дзэ комиссариатым зыфэжъугъазэмэ, шъуищыкIэгъэ къэбарыр яжъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбарыр ижъугъотэщт.Iэшъынэ Сусан.