АР-м ибзылъфыгъэхэм я Союз
Урысыем ибзылъфыгъэхэм я Союз ишъолъыр къутамэу Адыгеим щыIэм культурэм илIыкIохэм я Клуб иIофшIэн щыригъэжьагъ. Адыгеим ирайонхэм ыкIи икъалэхэм янэбгырэ зырыз ащ хэхьагъ, итхьаматэр Урысыем изаслуженнэ, Адыгеим инароднэ артисткэу Зыхьэ Мэлайчэт.
Клубым хэтхэм онлайн шIыкIэм тетэу апэрэ зэхысыгъоу яIагъэм хэлэжьагъ Адыгеим ибзылъфыгъэхэм я Совет итхьаматэу Вэрэкъо Хьалимэт. Iофэу ашIэщтым, язэдэлэжьэныгъэ зэрагъэпсыщтым ыкIи культурнэ-шIэныгъэ Iофтхьабзэу зэхащэщтхэм ахэр атегущыIагъэх.— Псэемыблэжьэу культурэм фэлажьэхэрэр, ар къэзыухъумэхэрэр ыкIи лъызыгъэкIуатэхэрэр бэу тиIэх. Районхэм ыкIи къалэхэм ялIыкIохэу къащахахыгъэхэр джащ фэдэх — зищыIэныгъэ культурэм фэзыгъэхьыгъэ закIэх. Арышъ, мы етхьыжьэгъэ Iофым, анахьэу культурэм щылажьэхэрэмкIэ, мэхьанэ ин иIэу сэлъытэ, — къыIуагъ культурэм илIыкIохэм я Клуб ипащэу Зыхьэ Мэлайчэт.Урысыем ибзылъфыгъэхэм я Союз культурэм илIыкIохэм я Клуб 2024-рэ илъэсым зэхищагъ. Шъолъыр пэпчъ инэбгырэ зырыз хахьэ, ахэр гъэсэныгъэм, культурэм, искусствэм ыкIи къэбарлъыгъэIэс амалхэм Iоф ащызышIэрэ цIыфых. Адыгеим илIыкIоу Урысые Клубым хэтыр Зыхьэ Мэлайчэт. Пшъэрылъэу иIэм диштэу Iофтхьабзэхэри ащ ригъэкIокIыгъэх. Ахэм ащыщ проектэу «Урыс тхакIохэр Кавказ фэгъэхьыгъэу» зыфиIорэр.— Ахэм ятхыгъэхэмкIэ Кавказым илъэпкъхэр дунаишхом щашIагъэх. ГукъэкIымкIэ Къыблэ федеральнэ шъолъырым къыщыздырагъэштагъ ыкIи блэкIыгъэ илъэсым къыкIоцI ащ къыдыхэлъытэгъэ Iофтхьабзэхэр зэхащагъэх. Тиреспублики а IофшIэныр дэгъоу щыре— дгъэкIокIыгъ, районхэм тащыIагъ. ГущыIэм пае, Шэуджэн районыр сыгу рихьыгъ. Район администрацием ипащэ, народнэ хэбзэихъухьэхэм я Совет хэтхэм анэсыжьэу Iофтхьабзэм хэлэжьагъэх, ныбжьыкIэхэр, нахьыжъхэр къекIолIагъэх. Пчыхьэзэхэхьэ фабэ хъугъагъэ, — еIо Мэлайчэт.Мы проектыр Мэлайчэт мыгъи лъигъэкIотэщт, ау джы Адыгеим ибзылъфыгъэхэм я Союз культурэм илIыкIохэм я Клубэу щызэхащагъэм хэтхэр ащкIэ IэпыIэгъу къыфэхъущтых. Ащ фэшъхьафэу, нэмыкI Iофтхьабзэхэми ярегъэкIокIын дэлэжьэщтых. Адыгеим икультурнэ кIэн агъэкъэбарыщт, творческэ гухэлъхэр щыIэныгъэм щыпхыращыщтых, шIэныгъэгъозэ Iофтхьабзэхэр зэхащэщтых ыкIи ныбжьыкIэхэр ахэм ахагъэлэжьэщтых.КъэIогъэн фае, культурэм илIыкIохэм я Клуб хэтым ар къэзыушыхьатырэ тхылърэ бгъэхалъхьэрэ къыраты.Анцокъо Ирин.