А. Гусев
ЗекIоным Урысыем зыщегъэушъомбгъугъэнымкIэ Правительствэ комиссием изэхэсыгъоу Урысые Федерацием ивице-премьерэу Дмитрий Чернышенкэм тхьамэтагъор зыщызэрихьагъэр бэмышIэу щыIагъ. 2025-рэ илъэсым зекIохэр нахьыбэу зыдэщыIэгъэ шъолъырхэм ацIэ мыщ къыщыраIуагъ. Адыгеир ахэм къахэфагъ.
Урысые Федерацием и Президентэу Владимир Путиным 2030-рэ илъэсым ехъулIэу ВВП-м ипроценти 5-р зекIоным къыригъэкъун фаеу пшъэрылъ къызэригъэуцугъэр Дмитрий Чернышенкэм агу къыгъэкIыжьыгъ. Адыгеим а пчъагъэр 2023-рэ илъэсым щырагъэкъугъах.АР-м и ЛIышъхьэ къызэрэхигъэщыгъэмкIэ, инфраструктурэм изегъэушъомбгъункIэ, фэIо-фашIэхэр нахьышIоу зэхэщэгъэнхэмкIэ, республикэм чIыопс, культурэ амалэу иIэхэр нахь зэлъягъэшIэгъэнхэмкIэ Iофэу зэдызэшIуахыгъэхэм ар къакIэкIуагъ.— Мы аужырэ илъэсхэм хэгъэгу кIоцI зекIоным зегъэушъомбгъугъэнымкIэ Адыгеир хэпшIыкIэу ыпэкIэ лъыкIотагъ. Тикъушъхьэхэм апхырыкIырэ гъогууанэхэм, экозекIоным, зэрэунагъоу зыхэлэжьэрэ зекIохэм нахь къакIэупчIэхэ зэрэхъугъэр тинэрылъэгъу. Ащ епхыгъэу номер фондми хэтэгъахъо. УФ-м и Правительствэрэ партиеу «Единэ Россиемрэ» къагъэуцугъэ пшъэрылъхэм адиштэу тэ лъэшэу тынаIэ зытедгъэтырэр зекIо пстэуми — хэушъхьафыкIыгъэ дзэ операцием хэлажьэхэрэми, сабыйхэр зэрыс унагъохэми, зипсауныгъэ пыч фэхъугъэхэми загъэпсэфынымкIэ ящыкIэгъэ амалхэр ягъэгъотыгъэнхэр, щынэгъончъэу зекIоныр афызэхэщэгъэныр ары, — къыIуагъ КъумпIыл Мурат.Джащ фэдэу АР-м и ЛIышъхьэ зэрэхигъэунэфыкIыгъэмкIэ, зекIоным Адыгеим зызэрэщиушъомбгъурэр гъогукIэхэр зэрашIыхэрэм, общественнэ транспортыр нахьышIоу зекIо зэрэхъугъэм, джырэ уахътэм диштэу хьакIэщхэр зэрагъэпсыхэрэм, бизнес цIыкIумрэ гурытымрэ мыщкIэ яшIуагъэ къызэрагъакIорэм япхыгъэу щыт. Лъэпкъ проектэу «ЗекIонымрэ хьакIэпэгъокIынымрэ» зыфиIорэри ащ фэIорышIэ. Адыгеир чанэу мы проектым хэлажьэ. ЗекIоным нахь зиушъомбгъуным джыри проектитIу фэIорышIэщт – къушъхьэ зыгъэпсэфыпIэу «Лэгъонакъэрэ» ДжэгокIо гъэхъунэм щагъэпсырэ зекIо-рекреационнэ паркымрэ. ЗекIоным инэмыкI лъэныкъохэми хэхъоныгъэ арагъэшIы. АвтозекIоным зегъэушъомбгъугъэныр Президентым къыгъэуцугъэ пшъэрылъ шъхьаIэхэм зэу ащыщ.— Хъугъэ-шIагъэхэмрэ мэкъу— мэщымрэ япхыгъэ зекIохэм язэхэщэнкIэ амалышIухэр тиIэх. Мы лъэныкъохэм хэхъоныгъэ ягъэшIыгъэнымкIэ непэ бизнесменхэм IэпыIэгъу тафэхъу. АщкIэ лъэпкъ проектыр къызфэтэгъэфедэ, чIыгулэжьхэм грант IэпыIэгъу ятэгъэгъоты. Адыгеим щыпсэухэрэми, ихьакIэхэми адыгэ къуаем ифестиваль осэшхо къыфашIыгъ. 2025-рэ илъэсым нэбгырэ мин 70-рэ фэдиз ащ хэлэжьагъ. Гъэмафэу къихьащтым Адыгеим лъэбэкъукIэхэр зэридзыщтхэм, ыпэкIэ зэрэлъыкIотэщтым тицыхьэ телъ. Анахь шэпхъэ лъагэхэм атетэу щынэгъончъэу, агу къинэжьэу хьакIэхэм зядгъэгъэпсэфыным тэ тыфэхьазыр. ЗекIоным УФ-м зыщегъэушъомбгъугъэным иIахьышIу хишIыхьэзэ, республикэм амалэу иIэхэм тапэкIи ахигъэхъощт, — къыIуагъ АР-м и ЛIышъхьэ.