Джырэ уахътэм диштэу зэтырагъэпсыхьащт общественнэ чIыпIэхэм якъыхэхынкIэ Урысые онлайн-мэкъэтыныр 2026-рэ илъэсым мэлылъфэгъум и 21-м къыщегъэжьагъэу мэкъуогъум и 12-м нэс кIощт.
А уахътэм республикэм имуниципалитети 9-мэ ащыпсэухэрэм лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытэгъэ федеральнэ проектэу «Iэрыфэгъу къэлэ щыIакIэр гъэпсыгъэныр» зыфиIорэм диштэу 2027-рэ илъэсым зэтырагъэпсыхьащт псэуалъэхэр къыхахыщтых.Мы проектым диштэу 2026-рэ илъэсым ыкIэм нэс общественнэ чIыпIи 3 зэтырагъэпсыхьащт: Успение Пресвятой Богородицы зыфиIорэ чылысэу Мыекъуапэ дэтым къыпэIулъ скверыр; БжыхьэкъоякIэм культурэм и Унэу дэтым дэжь кIэлэцIыкIу джэгупIэу щыгъэпсыгъэр; Яблоновскэм икIэлэцIыкIу-спорт джэгупIэ. Зэтырагъэпсыхьащт мыщ фэдэ псэуалъэхэр гъэрекIо ежь цIыфхэм къызэрэхахыгъэхэм мэхьанэшхо иI.«ЦIыфхэм яшIошI къыдэтлъытэзэ, 2027-рэ илъэсым зэтырагъэпсыхьащт зичэзыу псэуалъэхэм яспискэ зэхэтэгъэуцо. ЗэнэкъокъумкIэ шапхъэу щыIэхэм зэхъокIыныгъэхэр афэхъугъэх, ащ хэлэжьэрэ проектхэм ахэхъуагъ. Джы мэкъэтыныр нэбгырэ мин 20-м ехъу зыдэс псэупIэхэм, джащ фэдэу псэупIэ шъхьаIэхэм ащыкIощт», — къыIуагъ Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.Республикэм имуниципальнэ образовании 9-мэ ахэхьэрэ чIыпIэхэр ары зэтырагъэпсыхьажьынхэу къагъэлъэгъуагъэхэр.МыекъуапэкIэ: Хэгъэгу зэошхом хэкIодагъэхэм ясаугъэт, Чернобыльскэ АЭС-м къыщыхъугъэ аварием икIэуххэр дэзыгъэзыжьыгъэхэм ясаугъэт, ур. Шоссейнэм тет аллеер (ур.Крайнэм къыщежьэ, я 6-рэ переулкэм нэсы), Черемушкэм дэт паркыр.АдыгэкъалэкIэ: ур. Пролетарскэм кIэлэцIыкIу джэгупIэу тетыр, ур. Пролетарскэмрэ Чайковскэм иурамрэ къапэIулъ скверыр.ИнэмкIэ: къутырэу Суповскэм дэт кIэлэцIыкIу джэгупIэр, къутырэу Новый сад щагъэпсыгъэ кIэлэцIыкIу джэгупIэр.ЯблоновскэмкIэ: ур. Космическэм тет кIэлэцIыкIу джэгупIэр, еджапIэу N 15-м къыпэIулъ общественнэ чIыпIэр, ур. Железнодорожнэм щагъэпсыгъэ спорт джэгупIэр.ДжаджэкIэ: ур. Краснэм тет скверэу «Центральный» зыфиIорэр (ятIонэрэ чэзыу), культурэм и Унэу П. Х. Афанасовым ыцIэ зыхьырэм къыпэIулъ общественнэ чIыпIэр.КощхьаблэкIэ: пчэи мэзцIыкIур, урамэу Степноим щагъэпсыгъэ кIэлэцIыкIу джэгупIэр.КрасногвардейскэмкIэ: культурэмкIэ зыгъэпсэфыпIэ паркыр (ящэнэрэ чэзыу), Черемушкэм хэхьэрэ общественнэ чIыпIэр.Мыекъопэ районымкIэ: ст. Кужорскэм иурамэу Лениным ыцIэ зыхьырэм иобщественнэ чIыпIэ, ХъымыщкIэй иурамэу Советскэм испорт джэгупIэ ылъэныкъокIэ гъэзэгъэ общественнэ чIыпIэр.Шэуджэн районымкIэ: Хьакурынэхьаблэ игупчэ хэхьэрэ чIыпIэр, хэушъхьафыкIыгъэ дзэ операцием хэлажьэхэрэм яскверэу Заревэм дэтыр.«Мы псэупIэхэм адэсхэу зыныбжь илъэс 14-м ехъугъэхэр платформэ зыкIэу «zagorodsreda.gosuslugi.ru» зыфиIорэм амакъэ щатынэу къесэгъэблагъэх. ЦIыфхэм яшIошIхэр икъоу зэрагъэшIэным пае ищыкIэгъэ амалхэр зэрахьанэу пшъэрылъ афэсшIыгъ. ЗэтебгъэпсыхьанкIэ анахь къекIурэ чIыпIэр къыхахынымкIэ, чIыпIэрысхэмкIэ ар гуIэтыпIэ шIыгъэнымкIэ псэупIэм дэс нэбгырэ пэпчъ ымакъэ мэхьанэ иI.УФ-м и Президентэу Владимир Путиным зэрэхигъэунэфыкIыгъэмкIэ, «джырэ уахътэм диштэрэ щыIакIэ гъэпсыгъэн, тикъалэхэмрэ поселкэхэмрэ нахь дахэ шIыгъэнхэ фае. Мыщ дэжьым мэхьанэ зиIэр теплъэу яIэмрэ тарихъ кIэнымрэ къызэтегъэнэжьыгъэнхэр ары». Мыщ фэдэ пшъэрылъым изэшIохынкIэ лъэныкъо пстэури къыдэтэлъытэ, программэ зэфэшъхьафхэр къызфэтэгъэфедэх. ГущыIэм пае, «Единэ Россиер» кIэщакIо зыфэхъугъэ экологическэ проект заулэмэ япхырыщын ыуж тит. Мыгъэ чъыг мини 10 республикэм, Адыгеим икъэлэ шъхьаIи ахэм зэрахэтэу, щыдгъэтIысхьащт.Анахьэу мэхьанэ зиIэр зэтырагъэпсыхьащт чIыпIэр къыхихынэу нэбгырэ пэпчъ амал зэриIэщтым дакIоу, шIыхьафхэми ахэлэжьэн, Адыгеим ипсэупIэ пэпчъ Iэрыфэгъу щыIакIэ иIэным иIахь хишIыхьан ылъэкIыщт», — къыIуагъ КъумпIыл Мурат.