Чъыгхэм япчъагъэ хагъахъо

Тыкъэзыуцухьэрэ дунаим изытет нахь дахэ, нахьышIу шIыгъэным фытегъэпсыхьэгъэ Iофтхьабзэу партиеу «Единэ Россием» пэщэныгъэ дызэрихьэзэ зэхащагъэр Адыгеим икъэлэ шъхьаIэ щыкIуагъ.

Къэлэ паркым идэхьагъум дэжь чъыг цIыкIухэмрэ куандэхэмрэ щагъэтIысхьагъэх. Ащ хэлэжьагъэх Адыгеим и ЛIы­шъхьэу КъумпIыл Муратрэ ныбжьыкIэхэм я Урысые Союз и Тхьаматэу Дмитрий Покровскэмрэ.Джащ фэдэу а Iофтхьабзэм хэлэжьагъэх Мыекъуапэ имэрэу Геннадий Митрофановыр, къэлэ администрацием илIыкIохэр, депутатхэр, «Единэ Россием» хэтхэр, ныбжьыкIэ ыкIи общественнэ организациехэм ялIыкIохэр, гуфакIохэр, чIыпIэ бизнесым илIыкIохэу компание купэу «Дарстроим» хахьэхэрэр.Гухэлъ гъэнэфагъэм тетэу чъыгхэм ягъэтIысхьан макIо. ЧIыпIэм изытет къы­пкъырыкIыхэзэ, общественнэ мэхьанэ зиIэ чIыпIэхэм язэтегъэпсыхьан къыда­лъытэзэ, чъыгхэр агъэтIысхьэх. Мэлылъфэгъум ыкIэм ехъулIэу къэлэ паркым чъыг лъэпсэ цIыкIоу мини 2-м ехъу щагъэтIысхьащт: лэнчъэ, хэшъэе, сэснэй, нэмыкI чъыг лъэпкъ зэ­фэшъхьаф­хэр.Къалэр нахь шхъуантIэу, нахь теплъэ дахэ иIэу хъуным фэгъэхьыгъэ IофшIэн игъэкIотыгъэр партиеу «Единэ Россием» ипроектэу «Къэбзэныгъэ зэрылъ хэгъэ­гур» зыфиIорэм къыдыхэлъытагъэу ­лъэ­кIуатэ. Мы илъэсым чъыг мини 10 Адыгеим щагъэтIысхьанэу рахъухьагъ, ахэм янахьыбэр къалэу Мыекъуапэ те­лъытагъ.Социальнэ проектхэм япхырыщын чанэу хэлажьэх бизнесым илIыкIохэр. Адыгэ Республикэм иминистрэхэм я Кабинет хэтхэмрэ чIыпIэхэм япащэхэмрэ бэмышIэу КъумпIыл Мурат адыриIэгъэ зэIукIэм пшъэрылъ къащыфишIыгъагъ муниципалитетхэм язэтегъэпсыхьан псэо­лъэшIхэр нахь игъэкIотыгъэу къыха­гъэ­лэжьэнхэу, ащ къызэрэхигъэщыгъэмкIэ, инфраструктурэ гъэнэфагъэр цIыф­хэр зычIэсыщт унэхэм яшIын диштэн фае.«Мыекъуапэ итеплъэ нахь дахэ, нахь гуIэтыпIэ зэрэхъущтым игъорыгъозэ ты­дэлажьэ. А IофшIэным пшъэрылъ заулэ къызэлъеубыты: къалэр нахь зэтегъэ­псыхьэгъэныр, чъыгхэр, куандэхэр на­хьыбэу гъэтIысхьэгъэнхэр, тарихъ мэхьа­нэ зиIэ унэхэр зыпкъ игъэуцожьыгъэнхэр, зекIохэр нахьыбэ зэрэхъущтхэм тегъэпсыхьэгъэ ыкIи нэмыкI Iофтхьэбзэ заулэ. Партиеу «Единэ Россием» Iэпы­Iэгъушхо къытеты, гъэпсын IофшIэныбэ ащ тетэу зэшIохыгъэ мэхъу. Общественностым щыщхэр, бизнесым илIыкIохэр, гуфакIохэр, ныбжьыкIэхэр — къалэмрэ республикэмрэ къарыкIощтым, ахэм афэхъущт зэхъокIыныгъэхэм агъэгумэкIырэ пстэури а IофшIэным къыхэтэ­гъэлажьэ. КIэух гухэлъэу тиIэр Адыгеим икъэлэ шъхьаIэ щыпсэухэрэм щыIэкIэ Iэрыфэгъу, щыIэкIэ дэгъу яIэныр ыкIи зекIохэр нахьыбэу къызфэтщэнхэр ары», — къыIуагъ АР-м и ЛIышъхьэ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.