Теннис цIыкIумкIэ турнирэу «Шаг в будущее — СКФО» зыфиIорэр къалэу Налщык щыкIуагъ. Урысыем и Къыблэ ихэшыпыкIыгъэ команди 9-мэ мыщ зыщаушэтыгъ. Къыблэ федеральнэ шъолъырыр Адыгеимрэ Краснодар краимрэ къагъэлъэгъуагъ. Тиреспубликэ илIыкIохэр кIалэхэм язэнэкъокъухэм ахэлэжьагъэх.
Команднэ зэнэкъокъум Адыгеим я 4-рэ чIыпIэр щиубытыгъ. Ящэнэрэ хъугъэ Къэбэртэе-Бэлъкъарыр, Краснодар краим ятIонэрэ чIыпIэр къыдихыгъ, Ставропль краир зэкIэми анахь лъэшыгъ.
Унэе зэнэкъокъухэм къащыхэщыгъ Кощхьэблэ районым илIыкIоу Арсений Семеновыр. Ар ящэнэрэ чIыпIэм фэбанэзэ, Къэбэртэе-Бэлъкъарым испортсменэу Хъан Батыр IукIагъ ыкIи 3:2-у текIуагъ. Ащ ишIуагъэкIэ Арсений джэрз медаль къыхьыгъ. Ставрополь щыщ Роман Лазаренкэм ятIонэрэ чIыпIэр къыдихыгъ, Махачкала илIыкIоу Хабиб Ахмедовым пэрытныгъэр ыубытыгъ.