А. Гусев
АР-м и ЛIышъхьэу КъумпIыл Мурат цIыфхэм яфитыныгъэхэр къэухъумэгъэнхэмкIэ Адыгеим и Уполномоченнэу Михаил Шебанец тыгъуасэ зэIукIэгъу дыриIагъ.
Уполномоченнэм 2025-рэ илъэс IофшIагъэр къызэфихьысыжьыгъ, мыгъэ пшъэрылъэу яIэхэм къатегущыIагъ. ЗэIукIэгъум хэлэжьагъ АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец.«ЦIыфэу къышъоуалIэхэрэм IэпыIэгъу тэрэз агъотыныр тэркIэ анахь шъхьаI. Уполномоченнэм ишIуагъэкIэ министерствэхэмрэ къулыкъухэмрэ яIофшIэн уасэ фэтшIын, уахътэм диштэу ар дгъэкIэжьын, цIыфхэм Iофыгъоу яIэхэм ядэгъэзыжьынкIэ пшъэдэкIыжьэу ахьырэр къэтIэтын тэлъэкIы», — къыкIигъэтхъыгъ КъумпIыл Мурат.
Михаил Шебанец къызэриIуагъэмкIэ, блэкIыгъэ илъэсым егъэпшагъэмэ, закъыфэзгъазэхэрэм япчъагъэ фэдитIукIэ нахьыбэ хъугъэ. Илъэсым пстэумкIи лъэIу тхылъ 775-рэ къарахьылIагъ. ЗэкIэ къяолIагъэхэм IэпыIэгъу арагъэгъотыгъ, упчIэжьэгъу афэхъугъэх, яIоф хэлъ пстэур зэхэугуфыкIыгъэу къафаIотагъ, зыщищыкIагъэм тхылъхэм ягъэхьазырынкIэ адеIагъэх. Закъыфэзгъэзагъэхэм япроцент 70-мэ яфитыныгъэхэр къэухъумагъэхэ хъугъэ.Шъолъырым ипащэ хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу ятыгъэныр пстэумэ апшъэу къызэрэнэжьырэм къыкIигъэтхъыгъ. Уполномоченнэм зэрэщигъэгъозагъэмкIэ, пстэумкIи закъыфэзгъэзагъэхэм ащыщэу 540-р ащ фэдэх. Фондэу «Хэгъэгум иухъумакIохэр» зыфиIорэм ишъолъыр къутамэ, АР-м и Къэралыгъо Совет — Хасэм идепутатхэр, прокуратурэр, нэмыкI хэбзэухъумэкIо къулыкъухэр къыхэлажьэхэзэ дзэкIолIхэм апае ахъщэ тынхэм ягъэпсын, социальнэ ыкIи медицинэ IэпыIэгъухэр ягъэгъотыгъэным, зыгъэпсэфыгъо уахътэ къаратыным, гъэрэу аубытыгъэхэр къаIыхыжьыгъэнхэм, зыдэхъугъэр амышIэу кIодыгъэхэм алъыхъугъэным алъэныкъокIэ адеIагъэх, джыри а IофшIэнхэр лъагъэкIуатэх.КъумпIыл Мурат Уполномоченнэм ыкIи ащ иаппарат хэтхэм Iофышхо зэрашIагъэм пае «тхьашъуегъэпсэу» къариIуагъ, лъэныкъо пстэумкIи ащ тетэу Iоф ашIэным мэхьанэшхо зэриIэм къыкIигъэтхъыгъ. ЦIыфхэр социальнэу къэухъумэгъэнхэр, пенсионерхэм, сэкъатныгъэ зиIэхэм, нэмыкIэу IэпыIэгъу зищыкIагъэхэм адеIэгъэныр, псэупIэхэмкIэ ыкIи IофшIэнымкIэ фитыныгъэхэр къэухъумэгъэнхэр, псэупIэ-коммунальнэ фэIо-фашIэхэр ягъэгъотыгъэнхэр, яунэе мылъкукIэ фитыныгъэу яIэхэр къэухъумэгъэнхэр ащ хэхьэх.АР-м и ЛIышъхьэ ипресс-къулыкъу къытыгъэ къэбархэмкIэ зыгъэхьазырыгъэр ХЪУТ Нэфсэт.