Студентхэм яфутбольнэ лигэ иапшъэрэ куп хэт Адыгэ къэралыгъо университетыр 6:1-у текIуагъ Къырым иинженернэ-кIэлэегъэджэ университет икомандэ. Ландри Бидэ, Родион Езжовым, Даниил Антоненкэм ыкIи Хьасанэкъо Амир къэлапчъэм Iэгуаохэр дадзагъ. Аужырэ нэбгыритIур «Зэкъошныгъэм» ифутболистых. Джащ фэдэу зэIукIэгъум хэлэжьагъ Едыдж Тамирлан.
— Тифутболистхэм ешIэкIэ дахэ къагъэлъэгъуагъ, пчъагъэм емылъытыгъэу къэлапчъэм Iэгуаор дадзэным аужырэ такъикъхэм нэс фэбэнагъэх. АщкIэ инэу тыфэраз командэм итренерэу Гъонэжьыкъо Анзор, — къытыгъ Адыгэ къэралыгъо университетым ипресс-къулыкъу.Командэхэр зыдэщыт чIыпIэхэр ыкIи очко пчъагъэу рагъэкъугъэр:
- «МГТУ» (Москва) — 6.
- «АГУ» (Мыекъуапэ).
- «УрФУ» (Екатеринбург) — 3.
- «КНИТУ-КАИ» (Казань) — 0.
- «СПбГУ» (Санкт-Петербург) — 0.
- «ТвГУ» (Тверь) — 0.
- «КИПУ» (Симферополь) – 0.