Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэр лъагъэкIуатэ, ащ хэлажьэхэрэм яеджэн иятIонэрэ едзыгъо ыкIэм фэкIо.
Программэм зыщызыушэтырэ ветеранхэр къыхахыгъэ сэнэхьатым елъытыгъэу IофшIапIэхэм ащыIэхэу яIэпэIэсэныгъэ хагъахъо.Программэм изытет, еджэныр зэрэзэхэщагъэр ыкIи къыкIэлъыкIощт Iофтхьабзэхэр зыфэдэщтхэр «Адыгэ макъэм» къыфиIотагъ Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хагъэхъонымкIэ ишъолъыр Гупчэ ипащэу Паф Фатимэ.— ИкIыгъэ илъэсым шышъхьэIум и 25-м къыщегъэжьагъэу Iоныгъом и 4-м нэс программэм иапэрэ едзыгъо телъытэгъагъ. Ар зэрифэшъуашэу тилIыхъужъхэм акIугъ, кIэух дэгъухэр къагъэлъэгъуагъ. Нэужым едзыгъохэм азыфагу къыдэфэрэ стажировкэм ахэр мэзищрэ щыIагъэх, цIыфхэм аIукIагъэх, гъэIорышIэныр аIэ къырагъэхьагъ. ЯгъэсакIохэм анаIэ къатетэу къэралыгъо къулыкъум иIофшIэн нэIуасэ фашIых. ГъэсакIохэр — къэралыгъо муниципальнэ къулыкъухэм ялIыкIох. ЯтIонэрэ едзыгъор тыгъэгъазэм ыгузэгухэм лъыпадзэжьыгъ ыкIи «Экономика и финансы» зыфиIорэ лъэныкъор зэрагъэшIагъ, ащ епхыгъэу джы яшIэныгъэхэм ахагъахъо. ШIэхэу яеджэн иящэнэрэ едзыгъоу мэфипшIым телъытагъэр рагъэжьэщт. Ар шъолъыр ыкIи муниципальнэ гъэIорышIэным фэгъэхьыгъэщт. Ащ къыдыхэлъытагъэу, чIыпIэхэм яхэхъоныгъэ зэрэзэхэтыр, ныбжьыкIэ политикэр, къолъхьэ тын-Iыхыным пэшIуекIогъэным ишапхъэхэр, инвестиционнэ политикэр ветеранхэм арагъэшIэщт, — хигъэунэфыкIыгъ Паф Фатимэ.ТилIыхъужъхэм IэпэIэсэныгъэ ахэлъэу къэралыгъо ыкIи муниципальнэ хэбзэ къулыкъухэм, къэралыгъо компаниехэм Iоф ащашIэным иамалэу мыр щыт.Iэшъынэ Сусан.