КъумпIыл Мурат: Тызэгъусэу ныбжьыкIэ политикэр лъэгэпIакIэм тетщэщт

НыбжьыкIэ Iофхэм афэгъэхьыгъэ Iофтхьабзэ­хэр тыгъуасэ Адыгеим щырекIокIыгъэх. Ады­ге­имрэ ныбжьыкIэхэм я Урысые Союз­рэ азыфагу илъыщт зэдэлэжьэныгъэм фэгъэ­хьы­гъэ Зэзэгъыныгъэу пIэлъэ гъэнэфагъэ зимы­Iэм лъэныкъохэр кIэтхэжьыгъэх, шъолъыр фо­румэу «Адыгеим иныбжьыкIэхэр 4.0» зыфи­Iорэр мэфэкI шIыкIэм тетэу Мыекъуапэ къыщызэIуахыгъ. Пстэури зэкIэлъыкIоу.

Зэзэгъыныгъэ зэдашIыгъАдыгеимрэ ныбжьыкIэхэм я Урысые Союзрэ азыфагу илъыщт зэдэлэжьэныгъэм фэгъэхьыгъэ Зэзэгъыныгъэу пIэлъэ гъэнэфагъэ зимыIэм лъэныкъохэм аIапэ кIадзэжьыгъ. А документым къыделъы­тэ ныбжьыкIэ политикэм илъэныкъо шъхьаIэхэмкIэ зэдэлэжьэныгъэ азыфагу илъыныр, ащ хэхьэх ныбжьыкIэхэм яIофхэм ягъэзекIонкIэ IэпыIэгъу ятыгъэ­ныр, творчествэм зегъэушъомбгъугъэныр, яхэгъэгу шIу алъэгъоу пIугъэнхэр, сэнэхьатыр къыхахынымкIэ ныбжьыкIэхэм IэпыIэгъу ятыгъэныр ыкIи общественнэ IофшIэным ахэр хэщэгъэнхэр.

Зэзэгъыныгъэм гухэлъ шъхьаIэу иIэр — республикэм иныбжьыкIэхэм яшIэныгъэ-амалхэр мыщ фэдэ лъэныкъохэмкIэ щыIэныгъэм щыпхырыщыгъэнхэр: ныбжьыкIэхэр яхэгъэгу фэшъыпкъэхэу пIугъэнхэр, хабзэ хъугъэ урысые цIыфыгъэ-шэпхъэ дахэхэу зэрыгъуазэхэрэм атегъэпсыхьагъэу къыткIэхъухьэрэ лIэужхэр пIугъэнхэр, ныбжьыкIэхэм сэнэхьат зэфэшъхьафхэр аIэ къырагъэ­хьанхэмкIэ, яIэнатIэкIэ дэкIоенхэмкIэ IэпыIэгъу афэхъугъэныр, ныбжьыкIэ творчествэм зегъэушъомбгъугъэныр, социальнэ IофшIэным ахэр хэщэгъэнхэр, ныбжьыкIэхэм яIофхэм ягъэзекIонкIэ пшъэрылъэу къэуцухэрэр зэшIуахы­шъунхэр, социальнэ мэхьанэ зиIэ Iоф­шIэным ныбжьыкIэхэр хащэхэзэ ячаныгъэ зыкъегъэIэтыгъэныр, Iоф зышIэрэ ныбжьыкIэхэр щыIэныгъэм социальнэу хэгъэгъозэгъэнхэр, ныбжьыкIэхэм ядунэе зэдэлэжьэныгъэ зегъэушъомбгъугъэныр.

«Адыгеим иныбжьыкIэхэр яамалхэр къагъэлъэгъонхэм, ягупшысэ-гухэлъхэр пхыращынхэм, тыкъэзыуцухьэрэ дунаир нахьышIу шIыгъэным кIэгуIых. Арышъ, ахэм яамалхэм нахь зыкъызэIуахынымкIэ, лъэныкъо зэфэшъхьафхэм ясэнаущыгъэ къыщагъэлъэгъонымкIэ амал тэрэзхэр ыкIи икъухэр ядгъэгъотын фае. Урысыем иныбжьыкIэхэм я Союз ащкIэ IофшIэкIэ амалышIу IэкIэлъ хъугъэ, зыкIы­рыплъынхэ лъэныкъохэри иIэх. Республикэми ащ фэдэ Iоф­шIэкIэшIум ылъэныкъокIэ гъэ­хъэгъэ гъэнэфагъэхэр ыкIи джыри нахь зиушъомбгъуным иамал иIэх. Зым адрэм щысэ зыфытырихын ылъэкIыщт лъэныкъуабэ щыI. ИлъэсипшI хъугъэу зэдэлэжьэныгъэм ылъэныкъокIэ щыIэ хъугъэ IофшIэным къегъэлъагъо тызэгъусэу республикэм ныбжьыкIэ политикэр лъэгэпIакIэм щытетщэн зэрэтлъэ­кIыщтыр», — къыхигъэщыгъ АР-м и ЛIышъхьэу КъумпIыл Мурат.

Шъолъыр форумыр рагъэжьагъШъолъыр форумэу «Адыгеим иныбжьыкIэхэр 4.0» зыфиIорэр мэфэкI шIыкIэм тетэу Мыекъуапэ иконцерт залэу «Налмэсым» къыщызэIуахыгъ.Форумым хэлажьэхэрэмрэ ихьакIэхэм­рэ зафигъазэзэ, республикэм ипащэ къыхигъэщыгъ ныбжьыкIэхэм я Урысые Союз икIэщакIоу мы Iофтхьабзэр зэрэзэхащэрэр. НыбжьыкIэхэм я Урысые Союз иреспубликэ организацие илъэси 10 зэрэхъурэм ехъулIэу форумыр зэIуа­гъэкIагъ.«А уахътэм къыкIоцI хэхъоныгъэ гъэнэфагъэхэр шъушIыгъэх, еджэпIэ Iоф­тхьабзэхэм къащежъугъажьи, проекты­шхохэм ягъэцэкIэн шъунэсыгъ, ныбжьыкIэхэм Iоф зэрадэшъушIэщт шапхъэхэр къыхэшъухыгъэх. НыбжьыкIэхэм я Урысые Союз гухэлъ екIолIэкIэ, пшъэрылъ гъэнэфагъэхэр зиIэ движениеу щыт. Тэ бэшIагъэу шIуагъэ къытэу тызэдэлажьэ, яIофшIэнкIэ ныбжьыкIэхэм IэпыIэгъу тафэхъу, республикэм ищыIэныгъэ ахэр къыхэтэгъэлажьэх», — къыIуагъ АР-м и ЛIышъхьэ.

КъумпIыл Мурат зэрэхигъэунэфыкIыгъэмкIэ, Адыгеим иныбжьыкIэхэр рес­публикэм ищыIэныгъэ яIахь хашIыхьаным фэхьазырых, Iофтхьабзэхэм яшIуагъэ къащагъакIо, федэ къызыкIэкIощт проект­хэр къыхахы, ветеранхэм, хэгъэгур непэ къэзыухъумэхэрэм афэгумэкIых,.«ТидзэкIолIхэмрэ ахэм яунагъохэм арысхэмрэ IэпыIэгъу шъузэрафэхъурэм фэшI «тхьашъуегъэпсэушхо» шъосэIо. «ГъэрекIо ТекIоныгъэм ия 80-рэ илъэс тызэгъусэу дэгъоу зэдыхэдгъэунэфы-­кIыгъ. ТиныбжьыкIэхэр патриот шъып­къэу зэрэщытхэр джащыгъум нэрылъэгъу къэхъугъ. Шъоры кIэгъэкъон шъхьаIэу тиIэхэр ыкIи Адыгеим инеущырэ мафэ зыфэдэ хъущтыр зэлъытыгъэхэр. НыбжьыкIэхэм Адыгэ Республикэм лъэшэу анаIэ щатырагъэты. Тиреспубликэ лъэпкъыбэ зэрэщызэ­дэпсэурэм епхыгъэу гурыт, апшъэ­рэ еджапIэхэм ачIэсхэр лъытэны­гъэ зэфыряIэнэу тэгъасэх. Лъэпкъ­хэм языкIыныгъэ ар ылъапс. ЕтIани зыкIыныгъэкIэ узэджэн фаер ветеранхэм, ныбжьыкIэхэм, хэбзэ Iэшъхьэтетхэм зы Iоф зэрэзэдагъэцакIэрэр ары. Урысыем и Президентэу Владимир Путиным илъэсэу итыр Урысыем щыпсэурэ лъэпкъхэм языкIыныгъэ и Илъэсэу зэригъэнэфагъэм епхыгъэу а пстэуми мэхьанэшхо яI», — къы­Iуагъ республикэм и ЛIышъхьэ.Адыгеим ипащэ къызэрэхигъэщыгъэмкIэ, республикэм ныбжьыкIэхэм амалыкIэхэр къафызэIуехы. ГущыIэм пае, Гупчэу «Адыгеим иныбжьыкIэхэр» зыфиIорэм тишъолъыр Iоф щешIэ. Ащ фэдэ ныбжьыкIэ гупчэхэр бэ темышIэу муниципалитет пэпчъ щызэхащэщтых. Илъэс къэс ишышъхьэIу мазэ ныбжьыкIэ Iоф­тхьабзэу «Фыщтыр» тадэжь щэкIо, Къыб­лэм щыпсэурэ ныбжьыкIэхэм ялIыкIохэр ащ къыщызэрэугъоих. Джащ фэдэу Ады­геим истудентхэм я Ассоциацие Iоф ешIэ — къалэхэу Москва, Питер, Краснодар, Ростов, Саратов адэс ныбжьыкIэхэр ащ иIофшIэн къыхэлажьэх. НыбжьыкIэ политикэм ипхырыщын ахъщэу пэIухьэрэм ренэу хагъахъо. БлэкIыгъэ илъэсым ащ пае сомэ миллиони 170-рэ къатIупщыгъагъэмэ, мыгъэ сомэ миллиони 197,2-рэ.«Тэ гухэлъэу тиIэр джырэ уахътэм диштэрэ амалхэр шъодгъэгъотынхэр, шъуищыIэныгъэ гъэшIэгъонэу зэхэтщэныр ары. Анахь шъхьаIэу шъугу ишъуубытэн фаер: экономикэмкIэ, социальнэ лъэныкъомкIэ, пIуныгъэмкIэ непэ тшIэрэ пстэ­ури шъоры зыфатшIэрэр. Шъоры тиIоф лъызыгъэкIотэн, республикэмрэ хэгъэгум­рэ хэхъоныгъэ языгъэшIын фаер. Тэ сыдигъуи шъуигукъэкIхэм къадедгъэ­штэщт. Шъуизэчый, шъукIуачIэ, шъуичаныгъэ лъэшэу тищыкIагъэх», — зэфэхьысыжь къышIыгъ АР-м и ЛIышъхьэ.КъумпIыл Мурат ныбжьыкIэхэм я Урысые Союз хэтхэми ащ итхьаматэу Дмитрий Покровскэми республикэм игукъэкIхэм къызэрадырагъаштэрэм пае зэрафэразэр ариIуагъ, тапэкIи проектыбэ зэдагъэцэкIэн зэралъэкIыщтым ицыхьэ зэрэтелъыр хигъэунэфыкIыгъ. Респуб­ликэм и ЛIышъхьэ форумым хэлажьэхэ­рэм гъэхъагъэхэр ашIынэу, ныбджэгъу­кIэхэр зэрагъэгъотынэу, нэбгырэ пэпчъ­кIэ мэхьанэшхо зиIэщт егъэжьапIэу мы форумыр хъунэу афэлъэIуагъ.Нэужым ныбжьыкIэхэм я Урысые Союз итхьаматэу Дмитрий Покровскэр ахэм къафэгушIуагъ. Зэчыишхо зиIэ, губзыгъэ ныбжьыкIэхэр Адыгеим зэрис­хэр, федеральнэ лъэгапIэми ащ гу зэрэщылъатэрэр тхьаматэм къыIуагъ.«Адыгеим иныбжьыкIэ сэнаущхэр «Российская студенческая весна» зыфиIорэ Iофтхьабзэм щытэлъэгъух. Лъэпкъ шIухьафтынэу «Илъэсым истудент» зыфиIорэм ифедеральнэ едзыгъохэми рес­публикэм истудентхэр зэрахэлажьэ­хэрэр тинэрылъэгъу. ПрограммакIэу «Я в агро» зыфиIорэми, ныбжьыкIэхэм я Урысые Союз инэмыкI проектхэми шъуи­ныбжьыкIабэ зэрахэлэжьэщтхэм тицыхьэ телъ. Тэ пшъэрылъэу тиIэр зы — шъуи­творчествэ зыкъызэIуежъугъэхынымкIэ ищыкIэгъэ амал пстэури шъодгъэгъотыныр ары. Сыда пIомэ Урысыер амалышхо зиIэ хэгъэгоу щыт. НыбжьыкIэхэм сыд фэдэрэ лъэныкъокIи тихэгъэгу зыщаушэтын алъэкIыщт ыкIи пшъэрылъэу тиIэр — ащкIэ IэпыIэгъу шъодгъэгъотыныр ары. Сыда пIомэ, ныбжьыкIэхэр ары Урысыер ыпэкIэ лъызыгъэкIотэщтхэр», — къы­Iуагъ ныбжьыкIэхэм я Урысые Союз итхьаматэ.НыбжьыкIэ политикэм изехьанкIэ Адыгеим Iофышхо зэрэщашIэрэр Дмитрий Покровскэм къыхигъэщыгъ ыкIи респуб­ликэм ипащэхэм ныбжьыкIэхэм ягукъэкI­хэм зэрадырагъаштэрэмкIэ зэрафэразэр къыIуагъ.Шъугу къэтэгъэкIыжьы форумэу «Адыгеим иныбжьыкIэхэр 4.0» зыфиIорэр 2026-рэ илъэсым мэлылъфэгъум и 17-м къыщегъэжьагъэу и 19-м нэс зэрэкIощтыр, илъэс 14-м къыщегъэжьагъэу илъэс 25-м нэс зыныбжь нэбгырэ 600-м ехъу: кIэлэеджакIохэр, студентхэр, ныбжьыкIэ общественнэ организациехэм, Адыгеим иобъединениехэмрэ идвижениехэмрэ ялIыкIохэр ащ къызэрэщызэрэугъоищтхэр.Урысыем ишъолъырхэм зэдиштэу хэхъоныгъэ языгъэшIыщт программэу «НыбжьыкIэхэм афэгумэкIырэ шъолъыр» зыфиIорэм мы Iофтхьабзэр хэхьэ. Ар зыфытегъэпсыхьагъэр форумым хэлажьэ­рэ пэпчъ амалэу иIэхэм зыкъызэIуягъэ­хыгъэныр ары. Лъэныкъо шъхьэIи 5-мкIэ форумым Iоф ышIэщт: ныбжьыкIэхэм пэщэныгъэ зэрахьанымкIэ амалэу яIэхэм зягъэушъомбгъугъэныр, республикэм ищыIэныгъэ хэлэжьэнхэмкIэ гукъэкIхэр пхырыщыгъэнхэр; спорт инфраструктурэр зэтегъэпсыхьэгъэныр; республикэмкIэ мэхьанэшхо зиIэ хъугъэ-шIагъэхэмкIэ егъэджэнхэр зэхэщэгъэнхэр; гуфэкIо IофшIэныр ыкIи культурэм епхыгъэ проектыкIэхэр къыхэхыгъэнхэр.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.ЛIышэ Саныет.