Музеим ихъарзынэщ
КъокIыпIэ лъэпкъхэм яискусствэкIэ Къэралыгъо музеим икъутамэу Мыекъуапэ щыIэм сакурэм икъэгъэгъэн фэгъэхьыгъэ мэфэкI щыкIуагъ. Хабзэ зэрэхъугъэу, 2021-рэ илъэсым къыщегъэжьагъэу ар хагъэунэфыкIы ыкIи къэлэдэсхэри хьакIэхэри зажэхэрэ Iофтхьабзэ хъугъэ.
Непэ сакурэ лъэпкъ 70-м нахьыбэ музеим ищагу къыщэкIы. Ау ахэм ятарихъ къызщежьагъэр 2014-рэ илъэсым агъэтIысхьэгъэгъэ апэрэ чъыгихыр ары. Илъэс къэс хагъахъозэ чъыгхэтэшхо хъугъэ ыкIи къалэм илъэгъупхъэ чIыпIэхэм къахэуцуагъ. Апэрэ чъыгхэр къызщытIэмыхэрэм къыщегъэжьагъэу цIыфыбэ музеим къакIо, сурэтхэр зыщытырахых. ЗэкIэри зэфэдэу къызщыкъэгъагъэрэм мэфэкIыр рекIокIы. Музеим иIофышIэхэм къызэрэхагъэщыгъэмкIэ, азыфагу мэфабэ къыдэмыфэу мыгъэ чъыгхэм зэкIэми къэгъагъэхэр къащызэIуихыгъэх. Арышъ, мызыгъэгурэ мэфэкIыр дэхагъ.Зэрэхабзэу, ащ Iофтхьэбзэ зэфэшъхьафхэр къыдыхэлъытэгъагъэх. Мыекъуапэ итворческэ купхэм къагъэхьазырыгъэ къэгъэлъэгъон иным мэфэкIыр къызэIуихыгъ. Ащ нэмыкIэу, музеим икъогъупэ зэфэшъхьафхэм гъэлъэгъопIэ зэмылIэужыгъохэр ащыгъэпсыгъагъэх, мастер-классхэр, экскурсиехэр, шIэныгъэгъозэ сыхьатхэр ащыкIуагъэх, модельерэу Акъущ Фатимэ ишъуашэхэм якъэгъэлъэгъон щы-кIуагъ, сурэтышI ныбжьыкIэхэм язэIукIэ щырекIокIыгъ. Бэмэ ашIогъэшIэгъон хъугъэ къэгъэлъэгъонэу «Бансай» зыфиIорэр. Леонид Фоминым къыгъэкIыгъэ японскэ чъыг цIыкIу 15-р ащ хэхьагъ, анахьыжъыр загъэтIысхьагъэр илъэс 30 фэдиз мэхъу.