Унагъом ихъарзынэщ
Унэгъо ныбжьыкIэхэм псэукIэ амалэу яIэхэр нахьышIу шIыгъэнхэм фэгъэхьыгъэ къэралыгъо программэу 2006-рэ илъэсым аштагъэр Шэуджэн районым чанэу щыпхыращы. Аужырэ илъэситIум унагъохэу псэупIэ сертификатхэр районым щыщэу зэратыгъэхэм ягугъу къытфишIыгъ чIыпIэ администрацием иIофышIэу Бгъошэ Саидэ.
— 2008-рэ илъэсым къыщыублагъэу мы программэм ишIуагъэкIэ илъэс къэс унэгъуи 7 — 8-мэ сертификатхэр яттынхэ тэлъэкIы. 2025-рэ илъэсым районым щыпсэурэ унэгъо ныбжьыкIи 6-мэ псэупIэ яIэ хъугъэ, неущырэ мафэм яцыхьэ телъэу псэунхэ амал яI. Ахэм мы лъэхъэнэ благъэхэм зычIэсыщтхэ унэм иIофыгъохэр зэшIуахынхэ алъэкIыщт. Унэгъо ныбжьыкIэхэр, сабыибэ зэрысхэр, хэушъхьафыкIыгъэ дзэ операцием хэлажьэхэрэм яунагъохэр программэм хэлажьэх. Унагъоу нэбгыри 3 зэрысым сомэ миллиони 2,5-рэ фэдиз раты. Унэр къызэращэфыщтым ипроцент 60-р ныбжьыкIэмэ ямылъку, процент 40-р программэм къыкIэкIо. Къыхэзгъэщымэ сшIоигъу, район администрацием ипащэу Аулъэ Рэщыдэ программэм хэлэжьэрэ унэгъо пчагъэм зэрэхигъэхъощтым, чIыпIэ бюджетым къыхэкIырэ мылъкуми зэрэригъэхъущтым апылъ, — къеIуатэ Бгъошэ Саидэ.ТигущыIэгъу къызэрэхигъэщыгъэмкIэ, унэгъо 62-рэ чэзыум хэт. Сабыибэ зэрыс, хэушъхьафыкIыгъэ дзэ операцием хэлажьэхэрэм яунагъохэр апэ рагъэшъых.УнэчIэхьажьым зыфагъэхьазырыЗэшъхьэгъусэхэу Отэщыкъо Саидэрэ Рамзинрэ зызэдэпсэухэрэр илъэс 12 хъугъэ, сабыищ зэдапIу. Унагъом имэхьанэ зэхашIэу, гуфэбэныгъэ зэфыряIэу мэпсэух, якIэлэцIыкIухэу Расим, Камиллэ ыкIи Адам къаIэтых.— ЦIыфхэм ящыIакIэ нахьышIу шIыгъэнымкIэ Адыгеим щагъэцэкIэрэ IофшIэным пае республикэм ипащэхэм сафэраз. Сабыибэ зэрыс унагъохэм хабзэр IэпыIэгъу зэрафэхъурэм мэхьанэшхо иI. Ащ неущырэ мафэм тыщегъэгугъы, тыгу нахь зыкъеIэты. ИщыкIэгъэ тхылъхэр зытыугъоигъэ нэуж илъэсрэ тичэзыу тежагъ ыкIи сомэ миллиони 2,5-рэ зэрыт сертификатыр къытатыгъ. Мыекъуапэ унэ къыщытщэфыным тыпылъ. ТикIалэхэм зыкъаIэтэу еджакIо ащ зыкIохэкIэ, зэрысын унэ яIэщт, — еIо Саидэ.ТигущыIэгъу къызэриIотагъэмкIэ, ишъхьэгъусэ иунэе Iоф фежьагъэу къуаджэм щэлажьэх, щагубзыухэр ахъух, социальнэ зэзэгъыныгъэмкIэ къыратыгъэ мылъкур ыгъэфедагъ. Сабыйхэм зыкъызаIэтыкIэ, янэ-ятэхэм IэпыIэгъу афэхъунхэм Рамзин ахэр фегъэхьазырых.Унагъом ылъапсэ къызщежьэрэмкIэ бысым гуащэм теупчIыгъ.— ЗэгурыIоныгъэмрэ лъытэныгъэмрэ унагъом ылъапсэх. Унэгъо зэфыщытыкIэхэр гъэпытэгъэнхэм, шэн-хэбзэ-зэхэтыкIэхэм ямэхьанэ тиунагъокIэ къыдгурэIо. Тинахьыжъ тэгъэлъапIэ, зэгурыIоныгъэ тиунагъо илъыным ныбжьыкIэхэр фэтэпIух, пщэрыхьаным ишъэфхэр пшъашъэм есэгъашIэ. КIэлитIум тыр нахь афэгъэзагъ, — еIо Саидэ.Отэщыкъохэм якIэлэцIыкIухэр лъэныкъо зэфэшъхьафхэмкIэ къахэщых. КIэлэ нахьыжъэу Расим илъэс 11 ыныбжь футболыр икIас. Япшъашъэу Камиллэ илъэси 7 ыныбжь, лъэпкъ къашъохэмрэ орэдхэмрэ зэрегъашIэ. АнахьыкIэу Адам илъэси 4 ыныбжь кIэлэцIыкIу IыгъыпIэм макIо.— УныбжьыкIэмэ, къуаджэм щыIэкIэ-псэукIэ дэгъу уиIэу удэсыным фэшI амалыбэ щыI. Тыкъызщыхъугъэ тикъоджэ гупсэ тыщэпсэу, Iоф щытэшIэ, ащ гухахъо хэтэгъуатэ. ЧIыгум удэлажьэмэ, къыотэжьыщт, былымхэр, щагубзыухэр пхъухэмэ, уагъэшхэщт, — еIо Саидэ.Непэрэ охътэ мыпсынкIэу тызхэтым сабыищ ппIуныр зэрымыIэшIэхыр кIэухым Саидэ къыхигъэщыгъ. Унэгъо ныбжьыкIэхэм хабзэм IэпыIэгъоу аритырэм зэрэщыгушIукIырэр къыIуагъ. ЯщыIэныгъэ гъогукIэ ны мылъкум, унэгъо ныбжьыкIэхэм аратырэ сертификатым яшIуагъэ къызэрэкIуагъэр хигъэунэфыкIыгъ.Лъэпшъыкъо Фатим.