А. Балабась
Мэлылъфэгъум и 25-м Адыгэ Республикэм и Къэралыгъо быракъ и Мафэ Адыгеим щыхагъэунэфыкIыщт. Iофтхьабзэр Пушкиным ыцIэ зыхьырэ унэм щыкIощт, пчыхьэм сыхьатыр 5-м рагъэжьэщт.
Адыгеим итворческэ куп цIэрыIохэр ащ хэлэжьэщтых: лъэпкъ орэдхэмкIэ къэралыгъо ансамблэу «Ислъамыер», культурнэ хэхъоныгъэм и Гупчэу «Ошъадэм» иансамблэхэр, творческэ зэхахьэу «Звоницар», адыгэ къашъохэмкIэ кIэлэцIыкIу ансамблэхэу «Мыекъуапэ инэфылъхэр», «Лучиграй» (Тэхъутэмыкъое район), эстраднэ ансамблэу «Ошъутенэр», АР-м изаслуженнэ артистхэу Даутэ Сусанэрэ Элдэрэ Айдэмыррэ.1992-рэ илъэсым гъэтхапэм и 24-м АР-м ихэбзэгъэуцоу «Адыгэ Республикэм и Къэралыгъо быракъ фэгъэхьыгъ» зыфиIорэм къыдыхэлъытагъэу шъолъырым инепэрэ къэралыгъо нып республикэм щаштагъ. АдыгэхэмкIэ ар тарихъ мэхьанэ зиIэ быракъ, ылъапсэ я ХIХ-рэ лIэшIэгъум иублэгъухэм афэкIо. Тиреспубликэ имызакъоу дунаим тет адыгэ пстэури ащ ижьау чIэт ыкIи мэлылъфэгъум и 25-р зэдагъэмэфэкIы. 2013-рэ илъэсым къыщегъэжьагъэу адыгэ быракъым и Мафэ хэтэгъэунэфыкIы. Ащ дэжьым Къэралыгъо Совет — Хасэм ихэбзэихъухьэхэм шъолъырым имэфэкI ыкIи ишIэжь мафэхэм ямэфэпчъ ар ахатхагъ.