МКъТУ
Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлэжьэнэу къыхахыгъэ апэрэ купэу нэбгырэ 18 хъурэм яеджэн иящэнэрэ едзыгъоу «Шъолъыр ыкIи муниципальнэ гъэIорышIэныр» зыфиIорэр рагъэжьагъ.
Ащ фэгъэхьыгъэ зэIукIэу Мыекъопэ къэралыгъо технологическэ университетым щыкIуагъэм хэлэжьагъэх АР-м и Къэралыгъо Совет — Хасэм и Тхьаматэ игуадзэу, хэушъхьафыкIыгъэ дзэ операцием иветеранхэм я Ассоциацие ипащэу, Урысыем и ЛIыхъужъэу Цэй Эдуард, АР-м и ЛIышъхьэрэ иминистрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Бэгугъэ Азэмат, РАНХиГС-м икъутамэ — гъэIорышIэнымкIэ Къыблэ Урысые институтым ипащэ игуадзэу Алексей Барановыр, программэм ипхырыщын хэлэжьэрэ къулыкъухэм ыкIи гъэсэныгъэм иучреждениехэм ялIыкIохэр.КъэгущыIагъэхэм япсалъэ къыщыхагъэщыгъэр тишъолъыр тапэкIэ хэхъоныгъэ ышIынымкIэ ыкIи зисэнэхьаткIэ IэпэIэсэныгъэ зыхэлъ цIыфхэр гъэхьазырыгъэнхэмкIэ мы программэм мэхьанэшхо зэриIэр ары.
Шъугу къэдгъэкIыжьын, хэушъхьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэным фэгъэхьазырыгъэнхэм программэр тегъэпсыхьагъ.— Программэр едзыгъуиплIэу зэтеутыгъ. Апэрэр — шышъхьэIум и 25-м къыщегъэжьагъэу Iоныгъом и 4-м нэс рекIокIыгъ. ЯтIонэрэ едзыгъор тыгъэгъазэм ыгузэгухэм лъыпадзэжьи, «Экономикэр ыкIи финансхэр» зыфиIорэ лъэныкъор зэрагъэшIагъ. Еджэгъухэм азыфагу къадафэу ветеранхэр IофшIапIэхэм ащыIэхэу яшIэныгъэхэм ахагъэхъуагъ. Ящэнэрэ едзыгъоу мэфипшIым телъытагъэр джы рагъэжьагъ. Ар шъолъыр ыкIи муниципальнэ гъэIорышIэным фэгъэхьыгъэщт. Ащ къыдыхэлъытагъэу, чIыпIэхэм яхэхъоныгъэ зэрэзэхэтыр, ныбжьыкIэ политикэр, къолъхьэ тын-Iыхыным пэшIуекIогъэным ишапхъэхэр, инвестиционнэ политикэр ветеранхэм арагъэшIэщт, — хигъэунэфыкIыгъ Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хагъэхъонымкIэ ишъолъыр Гупчэ ипащэу Паф Фатимэ.Программэм хэлажьэхэрэм тестированиер акIугъ, лекцие къафеджагъэх ыкIи зыдэщыIэгъэхэ стажировкэхэм якIэуххэм атегущыIагъэх. Едзыгъом фытегъэпсыхьэгъэ программэ гъэнэфагъэм тетэу еджэныр лъагъэкIотэщт.Урысые форумэу «Малая родина — сила России» зыфиIоу джырэблагъэ щыIагъэм УФ-м и Президентэу Владимир Путиным къыщиIуагъ муниципальнэ хабзэм шIуагъэ къытэу Iоф ышIэнымкIэ ищыкIэгъэ унашъохэр аштэнхэм программэу «ЛIыхъужъхэм яуахътэ» ыкIи ащ фэдэ шъолъыр программэхэм ахэлэжьэрэ ветеранхэр зэрэфэхьазырхэр.— Владимир Путиным тэрэзэу зэрэхигъэунэфыкIыгъэмкIэ, цIыфхэмкIэ мэхьанэ зиIэ проектхэр пхырыщыгъэнхэмкIэ, дзэкIолI акъошхэм ыкIи ахэм яунагъохэм IэпыIэгъу афэхъугъэнымкIэ хэушъхьафыкIыгъэ дзэ операцием иветеранхэм яIэпэIэсэныгъэ гъэфедэгъэным мэхьанэшхо иI. ТидзэкIолIхэм ыкIи ахэм яунагъохэм IэпыIэгъу афэхъугъэныр Адыгеим ыпэ щидгъэшъырэ лъэныкъохэм ащыщ. АщкIэ лъэшэу къыддеIэх федеральнэ пащэхэр, партиеу «Единэ Россиер», гуфакIохэр, сатыушIхэр, общественнэ IофышIэ пэрытхэр, цIыф къызэрыкIохэр. Сэнэхьат ухьазырыныгъэмкIэ программэу «Адыгеим и ЛIыхъужъхэр» зыфиIорэм хэлажьэхэрэм еджэныр къызаухыкIэ, мы IофшIэныр чанэу зэрэлъагъэкIотэщтым сицыхьэ телъ, — хигъэунэфыкIыгъ АР-м и ЛIышъхьэу КъумпIыл Мурат.IЭШЪЫНЭ Сусан.