Бзылъфыгъэ социальнэ творчествэм, унэгъо хабзэхэм уасэ зэрафашIырэм, креативнэ индустриехэм яя IV-рэ Дунэе фестивалэу «Шъачэ игъатх» зыфиIорэр мэлылъфэгъум и 14 — 16-м къалэу Шъачэ щыкIуагъ. Краснодар краим и Администрацие, и Хэбзэгъэуцу ЗэIукIэ, Шъачэ икъэлэ зэIукIэрэ иадминистрациерэ ащкIэ IэпыIэгъу къафэхъугъэх. Адыгэ Республикэм илIыкIо куп ащ чанэу хэлэжьагъ.
Фестивалэу «Шъачэ игъатх — 2026» зыфиIорэм изэхэщакIохэр Урысыем ибзылъфыгъэхэм я Союзрэ ащ ишъолъыр къутамэхэмрэ ары. Урысыем ишъолъыр 40-м ехъумэ, Абхъазым, Беларусь, Африкэм ихэгъэгухэм креативнэ индустриехэмкIэ ялIыкIохэр, социальнэ-предпринимательскэ проектхэр къыхэзыхыгъэхэр ащ къыщызэрэугъоигъэх. Шъолъыр социальнэ программэхэу «ТапэкIэ къэтыр» зыфиIорэм и Фонд илъэсиплI хъугъэ мы Iофтхьабзэм гъусэгъоу зыриIэр. Гъэзетэу «Адыгэ макъэр» фестивалым икъэбарлъыгъэIэс гъусэгъухэм ащыщ.«Дунэе фестивалэу «Шъачэ игъатх» зыфиIорэр тиорганизацие июбилей зыщыхэдгъэунэфыкIырэ илъэсым зэхащагъ. Советскэ бзылъфыгъэхэм якомитетэу фашизмэм пэуцужьырэр илъэс 85-кIэ узэкIэIэбэжьмэ зэхащэгъагъ. Мы комитетым хэтыгъэхэм яхэбзэ шIагъохэр лъытэгъэкIуатэх, ти Хэгъэгу иухъумакIохэм IэпыIэгъу тызэрафэхъурэмкIэ летчицэу, Советскэ Союзым и ЛIыхъужъэу Гризодубова Валентинэ Степан ыпхъум игущыIэхэм «ЗыкIыныгъэр ары ткIуачIэ икъэкIуапIэр!» зыфиIорэм зэрадедгъаштэрэр къэтэгъэшъыпкъэжьы», — къыщиIуагъ форумым Урысыем ибзылъфыгъэхэм я Союз ипрезидентэу Лахова Екатеринэ Филипп ыпхъум.Урысые Федерацием IэкIыб къэрал IофхэмкIэ и Министерствэ къэбархэмкIэ ыкIи хэутынымкIэ и Департамент ипащэу Захарова Мария Владимир ыпхъум Iофтхьабзэм изэхэщакIохэми, хэлажьэхэрэми видео шIыкIэм тетэу шIуфэс къарихыгъ, культурэ, дин зэфэшъхьафхэр зылэжьыхэрэр, шэн-хэбзэ зэмылIэужыгъохэм арыгъуазэхэрэр мы форумым зэрэзэфищагъэхэр къыхигъэщыгъ.Форумыр къызызэIуахыгъэм щегъэжьагъэу цIыфхэм анахьэу анаIэ зытырагъэтыгъэхэр къэгъэлъэгъонэу «Тызэгъусэмэ тфэукIочIыщт», Iофтхьабзэу «ДзэкIолIым итхыгъэхэр» зыфиIохэрэр ары. Тафтинг алырэгъум ишъэнкIэ творческэ мастерскоир, сурэттехыпIэ гъэшIэгъонхэр, зэхэщакIохэм нэпэеплъэу къаратыгъэ шIухьафтынхэр Iофтхьабзэм хэлажьэхэрэм агу рихьыгъэх.ХьэкIэ лъапIэхэр форумым къырагъэблэгъагъэх. Спикер 15 мастер-классхэм, тренингхэм, шIэныгъэлэжь, политик, общественнэ IофышIэ, шIушIэ фондхэм, культурэм, бизнесым ялIыкIо, дин пэщэ 35-м ехъу тематическэ трекхэм ахэлэжьагъэх. Урысыем ибзылъфыгъэхэм я Союз илIыкIоу Карина Геворгян, политолог цIэрыIоу, федеральнэ каналхэм яэкспертэу, психологэу, тхакIоу Анетта Орловар къызэрекIолIагъэхэр гуапэ ащыхъугъ.Фестивалым иящэнэрэ мафэ Шъачэ икъэлэ зэIукIэ зэдэлэжьэныгъэм фэгъэхьыгъэ «Iэнэ хъурае» щыкIуагъ. Нэбгырэ 80-м ехъу ащ хэлэжьагъ. Тиреспубликэ илIыкIо купэу Адыгеим ибзылъфыгъэхэм я Союз итхьаматэу, заслуженнэ экономистэу, АР-м и Общественнэ палатэ хэтэу Вэрэкъо Хьалимэт зипащэр чанэу форумым хэлэжьагъ.«Адыгэхэм ячъыгхат. ТапэкIэ къэтыр» зыфиIорэ къэгъэлъэгъонэу Макерэ Сусаннэ зэхищагъэр форумым ихьакIэхэм лъэшэу ашIогъэшIэгъон хъугъэ.Урысыем ишъолъыр зэфэшъхьафхэм къарыкIыгъэ IэпэIасэхэр ермэлыкъым хэлэжьагъэх. Адыгэ Республикэм иIэпэIасэхэм паркэу «Ривьера» яIэпэщысэ хьалэмэтхэр къыщагъэлъэгъуагъэх.— «Шъачэ игъатх — 2026» зыфиIорэм программэ гъэшIэгъон иIэу Iоф ышIагъ, — къыIуагъ Адыгеим ибзылъфыгъэхэм я Союз итхьаматэу Вэрэкъо Хьалимэт. — Iофтхьабзэм хэлэжьагъэхэр IофшIэкIэшIоу яIэмкIэ зэхъожьыгъэх, гъэсэныгъэмкIэ сессиехэм яIахьышIу хашIыхьагъ. ЛIыкIо купхэм ахэтхэм гукъэкIэу яIэхэр къызэфаIотагъэх.Фестивалым къэбарлъыгъэIэс гъусэгъоу иIагъэх Урысыем ижурналистхэм я Союз, медиа купэу РБК Юг зыфиIорэр, гъэзетэу «Адыгэ макъэр», Адыгэ Республикэм и Къэралыгъо телерадиокомпание.Муса (Пэнэшъу) Саид.