Теннис цIыкIумкIэ шъолъыр зэфэшъхьафхэм ялIыкIохэр зыхэлэжьэхэрэ зэнэкъокъу къалэу Налщык щэкIо.
Турнирэу «Шаг в будущее — СКФО» зыфиIорэм 2012-рэ илъэсым ыкIи ащ ыуж къэхъугъэ кIалэхэмрэ пшъашъэхэмрэ зыщаушэты.Мы Iофтхьабзэр илъэси 5-м ехъугъэу Урысыем и Къыблэ щырагъэкIокIы, сэнаущыгъэ зыхэлъ теннисистхэр ащ зэрещалIэх. Мызыгъэгум зэнэкъокъум хэлажьэх Къэбэртэе-Бэлъкъарым, Адыгеим, Темыр Осетием — Аланием, Дагъыстан, Чэчэным, Донецкэ Народнэ Республикэм, Ставропольскэ ыкIи Краснодарскэ крайхэм яспортсменхэр.
Адыгэ Республикэр турнирым къыщызыгъэлъагъохэрэр Мыекъопэ спорт еджапIэу С. М. Джэнчатэм ыцIэ зыхьырэм зыщызыгъасэхэрэмрэ Кощхьэблэ районым ипсэупIэу Вольнэм илIыкIохэмрэ. Мы мафэхэм унэе ыкIи команднэ зэнэкъокъухэр рагъэкIокIыгъэх. Апэрэ зэфэхьысыжьхэм къызэрагъэлъэгъуагъэмкIэ, Артем Вариводиныр, Арсений Семеновыр ыкIи Александр Удаловыр хагъэунэфыкIырэ чIыпIэхэм афэбэнэщтых. Джащ фэдэу тикIалэхэр зыхэт командэр финалныкъом ихьагъ.Унэе зэнэкъокъухэм ахэлэжьэрэ спортсмен анахь лъэши 8-р ыкIи команднэ турнирым хагъэунэфыкIырэ чIыпIэхэр къыщыдэзыхыгъэхэр непэ къэнэфэщтых. Тиспортсменхэм гъэхъагъэхэр ашIынхэу, медальхэр къыдахынхэу афэтэIо.