ОситIур зэтекIы

Амыгъэкощырэ мылъку пэпчъ оситIу иI: бэдзэр уасэмрэ кадастрэ уасэмрэ. МэкIэ дэд ахэр зэрэзэтефэрэр.Кадастрэ уасэкIэ тызаджэрэр амыгъэкощырэ мылъкумкIэ уасэу къэралыгъом ыгъэнафэрэр ары. ХэбзэIахьхэм, къэралыгъо пошлинэхэм, бэджэндыпкIэм ягъэнэфэнкIэ, къэралыгъом аIихыгъэ мылъкур къызэращэфыжьыщт уасэм игъэнэфэнкIэ ар къызфагъэфедэ.Платформэу «Национальная система пространственных данных» (nspd.gov.ru)зыфиIорэмкIэ амыгъэкощырэ мылъкум икадастрэ уасэ зэжъугъэшIэн шъулъэ­кIыщт. Ащ пае фэIо-фашIэу «Фонд данных ГКО» (https://nspd.gov.ru/cadastralprice/search?zoom=­18­&coor­dinate_x=6751606.647648821&­coordinate_y=7726639.536053959&baseLayerld=235) зыфиIорэм шъуихь, «Амыгъэкощырэ мылъкум ибэдзэр уасэ ехьылIэгъэ къэбархэр» зыфиIорэ чIыпIэм шъутеIункI, амыгъэкощырэ мылъкоу шъуиIэм икадастрэ номер ишъутх.Амыгъэкощырэ мылъкум ибэдзэр уасэкIэ тызаджэрэр бэдзэр шъхьэихыгъэм ар щащэн зэралъэкIыщт уасэр ары. НэмыкIэу къэпIон хъумэ, мылъкум ыпкIэу ар зием е осэшIым ыгъэнафэрэр ары.Амыгъэкощырэ мылъкумкIэ зичэзыу къэралыгъо кадастрэ уасэр илъэси 4-м зэ агъэнафэ. Псэуалъэр зыдэщыIэ чIыпIэр, ащ иинагъэ, зыфытегъэпсыхьагъэр мыщ дэжьым къыдалъытэх. Амыгъэкощырэ мылъкур къамыплъыхьэу кадастрэ уасэр агъэнафэ.Бэдзэр уасэр къырадзэ зыхъукIэ, ащ гъэцэкIэжьын IофшIэнхэр рашIылIэгъэ— рамышIылIагъэм, балкон е лоджие иIэ-имыIэм, общественнэ транспорт уцупIэхэм зэрапэIудзыгъэм, къапэблагъэу транспорт уцупIэ, еджапIэ, кIэлэцIыкIу IыгъыпIэ, сатыушIыпIэ, парк щыIэ-щымыIэм мэхьанэ араты.