Адыгэ Республикэм гандболымкIэ ифедерацие и Кубок икъыдэхын фэгъэхьыгъэ зэIухыгъэ турнирым Мыекъуапэ икомандэ текIоныгъэр къыщыдихыгъ. 2012-рэ илъэсым ыкIи ащ ыуж къэхъугъэ пшъашъэхэр ары зызыушэтыгъэхэр.
Адыгэ къэралыгъо университетым физическэ культурэмрэ дзюдомрэкIэ и Институт испортзал щызэIукIагъэх Мыекъуапэ, Краснодар, Ставрополь ыкIи Ростов-на-Дону якоманди 6.Мэфищрэ кIогъэ Iофтхьабзэр гъэшIэгъонэу рекIокIыгъ. Ащ изэфэхьысыжьхэмкIэ пэрытныгъэр ыубытыгъ «Мыекъуапэ-1-м», ащ ешIэгъуи 5 иIагъ, зэкIэми текIоныгъэр къащыдихыгъ. Джащ фэдэу Краснодар икомандитIумэ хагъэунэфыкIырэ чIыпIэхэр афагъэшъошагъэх.
Командэ анахь лъэшхэр зэрагъэшIуагъэхэм дакIоу, ешIэкIо анахь дэгъухэри зэхэщакIохэм къыхагъэщыгъэх. ХэушъхьафыкIыгъэ шIухьафтынхэр афагъэшъошагъэх республикэм икъэлэ шъхьаIэ испортсменкэхэу Самира Павленкэмрэ (къэлэпчъэIут) Екатерина Тимошенкэмрэ.ГандболымкIэ Урысыем ипервенствэ икIэух едзыгъо жъоныгъуакIэм ипэублэ Астрахань щыкIощт. 2012-рэ илъэсым къэхъугъэ пшъашъэхэр ащ хэлэжьэщтых. Джырэ уахътэм гандболисткэхэм мы зэнэкъокъум зыфагъэхьазыры.