ТекIоныгъэм и Мафэ изыфэгъэхьазырын

1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызщыдахыгъэм ия 81-рэ илъэс изыфэгъэхьазырынрэ изэхэщэнрэ афэгъэзэгъэ комитетым изэхэсыгъо АР-м и ЛIышъхьэ и Координационнэ гупчэ щыкIуагъ. Адыгеим и ЛIышъхьэу КъумпIыл Мурат Iофтхьабзэр зэрищагъ.

Зэхэсыгъом хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет хэтхэр, хэбзэухъумэкIо къулыкъухэм, дзэ час­тым, нахьыжъхэм я Совет, ветеранхэм я Совет, Урысыем и Социальнэ фонд Адыгэ РеспубликэмкIэ икъутамэ, муниципалитетхэм япащэхэр.Адыгеим и ЛIышъхьэ къызэрэхигъэщы­гъэмкIэ, ТекIоныгъэм и Мафэ епхыгъэ мэфэкIымрэ Урысыем щыпсэурэ цIыф лъэпкъхэм языкIыныгъэ и Илъэсэу Уры­сыем и Президентэу Владимир Путиным ыгъэнэфагъэмрэ пытэу зэпхыгъэх.«Тихэгъэгу щыпсэурэ цIыф лъэпкъ пстэуми языкIыныгъэрэ язэкъотныгъэрэ яшIуагъэкIэ Хэгъэгу зэошхом текIоныгъэр къыщыдэтхын тлъэкIыгъ. ЦIыф лъэпкъыбэмэ ялIыкIохэр зыщыпсэухэрэ тикъэралыгъо ылъапсэу щыт а зыкIыныгъэр тэгъэпытэ лIыхъужъхэм яблэнагъэ зыщытымыгъэгъупшэу. Непэ ахэм ялIэужхэм хэушъхьафыкIыгъэ дзэ операцием ишъолъыр зэрифэшъуашэу япшъэрылъхэр щагъэцакIэх», — къы­Iуагъ КъумпIыл Мурат.МэфэкI Iофтхьабзэхэм языфэгъэхьазырын фэгъэхьыгъэу къаIотагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт, культурэмкIэ ми­нистрэм иапэрэ гуадзэу Ольга Гавшинам, АР-м ныбжьыкIэ IофхэмкIэ и Комитет итхьаматэу Максим Галушкиным, Адыгеим физкультурэмрэ спортымрэкIэ и Комитет итхьаматэу Дэгужъые Мурат ыкIи нэмыкIхэм.КъызэрэхагъэщыгъэмкIэ, республикэм непэкIэ заом хэлэжьэгъэ, сэкъатныгъэ зиIэ нэбгырэ 14 щэпсэу. ПстэумкIи Хэгъэгу зэошхом иветеранэу шъо­лъырым исыр нэбгырэ 281-рэ, ахэм ахэхьэх зэо кIыбым Iоф щызышIагъэхэр, концлагерым дэсыгъэхэр, блокадэм къыхиубытагъэхэр. Ахэм сомэ мин 50 ыкIи сомэ мини 10 аратыщт.Ащ нэмыкIэу мэфэкI мафэхэм Iоф­тхьэбзэ 400-м ехъу зэшIуахынэу агъэ­нэфагъ. Ахэр мэфэкI ыкIи шIэжь, культурэ, спорт Iофтхьабзэх.Мэлылъфэгъум и 24-м къыщегъэжьагъэу республикэм и Сурэт къэгъэлъэгъуа­пIэ ТекIоныгъэм и Мафэ фэгъэхьыгъэ Iофтхьабзэ щыкIощт. Культурэм иучреж­дениехэмрэ искусствэхэмкIэ кIэ­лэ­цIыкIу еджапIэхэмрэ заом иветеранхэм зэIукIэгъухэр ащыдыряIэщтых, лIыхъужъныгъэм идесэхэр ащызэхащэщтых, зэнэкъокъу­хэр ыкIи театрализованнэ къэгъэлъэ­гъонхэр ащыкIощтых.ЖъоныгъуакIэм и 3-м республикэм иипподром, хабзэ зэрэхъугъэу, шыгъачъэ щыкIощт. НыбжьыкIэ политикэм телъытагъэу Урысые Iофтхьабзэу «Геор­гиевская лента» зыфиIорэр, турнир зэ­фэшъхьафхэр, тарихъ шIэжьым епхыгъэ урокхэр, мастер-классхэр зэхащэщтых, дзэ сымэджэщым щыIэщтых ыкIи нэмыкIхэр зэшIуахыщтых.ЖъоныгъуакIэм и 8-м республикэ филармонием сыхьатыр 12-м щыкIощтых мэфэкI зэIукIэр ыкIи мэфэкI къэгъэ­лъэгъоныр. ЖъоныгъуакIэм и 9-м пчэдыжьым Мыекъуапэ и Гупчэ саугъэт къэгъагъэхэмрэ къэгъэгъэ блэрхэмрэ кIэлъыралъхьащтых. А мэфэ дэдэм пчэдыжьым сыхьатыр 10-м республикэм и Правительствэ зычIэт унэм ыпа­шъхьэ къыщырыкIощтых Мыекъопэ чIы­пIэ гарнизоным иподразделениехэр, хэбзэу­хъу­мэкIо къулыкъухэм, дзэ-еджэпIэ гуп­чэхэм ачIэсхэм ялIыкIохэр ыкIи юн­армейцэхэр. Мыекъуапэ икъэлэ парк мэфэкIыр щылъагъэкIотэщт, дзэ техни­кэм, творческэ купхэм якъэгъэлъэгъон щыIэщт, къекIолIагъэхэр агъэшхэщтых. Къалэм инэмыкI чIыпIэхэми мэфэкI Iофтхьабзэхэр ащыкIощтых. «МыкIоды­жьыщт полкыр» зыфиIорэ Iофтхьабзэр онлайн шIыкIэм тетэу рекIокIыщт. Къалэу Мыекъуапэ игупчэу В. И. Лениным ыцIэкIэ щытым пчыхьэм сыхьатыр 7-м зэрэурысыеу такъикърэ зэрэщышъы­гъощтхэм Адыгеири хэлэжьэщт. Рес­публикэм иныбжьыкIэхэм Iофтхьабзэу «ШIэжьым ишэф остыгъ» зыфиIорэр зэ­хащэщт. ИскусствэхэмкIэ IэпэIасэхэм якъэгъэлъэгъон мэфэкI мэшIоустхъомкIэ аухыщт.Мыекъуапэ имэрэу Геннадий Митрофановым къызэрэхигъэхъожьыгъэмкIэ, мэфэкI Iофтхьабзэхэр анахьыбэу зыщырекIокIыщтхэр Гупчэ саугъэтыр, къэлэ паркыр, ТекIоныгъэм ибульвар ыкIи Лениным ыцIэкIэ щыт гупчэр ары. ТекIоныгъэм и Мафэрэ Урысыем щы­псэурэ цIыф лъэпкъхэм языкIыныгъэ и Илъэсрэ япхыгъэ тамыгъэхэр Iофтхьабзэхэм ащагъэфедэщтых. Социальнэ IэпыIэгъу ятыгъэным фэгъэзэгъэ къулы­къухэмрэ ныбжьыкIэхэмрэ зэгъусэхэу заом ыкIи Iэшэ зэпэуцужьхэм яветеранхэм адэжь кIощтых, дзэкIолIхэм якъэхалъэхэр аукъэбзыщтых.«Тэ типшъэрылъыр Адыгеим щыпсэурэ пэпчъ а хъугъэ-шIэгъэшхом ежьыри зэрэхэщагъэр зэхишIэныр, Хэгъэгур къэ­зыухъумагъэхэм яшIэжь мыкIоды­жьыным, зы лIэужым адрэм лъигъэIэсыжьыным иIахь хишIыхьаныр ары», — къыIуагъ КъумпIыл Мурат.Зэхэсыгъом икIэухым Адыгеим и ЛIышъхьэ муниципалитет пстэуми япащэхэм пшъэрылъ афишIыгъ мэфэкIым ехъулIэу общественнэ чIыпIэхэр, сау­гъэтхэр, дзэ къэхалъэхэр аукъэбзынхэу. Республикэм и ЛIышъхьэ анахьэу анаIэ зытыраригъэдзагъэр ныбжьыкIэхэр а Iофтхьабзэхэм нахьыбэу къахагъэлэ­жьэнхэр, заомрэ IэшэзэIуупIэныгъэхэмрэ яветеранхэм, ахэм яунагъохэм арысхэм аIукIэнхэр, ящыкIэгъэ IэпыIэгъу аратыныр ары. ХэбзэухъумэкIо къулыкъухэм пшъэрылъ афишIыгъ мэфэкI мафэхэм щынэгъончъэу Iофтхьабзэхэр зэкIэ ре­кIокIынхэм анаIэ тырагъэтынэу.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.