Шэртэнэ М.
Къыкъ Аминэт илъэс 30 нахь ыныбжьэп, ау пшъэшъиплIымэ — Элана, Заира, Дэнэф ыкIи Эсмирэ цIыкIум янэ хъугъахэ. Нахьыжъым илъэсибгъу ыныбжь, ащ къыкIэлъыкIорэм мы мафэхэм яблэнэрэ илъэсыр хигъэунэфыкIыщт, Дэнэф илъэситфым ит, нахьыкIэ цIыкIур илъэс хъугъэ.
Аминэт унагъо иIэным игухэлъ зэныбжьыкIэм къыздырихьакIыщтыгъ, ау мыщ фэдэу бын Iужъоу, пхъуиплI янэ хъунэу пкIыхьапIэкIи ылъэгъугъэп. Ахэм якъэхъун ишъхьэгъусэу Руслъанрэ ежьыррэ ящыIэныгъэ зэблихъугъ, мэхьанэ иIэ ышIыгъ, сабый щхы макъэр яунэ къырахьагъ, бысымгощэ цIыкIухэу янэ къыгоуцуагъэх.
— Ахэр цIыкIух шъхьаем, сиIэпыIэгъушхох, шъыпкъэр къэсIон, зы къин сагъэлъэгъурэп, — еIо Аминэт. — Нахьыжъыр дэгъу дэдэу къыздэIэпыIэ. Пшъэшъэ нахьыкIэр ащ ипшъашъ пIоми хъущт. ЕджапIэм къызэрикIыжьэу ащ нэмыкIырэ гугъу иIэп.Шыпхъу уиIэным ишIуагъэ ежь Аминэт ышъхьэкIэ ешIэ. ЗэшыпхъуитIоу апIугъэх. Анахьэу ащ ишIуагъэ къызишIагъэр нахь зыкъызеIэтыр ары. Ны папкIэу зэлъэплъэжьых, IэпыIэгъу зэфэхъух, зэфэгумэкIых. Ежь ипшъэшъэжъыехэри ащ фэдэу зэфыщытынхэм щэгугъы ыкIи ишъхьэгъусэрэ ежьыррэ зэготхэу ащ фапIух, фагъасэх.— ЦIыкIухэ зыхъукIэ, адэ, зэзэощтых, зэфэгубжыщтых, ау яакъыл зыуцурэм, бэ къагурыIощтыр, яшIулъэгъу, язэфыщытыкIэхэр пытэщтых. Джыри ар къагурымыIоу сIон слъэкIыщтэп. Гурытым, Заирэ, «Шыпхъу нахьыжъ сиIэшъ, апэрэ классым сызыкIокIэ сыкъычIищыжьыщт. Тизакъоу тыкIозэ тшIыщт» еIо. Илъэситфым итыр ежьхэм анахь зэрэцIыкIур къагурэIошъ, зыгорэ къариIомэ, ыгу хагъэкIырэп. Джащ фэдэу зэлъэплъэжьых, — ным ипшъашъэхэм якъэбар къеIуатэ.Ежь Аминэти ныбжьыкI, ау ащ емылъытыгъэу губзыгъ. Гъэсэныгъэ зиIэу, лъэпкъ шэн-хабзэхэр, ныдэлъфыбзэр зышIэхэрэ пшъэшъэжъыехэу илъфыгъэхэр къеIэтых. А пстэумэ адакIоу унэгъо хъызмэтми ахэр фегъасэх. Зыгорэм «джыри цIыкIуIох» ыIонкIи хъун, ау ышIэрэмкIэ кIэлэцIыкIухэр сыдигъуи иIэпыIэгъух. ИшIыкIэ амышIэрэми, къыготхэу егъасэх.— СшIэу алъэгъурэр зэкIэ къыздашIэ: мэтхьакIэх, мэпхъанкIэх, нахьыжъыр изакъоу къибгъэнагъэми, ышхыщтыр зыфигъэхьазырышъущт. Ащ ишIуагъэкIэ ежьхэми нахьыбэ ашIэным кIэгушIух, — къеIуатэ Аминэт. — ГущыIэм пае, тхьацухэкI горэ сшIы зыхъукIэ, скIэрыкIыщтхэп. Тхьацуф цIыкIухэр шъхьадж иеу ятэшыпхъум къаритыгъэшъ, къаштэхэшъ, Iанэм къетIысылIэх, хьалыжъохэр къыздашIы.ПшъэшъэжъыиплIым урянэныр Аминэт насыпышхоу, тынышхоу елъытэ. Ахэм ягъусэу ащ бэмэ зафегъасэ, шIулъэгъур, лъытэныгъэр, сабый щхы макъэр ренэу зыщыIурэ зы дунай дахэр зэдагъэпсы. Сабыйхэр къызпэфэхэм медицинэ колледж ужым еджэныр лъимыгъэкIотагъэми, кIэгъожьырэп. ДжырэкIэ анахьыкIэ цIыкIур ыIыгъэу унэм ис, ау шIэхэу IофшIэныр ригъэжьэжьын имурад. Мыекъуапэ иIэзапIэхэм ащыщ медицинэ шыпхъоу щэлажьэ. Бжыхьэм Эсмирэ цIыкIур кIэлэцIыкIу IыгъыпIэм ритымэ, дэкIыжьыщт.КъэIогъэн фае, сабыибэ зыпIурэ ным ифэгъэкIотэнхэр Аминэт иунагъо иIэх ыкIи иамал къызэрихьэу егъэфедэх. Ящэнэрэр къазыфэхъум, къатефэрэ чIыгу Iахьыр къафыхагъэкIыгъ. Унэгъо ипотекэм ишIуагъэкIэ унэ ащэфыгъ. Ащ иIахь хабзэм къыритыгъэ сомэ мин 450-мкIэ ыгъэгъужьыгъ. Унэгъо ныбжьыкIэхэм якъэлэ чэзыу хэтэу ахъщэ IэпыIэгъу къаратынэу ежэх.«Сабый пэпчъ ежь инасып къыдэкIо» адыгэхэм зэраIорэм Руслъанрэ Аминэтрэ яшыхьат.Анцокъо Ирин.